ನಾಯ್ಡು ಪುತ್ರನ ಆಸ್ತಿ 23 ಪಟ್ಟು ಹೆಚ್ಚಳ!

ಅಮರಾವತಿ: ಆಂಧ್ರಪ್ರದೇಶ ಸಿಎಂ ಎನ್‌. ಚಂದ್ರಬಾಬು ನಾಯ್ಡು ಅವರ ಪುತ್ರ ಎನ್‌. ಲೋಕೇಶ್‌ ಅವರ ವೈಯಕ್ತಿಕ ಆಸ್ತಿಯ ಮೌಲ್ಯವು 14. 50 ಕೋಟಿಯಿಂದ ಬರೋಬ್ಬರಿ 330 ಕೋಟಿ ರೂ.ಗೆ ಏರಿಕೆಯಾಗಿದೆ. 

ಇದೇನು 5-6 ವರ್ಷಗಳಲ್ಲಾದ ಏರಿಕೆಯಲ್ಲ. ಬರೀ 5 ತಿಂಗಳ ಅವಧಿಯಲ್ಲಿ 23 ಪಟ್ಟು ಹೆಚ್ಚಾಗಿದೆ! ವಿಧಾನ ಪರಿಷತ್‌ ಚುನಾವಣೆಗೆ ನಾಮಪತ್ರ ಸಲ್ಲಿಸುವ ವೇಳೆ ಚುನಾವಣಾ ಆಯೋಗಕ್ಕೆ ಸಲ್ಲಿಸಿದ ಅಫಿಡವಿಟ್‌ನಲ್ಲಿ ಸ್ವತಃ ಲೋಕೇಶ್‌ ಈ ಮಾಹಿತಿ ನೀಡಿದ್ದಾರೆ. ಈ ಬಗ್ಗೆ ಸ್ಪಷ್ಟನೆ ನೀಡಿದ ಲೋಕೇಶ್‌, “ಹಿಂದೆ ನಾನು ಘೋಷಿಸಿದ ಆಸ್ತಿಯು ಸ್ವಾಧೀನದ ಮೌಲ್ಯವನ್ನು ಆಧರಿಸಿದ್ದು. ಆದರೆ, ನೈಜ ಮಾರುಕಟ್ಟೆ ಮೌಲ್ಯ ಉಲ್ಲೇಖೀಸಬೇಕೆಂದು ಆಯೋಗವು ಹೇಳಿರುವ ಕಾರಣ, ನಾನು ಈಗಿನ ಮಾರುಕಟ್ಟೆ ದರದಲ್ಲಿ ಆಸ್ತಿ ಘೋಷಿಸಿದ್ದೇನೆ,’ ಎಂದಿದ್ದಾರೆ.