ಕುಳಿತಲ್ಲಿಗೆ ಕಾಫಿ ಪೂರೈಸುವ “ಕಾಫಿ ಬಾಟ್‌’

ಮಂಗಳೂರು: ಕಚೇರಿಯಲ್ಲಿ ಕುಳಿತು ಕೆಲಸ ಮಾಡುತ್ತಿದ್ದ ನಿಮಗೆ ಬೋರ್‌ ಹೊಡೆಯಲಾರಂಭಿಸಿ ಒಂದು ಕಪ್‌ ಕಾಫಿ ಕುಡಿಯಬೇಕೆಂದೆನಿಸಿದೆಯಾ? ಕುಳಿತಲ್ಲೇ ಸ್ಮಾರ್ಟ್‌ ಫೋನ್‌ನಲ್ಲಿ ಅಳವಡಿಸಿರುವ ಆ್ಯಪ್‌ನಲ್ಲಿ “ಗೆಟ್‌ ಮೈ ಕಾಫಿ’ ಎಂದು ಒತ್ತಿದರಾಯಿತು. ಉರುಳುತ್ತಾ ಬರುವ ಕಾಫಿ ಹೊತ್ತ ಬಂಡಿ ಸರ್ರನೆ ಕಾಫಿ ಸುರಿದು ಇನ್ಯಾರಧ್ದೋ ಆರ್ಡರ್‌ ಹಿಡಿದು ಮುಂದೆ ಸಾಗುತ್ತದೆ!

ಹೀಗೊಂದು ವಿನೂತನ ತಂತ್ರಜ್ಞಾನಾಧಾರಿತ, ರೋಬೋಟ್‌ ಕಾಫಿ ಯಂತ್ರ “ಕಾಫಿ ಬಾಟ್‌’ನ್ನು ಸಂತ ಜೋಸೆಫ್‌ ಎಂಜಿನಿಯರಿಂಗ್‌ ಕಾಲೇಜು ವಾಮಂಜೂರು ಇಲ್ಲಿನ ಹಳೇ ವಿದ್ಯಾರ್ಥಿ ಜಾನ್‌ ಬ್ಯಾಪ್ಟಿಸ್ಟ್‌ ರೊಡ್ರಿಗಸ್‌ ಕಂಡು ಹಿಡಿದಿದ್ದಾರೆ. ಕೇವಲ “ಕಾಫಿ ಬಾಟ್‌’ ಮಾತ್ರವಲ್ಲ, ಕಚೇರಿ ದಾಖಲೆಗಳನ್ನು ಸಹ ಈ ಯಂತ್ರ ಹೊತ್ತು ತರಬಲ್ಲದು!

ಕಾಫಿ ಯಂತ್ರ ಹೊತ್ತ ಬಂಡಿ ಉದ್ಯೋಗಿಯ ಮೊಬೈಲ್‌ನಲ್ಲಿ ಅಳವಡಿಸಲಾದ ಆ್ಯಪ್‌ಗೆ ಸಂಪರ್ಕ ಹೊಂದಿ ರುತ್ತದೆ. ಉದ್ಯೋಗಿ ಮೊಬೈಲ್‌ನಿಂದಲೇ ಇದನ್ನು ನಿಯಂತ್ರಿಸಬಹುದು. ಈಗಾಗಲೇ “ಕಾಫಿ ಬಾಟ್‌’ ಹ್ಯಾಕಥಾನ್‌ ಸ್ಪರ್ಧೆಯಲ್ಲೂ ಪ್ರಥಮ ಸ್ಥಾನ ಪಡೆದಿದೆ. ಜಾನ್‌ ಬಹುಮುಖೀ ವ್ಯಕ್ತಿತ್ವದವರಾಗಿದ್ದು ಯಂತ್ರಗಳ ಉತ್ಪನ್ನದ ವಿನ್ಯಾಸ, ಸಂಗೀತ ಮೊದಲಾದ ಕ್ಷೇತ್ರಗಳಲ್ಲಿ ಆಸಕ್ತಿ ಹೊಂದಿದ್ದಾರೆ. ಪ್ರಸ್ತುತ ಅವರು ಸ್ನಾತಕೋತ್ತರ ಅಧ್ಯಯನಕ್ಕೆ ತಯಾರಿ ಮಾಡುತ್ತಿದ್ದಾರೆ. ಜಾನ್‌ ಜತೆಗೆ ಸ್ನೇಹಿತರು ಸೇರಿಕೊಂಡಿದ್ದು ಯಂತ್ರದ ಸುಧಾರಿತ ತಂತ್ರಜ್ಞಾನಕ್ಕಾಗಿ ಪ್ರಯತ್ನಿಸುತ್ತಿದ್ದಾರೆ.

ಯಂತ್ರದ ಸುಧಾರಣೆಯಲ್ಲಿ ಕೈಜೋಡಿಸಿರುವ ಜಾನ್‌ ಸ್ನೇಹಿತರಾದ ಹರ್ಷ ಆಳ್ವ ಮತ್ತು ಕ್ಲಾರೆನ್‌ ಮಾರ್ಟಿಸ್‌ ಸಹ ಕಾಲೇಜಿನ ಹಳೆಯ ವಿದ್ಯಾರ್ಥಿಗಳು.