ಗಾಳಿಯಲ್ಲಿ ತೇಲುವ ಗ್ಲಾಸು

ಟೇಬಲ್ಲಿನ ಮೇಲೆ ಒಂದು ಪ್ಲಾಸ್ಟಿಕ್‌ ಗ್ಲಾಸನ್ನು ಇಡಲಾಗಿದೆ. ಜಾದೂಗಾರ ಗ್ಲಾಸಿನ ಹತ್ತಿರ ತನ್ನ ಎರಡೂ ಕೈಗಳನ್ನು ತೆಗೆದುಕೊಂಡು ಹೋಗಿ ನಿಧಾನವಾಗಿ ಮೇಲೆತ್ತುತ್ತಾನೆ. ಆಗ ಗ್ಲಾಸ್‌ ಕೂಡಾ ಗಾಳಿಯಲ್ಲಿ ತೇಲುತ್ತಿರುವಂತೆ ನಿಧಾನವಾಗಿ ಮೇಲಕ್ಕೆ ಚಲಿಸುತ್ತದೆ.

ಬೇಕಾಗುವ ವಸ್ತುಗಳು
ಗಾಜಿನ ಲೋಟ,
ಸೆಲ್ಲೋ ಟೇಪ್‌

ಮಾಡುವ ವಿಧಾನ
ಚಿತ್ರ-2 ಅನ್ನು ಸರಿಯಾಗಿ ಗಮನಿಸಿ. ಮ್ಯಾಜಿಕ್‌ ಪ್ರದರ್ಶಿಸುವ ಮೊದಲು ಒಂದು ಸೆಲ್ಲೋ ಟೇಪಿನ ತುಂಡನ್ನು ಹೆಬ್ಬೆರಳು ತೂರಲು ಸುಲಭವಾಗುವಂತೆ ಅಂಟಿಸಿಡಲಾಗುತ್ತದೆ. ಮ್ಯಾಜಿಕ್‌ ಮಾಡುವಾಗ ಎರಡೂ ಕೈಗಳನ್ನು ಗ್ಲಾಸಿನ ಹತ್ತಿರ ತಂದು ಒಂದು ಕೈಯ ಹೆಬ್ಬೆರಳನ್ನು ಟೇಪಿನೊಳಗೆ ಜೋಪಾನವಾಗಿ ತೂರಿಸಬೇಕು. ಹೀಗೆ ಮಾಡಲು ಅಭ್ಯಾಸ ಮಾಡಿರಬೇಕು. ಆಗ ಮಾತ್ರ ಸಹಜವಾಗಿ ಮಾಡುವುದು ಸಾಧ್ಯವಾಗುತ್ತದೆ. ಸ್ವಲ್ಪ ನಿಧಾನವಾದರೂ ಪ್ರೇಕ್ಷಕರಿಗೆ ಅನುಮಾನ ಬರಬಹುದು. ಹೀಗಾಗಿ ಪ್ರೇಕ್ಷಕರ ಗಮನವನ್ನು ಬೇರೆಡೆ ಹರಿಸಲು ಗ್ಲಾಸನ್ನು ಹಿಡಿಯುವಾಗ ಮಂತ್ರೋಚ್ಚಾರ ಮಾಡಬಹುದು. ಹೆಬ್ಬೆರಳು ಟೇಪಿನ ಒಳಗೆ ತೂರಿದ ನಂತರ ನಿಧಾನವಾಗಿ ಕೈಯನ್ನು ಮೇಲಕ್ಕೆ ಚಲಿಸಿ. ಆಗ ಗ್ಲಾಸ್‌ ಕೂಡಾ ಕೈ ಜೊತೆ ಮೇಲಕ್ಕೆ ಚಲಿಸುವುದರಿಂದ ಗಾಳಿಯಲ್ಲಿ ತೇಲುತ್ತಿರುವಂತೆ ಕಾಣಿಸುತ್ತದೆ.

– ಉದಯ್ ಜಾದೂಗಾರ್