ಚತ್ತೀಸ್‍ಗಢ: ದಂತೇವಾಡದಲ್ಲಿ10 ನಕ್ಸಲರು ಶರಣಾಗತಿ

ದಂತೇವಾಡ: ಛತ್ತೀಸ್‌ಗಡದ ದಂತೇವಾಡ ಜಿಲ್ಲೆಯಲ್ಲಿ ಮಂಗಳವಾರ ಕನಿಷ್ಠ 10 ಮಂದಿ ನಕ್ಸಲರು ಪೊಲೀಸರ ಮುಂದೆ ಶರಣಾಗಿದ್ದಾರೆ.

ಮಾವೋವಾದಿ ಚಳವಳಿಯನ್ನು ತೊರೆದು ನಕ್ಸಲರು ಪೊಲೀಸರ “ಲೋನ್‌ ವರಟ್ಟು’ (ನಿಮ್ಮ ಗ್ರಾಮಕ್ಕೆ ಮರಳಿ) ಅಭಿಯಾನದ ಅಡಿ ಮುಖ್ಯವಾಹಿನಿಗೆ ಮರಳಿದ್ದಾರೆ.

ವಿಶೇಷವೆಂದರೆ, 10 ಮಂದಿಯ ಪೈಕಿ 8 ನಕ್ಸಲರು ಮೋಸ್ಟ್‌ ವಾಂಟೆಡ್‌ ಆಗಿದ್ದು, ಅವರನ್ನು ಹಿಡಿದುಕೊಟ್ಟವರಿಗೆ ಸರ್ಕಾರ 8 ಸಾವಿರ ರೂ.ನಿಂದ 10 ಸಾವಿರ ರೂ.ವರೆಗೆ ನಗದು ಬಹುಮಾನ ಘೋಷಿಸಿತ್ತು.

ಇವರೆಲ್ಲರ ಶರಣಾಗತಿ ಪ್ರಕ್ರಿಯೆಯಲ್ಲಿ ಸಿಆರ್‌ಪಿಎಫ್ ಪ್ರಮುಖ ಪಾತ್ರ ವಹಿಸಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಜೂನ್‌ 2020ರಿಂದ ಒಟ್ಟಾರೆ 578 ನಕ್ಸಲರು ಶರಣಾಗಿದ್ದಾರೆ.