ನಗರದೆಲ್ಲೆಡೆ ಗೋವಿಂದ ನಾಮಸ್ಮರಣೆ

ಬೆಂಗಳೂರು: ನಗರದಾದ್ಯಂತ ಭಾನುವಾರ ಭಕ್ತಿ ಭಾವದೊಂದಿಗೆ ವೈಕುಂಠ ಏಕಾದಶಿ ಆಚರಣೆ ನಡೆಯಿತು. ವಿಷ್ಣು ಹಾಗೂ ವೆಂಕಟೇಶ್ವರ ದೇವಾಲಯಗಳಲ್ಲಿ ಮುಂಜಾನೆಯಿಂದಲೇ ವಿಶೇಷ ಪೂಜೆ, ಆರಾಧನೆಗಳು ನೆರವೇರಿದವು. ದೇವಾಲಯಗಳಲ್ಲಿ ನಿರ್ಮಿಸಿದ್ದ ವೈಕುಂಠ ದ್ವಾರ ಪ್ರವೇಶಿಸುವ ಮೂಲಕ ಭಕ್ತರು ಸ್ವರ್ಗ ಪ್ರವೇಶಿಸಿದ ಧನ್ಯತಾ ಭಾವ ಮೆರೆದರು.

ವೈಕುಂಠ ಏಕಾದಶಿ ಅಂಗವಾಗಿ ಉದ್ಯಾನನಗರಿಯ ವಿವಿಧೆಡೆಯ ವಿಷ್ಣು , ವೆಂಕಟೇಶ್ವರ, ಶ್ರೀನಿವಾಸ, ಶ್ರೀರಾಮ ದೇವಾಲಯಗಳಲ್ಲಿ ಮುಂಜಾನೆಯಿಂದಲೇ ವಿಶೇಷ ಅಲಂಕಾರ, ಪೂಜೆ, ನಾದ ಸಂಗೀತ ಮೇಳೈಸಿದವು. ಚುಮುಚುಮು ಚಳಿಯನ್ನೂ ಲೆಕ್ಕಿಸದೆ ಜನ ನಸುಕಿನಲ್ಲೇ ಎದ್ದು ಸ್ನಾನ, ಮಡಿ, ಉಪವಾಸ ಆಚರಣೆಯೊಂದಿಗೆ ದೇವಾಲಯಗಳಿಗೆ ಆಗಮಿಸಿ ಸ್ವಾಮಿಯ ದರ್ಶನ ಪಡೆದರು. ರಾತ್ರಿ 11 ಗಂಟೆವರೆಗೂ ದೇವಾಲಯಗಳಲ್ಲಿ ವೈಕುಂಠದ ವೈಭವ ಅದ್ಧೂರಿಯಾಗಿ ನೆರವೇರಿತು.

ಬಹುತೇಕ ಎಲ್ಲಾ ದೇವಾಲಯಗಳಲ್ಲಿ ಅರ್ಚನೆ, ಮಹಾಮಂಗಳಾರತಿ ಹಾಗೂ ಪ್ರಸಾದ ವಿನಿಯೋಗ ನಡೆಯಿತು. ಇದರ ಜತೆಗೆ ಕೆಲವೆಡೆ ಬೆಳಗ್ಗೆಯಿಂದಲೇ ಸಾಂಸ್ಕೃತಿಕ ಹಾಗೂ ಸಂಗೀತ ಕಛೇರಿ ಏರ್ಪಡಿಸಲಾಗಿತ್ತು. ಇನ್ನು ಕೆಲವೆಡೆ ಸಂಜೆ ಭಕ್ತಿಗೀತೆಗಳ ಗಾಯನ, ಭಜನೆ, ವಿಷ್ಣು ಸಹಸ್ರನಾಮ ಪಠನ ಮಾಡಲಾಯಿತು.

