1.91 ಲಕ್ಷ ಕೋಟಿ ವೆಚ್ಚಕ್ಕೆ ಅನುಮತಿ ಕೋರಿದ ಸಿಎಂ 

ಬೆಂಗಳೂರು: ರಾಜ್ಯದಲ್ಲಿ 2018-19ನೇ ಸಾಲಿಗೆ ವಿವಿಧ ಇಲಾಖೆಗಳಿಗೆ 1,91,301.93 ಕೋಟಿ ರೂ. ವೆಚ್ಚ ಮಾಡಲು ಅನುಮತಿ ಕೋರುವ ಸೂಚನೆಯನ್ನು ಮುಖ್ಯಮಂತ್ರಿ ಎಚ್‌.ಡಿ.ಕುಮಾರಸ್ವಾಮಿ ಸೋಮವಾರ ಸದನದಲ್ಲಿ ಮಂಡಿಸಿದ್ದಾರೆ.

2018-19ನೇ ಸಾಲಿಗೆ ಒಟ್ಟು 2,18,488 ಕೋಟಿ ರೂ. ಬಜೆಟ್‌ ಮಂಡಿಸಿರುವ ಕುಮಾರಸ್ವಾಮಿ, ಈ ಪೈಕಿ ವಿವಿಧ ಇಲಾಖೆಗಳಲ್ಲಿ 1,91,301.93 ಕೋಟಿ ರೂ. ವೆಚ್ಚ ಮಾಡಲು ಸದನದ ಅನುಮತಿ ಕೋರಿದ್ದಾರೆ. ಇದರಲ್ಲಿ 2018ರ ಏ. 1ರಿಂದ ಜುಲೈ ಅಂತ್ಯದವರೆಗೆ ವೆಚ್ಚ ಮಾಡಲು ಈಗಾಗಲೇ ಪಡೆದಿರುವ ಲೇಖಾನುದಾನದ ಮೊತ್ತವೂ ಸೇರಿದೆ.

ಈ ಸೂಚನೆ ಆಧಾರದ ಮೇಲೆ ಸೋಮವಾರದಿಂದ ಬಜೆಟ್‌ ಮೇಲಿನ ಚರ್ಚೆ ಆರಂಭವಾಗಿದೆ. ಗುರುವಾರದವರೆಗೆ ಚರ್ಚೆ ನಡೆಯಲಿದ್ದು, ಮುಖ್ಯಮಂತ್ರಿಗಳು ಚರ್ಚೆಗೆ ಉತ್ತರಿಸಿದ ಬಳಿಕ ಈ ಸೂಚನಾ ಪ್ರಸ್ತಾಪಕ್ಕೆ ಸದನದ ಅನುಮೋದನೆ ಪಡೆಯಬೇಕಾಗುತ್ತದೆ.ನಂತರವಷ್ಟೇ ಆಗಸ್ಟ್‌ ತಿಂಗಳಿನಿಂದ ಸರ್ಕಾರ ವಿವಿಧ ಇಲಾಖೆಗಳಲ್ಲಿ ಹಣ ಖರ್ಚು ಮಾಡಬೇಕಾಗುತ್ತದೆ.