ಚಂದ್ರಯಾನ 2: ಮೊದಲ ಹಂತದ ಕಕ್ಷೆ ಏರಿಕೆ ಯಶಸ್ವಿ

ಶ್ರೀಹರಿಕೋಟ: ಕಳೆದ ಸೋಮವಾರ ನಭಕ್ಕೆ ನೆಗೆದ ಚಂದ್ರಯಾನ-2 ಗಗನನೌಕೆಯ ಮೊದಲ ಹಂತದ ಕಕ್ಷೆಗೇರಿಸುವಿಕೆ ಪ್ರಕ್ರಿಯೆಯನ್ನು ಬುಧವಾರ ಯಶಸ್ವಿಯಾಗಿ ನಡೆಸಲಾಗಿದೆ ಎಂದು ಇಸ್ರೋ ತಿಳಿಸಿದೆ. ಉನ್ನತ ಸ್ತರದ ಕಕ್ಷೆಗೆ ಗಗನನೌಕೆಯನ್ನು ಏರಿಸಲಾಗಿದೆ. ಇದಕ್ಕಾಗಿ 57 ಸೆಕೆಂಡುಗಳ ಕಾಲ ಇಂಜಿನ್‌ ಅನ್ನು ಚಾಲನೆ ಮಾಡಲಾಗಿತ್ತು. ಮಧ್ಯಾಹ್ನ 2.52 ಗಂಟೆಗೆ ಸರಿಯಾಗಿ ಈ ಪ್ರಕ್ರಿಯೆ ಯಶಸ್ವಿಯಾಗಿ ನಡೆದಿದೆ ಎಂದು ಇಸ್ರೋ ವಿಜ್ಞಾನಿಗಳು ತಿಳಿಸಿದ್ದಾರೆ. ಚಂದ್ರನ ಮೇಲೆ ಇಳಿಯುವುದಕ್ಕೂ ಮೊದಲು ಒಟ್ಟು ನಾಲ್ಕು ಕಕ್ಷೆಗೇರಿಸುವಿಕೆ ಪ್ರಕ್ರಿಯೆ ನಡೆಯಲಿದೆ. ಇದರ ಎರಡನೇ ಪ್ರಕ್ರಿಯೆ ಜುಲೈ 26 ರಂದು ಮಧ್ಯಾಹ್ನ 1 ಗಂಟೆಗೆ ನಡೆಯಲಿದೆ.

ನಿಗದಿಯಂತೆ ಸೆ.7 ರಂದು ಚಂದ್ರನ ಮೇಲೆ ಲ್ಯಾಂಡರ್‌ ಸಾಫ್ಟ್ ಲ್ಯಾಂಡ್‌ ಆಗಲಿದೆ. ಆಗಸ್ಟ್‌ 14 ರಂದು ನೌಕೆಯನ್ನು ಚಂದ್ರನ ಕಕ್ಷೆಗೆ ಕಳುಹಿಸಲಾಗುತ್ತದೆ. ಇದು ಅತ್ಯಂತ ಪ್ರಮುಖ ಹಂತವಾಗಿದ್ದು, ನಂತರದ ಪ್ರಮುಖ ಹಂತವೇ ಚಂದ್ರನ ಮೇಲೆ ಸಾಫ್ಟ್ ಲ್ಯಾಂಡಿಂಗ್‌ ಆಗಿದೆ.