ಚಾಮರಾಜಪೇಟೆಯ ಶ್ರೀ ಪ್ರಸನ್ನ ವೆಂಕಟೇಶ್ವರಸ್ವಾಮಿ ದೇವಾಲಯ, ಸತ್ಯನಾರಾಯಣಸ್ವಾಮಿ ದೇವಾಲಯ, ಬನ್ನೇರುಘಟ್ಟ ಮುಖ್ಯರಸ್ತೆಯ ಮಹಾಗಣಪತಿ ಶ್ರೀ ಲಕ್ಷ್ಮೀವೆಂಕಟೇಶ್ವರಸ್ವಾಮಿ ದೇವಾಲಯ, ಕೊಪ್ಪಗೇಟ್‌ ಬಳಿಯ ಪ್ರಸನ್ನವರದ ವೆಂಕಟೇಶ್ವರ ಸ್ವಾಮಿ ದೇವಾಲಯ, ರಾಜಾಜಿನಗರದ ಕೈಲಾಸ ವೈಕುಂಠ ಮಹಾಕ್ಷೇತ್ರ, ವೈಯಾಲಿಕಾವಲ್‌ನ ವೆಂಕಟೇಶ್ವರಸ್ವಾಮಿ ದೇವಾಲಯ, ಶ್ರೀರಾಮಪುರದ ಶ್ರೀರಾಮಚಂದ್ರಸ್ವಾಮಿ ದೇವಾಲಯ,

ಸಜ್ಜನ್‌ರಾವ್‌ ವೃತ್ತದ ಲಕ್ಷ್ಮೀ ವೆಂಕಟೇಶ್ವರಸ್ವಾಮಿ ದೇವಾಲಯ, ಬಸವನಗುಡಿಯ ಲಕ್ಷ್ಮೀ ವೆಂಕಟೇಶ್ವರ ಸ್ವಾಮಿ ದೇವಾಲಯ, ಬನಶಂಕರಿ 2ನೇ ಹಂತದ ವರಪ್ರದ ಶ್ರೀ ವೆಂಕಟೇಶ್ವರ ದೇವಾಲಯಗಳಲ್ಲಿ ವೈಕುಂಠ ಏಕಾದಶಿ ಮಹೋತ್ಸವ ವೈಭವವಾಗಿ ನೆರವೇರಿತು. ಬೆಳಗಿನ ಜಾವ 3ಗಂಟೆಯಿಂದಲೇ ಭಕ್ತರು ದೇವಸ್ಥಾನಗಳಿಗೆ ಆಗಮಿಸಿ ಸ್ವಾಮಿಯ  ದರ್ಶನ ಪಡೆದರು. ದೇವಾಲಯಗಳಲ್ಲಿ ನಿರ್ಮಿಸಿದ್ದ ವೈಕುಂಠ ದ್ವಾರ ಪ್ರವೇಶಿಸಿ ಧನ್ಯತೆ ಮೆರೆದರು.

ಇದಲ್ಲದೆ, ನಗರದ ಉತ್ತರಾಧಿ ಮಠದಲ್ಲಿ ವೈಕುಂಠ ಏಕಾದರ್ಶಿ ಪ್ರಯುಕ್ತ ಬೆಳಗ್ಗೆಯಿಂದಲೇ ವಿಷ್ಣುಪಾದ ಪೂಜೆ, ಪಂಚಾಮೃತ, ಸರ್ವಮೂಲ ಪಾರಾಯಣ, ಭಜನೆ, ಅಷ್ಟೋತ್ತರ, ಮೂಲರಾಮದೇವರ ಪೂಜೆ, ಮಂಗಳ ಮಹೋತ್ಸವ ನೆರವೇರಿದವು. ರಾಜಾಜಿನಗರದ 5ನೇ ಬ್ಲಾಕ್‌ನ ಕೈಲಾಸ ವೈಕುಂಠ ಮಹಾಕ್ಷೇತ್ರದಲ್ಲಿ ಶ್ರೀನಿವಾಸ ಸ್ವಾಮಿಗೆ ಮಹಾಭಿಷೇಕ, ಪಂಚಾಮೃತ ಅಭಿಷೇಕ, ಸುಪ್ರಭಾತ ಸೇವೆ, ಮಹಾಮಂಗಳರಾತಿ ನಡೆದವು.

ಶ್ರೀರಾಮಪುರದ ರಾಮಚಂದ್ರಸ್ವಾಮಿ ದೇವಸ್ಥಾನದಲ್ಲಿ ವಿಶೇಷ ಗಾಯನ, ವೈಯಾಲಿಕಾವಲ್‌ನ ತಿರುಮಲ ತಿರುಪತಿ ದೇವಾಲಯದಲ್ಲಿ ಸತೀಶ್‌ ಶರ್ಮಾ ಹಾಗೂ ಕಿರಣ್‌ ಶರ್ಮಾ ಅವರಿಂದ ವೇದಪಾರಾಯಣ, ವಿದ್ವಾನ್‌ ಬಿ.ಹರಿಪ್ರಸಾದ್‌ ಅವರಿಂದ ನಾದಸ್ವರ, ವಾಸವಿ ಮಹಿಳಾ ಮಂಡಳಿಯಿಂದ ವಿಷ್ಣುಪಾರಾಯಣ, ವಿದ್ವಾನ್‌ ಉಮಾ ಕುಮಾರ್‌ ಅವರಿಂದ ಭಕ್ತಿ ಸಂಗೀತ, ಭಾರತಿ ತೀರ್ಥ ಭಜನ ಮಂಡಳಿಯಿಂದ ಭಜನೆ, ಎಸ್‌.ಎನ್‌.ಸುರೇಶ್‌ ದಾಸ್‌ ಅವರಿಂದ ಹರಿಕಥೆ ಆಯೋಜಿಸಲಾಗಿತ್ತು. 

ಅದೇ ರೀತಿ ವೈಕುಂಠ ಏಕಾದಶಿ ಪ್ರಯುಕ್ತ ಪಾಂಡುರಂಗ ವಿಷ್ಣುಸಹಸ್ರನಾಮ ಮಂಡಳಿಯಿಂದ ಮಲ್ಲೇಶ್ವರ ಆಟದ ಮೈದಾನದಲ್ಲಿ ವಿಷ್ಣು ಸಹಸ್ರನಾಮ ಪಾರಾಯಣ, ಅರಿಶಿನ -ಕುಂಕುಮ ಹಂಚಿಕೆ, ಅಕ್ಷತೆ ತುಳಸಿ, ಹೂವಿನ ಅರ್ಚನೆ ಹಾಗೂ ಉಚಿತ ಆರೋಗ್ಯ ಶಿಬಿರ ಆಯೋಜಿಸಲಾಗಿತ್ತು. 

ಇಸ್ಕಾನ್‌ನಲ್ಲಿ ವೈಭವದ ವೈಕುಂಠ ಏಕಾದಶಿ 
ವಿಷ್ಣುವಿನ 10 ಅವತಾರಗಳಲ್ಲಿ ಕೃಷ್ಣಾವತಾರವೂ ಒಂದು. ಹಾಗಾಗಿ ಯಶವಂತಪುರ ಬಳಿಯ ಹರೇ ಕೃಷ್ಣಗಿರಿ “ಇಸ್ಕಾನ್‌’ನಲ್ಲೂ ವೈಭವದ ವೈಕುಂಠ ಏಕಾದರ್ಶಿ ಭಾನುವಾರ ನೆರವೇರಿತು. ನಗರದ ನಾನಾ ಭಾಗಗಳಿಂದ ಆಗಮಿಸಿದ ಲಕ್ಷಾಂತರ ಭಕ್ತರು ಸಾಲುಗಟ್ಟಿ ನಿಂತು ಶ್ರೀ ಕೃಷ್ಣನ ದರ್ಶನ ಪಡೆದರು.

ಮುಂಜಾನೆಯಿಂದಲೇ ವೇದ ಮಂತ್ರಗಳೊಂದಿಗೆ ಶ್ರೀನಿವಾಸನ ಮೂರ್ತಿಗೆ ಹಾಲು, ಮೊಸರು, ತುಪ್ಪ, ಬೆಣ್ಣೆ, ಜೇನುತುಪ್ಪ, ಹಣ್ಣಿನ ರಸದ ಅಭಿಷೇಕ ನೆರವೇರಿಸಲಾಯಿತು. ಬಳಿಕ ವೈವಿದ್ಯಮಯ ಪುಷ್ಪಗಳಿಂದ ಗೋವಿಂದನ್ನು ಅಲಂಕರಿಸಿ, ಮಹಾಮಂಗಳಾರತಿ ನೆರವೇರಿಸಲಾಯಿತು. ನಂತರ ರಾಧಾ ಕೃಷ್ಣ ಉತ್ಸವ ಮೂರ್ತಿಯನ್ನು ಲಕ್ಷ್ಮೀ-ನಾರಾಯಣನ ಅಲಂಕಾರದಲ್ಲಿ ಇಸ್ಕಾನ್‌ ಸುತ್ತಲ ರಸ್ತೆಗಲಲ್ಲಿ ಮೆರವಣಿಗೆ ನಡೆಸಲಾಯಿತು.