ಸಿಇಯುಟಿ: ಎರಡನೇ ದಿನವೂ ಮುಂದುವರಿದ ಸಮಸ್ಯೆ

ನವದೆಹಲಿ: ಸಿಇಯುಟಿ-ಯುಜಿ ನಾಲ್ಕನೇ ಹಂತದ ಪರೀಕ್ಷೆ ದೇಶದಲ್ಲಿ ನಡೆಯುತ್ತಿದ್ದು, ಬುಧವಾರದಂತೆಯೇ ಗುರುವಾರವೂ ಅನೇಕ ಅಭ್ಯರ್ಥಿಗಳಿಗೆ ಪರೀಕ್ಷೆ ಬರೆಯಲು ಸಮಸ್ಯೆ ಉಂಟಾಗಿದೆ.

ಕೊನೇ ಕ್ಷಣದಲ್ಲಿ ಸಿಇಯುಟಿ ಪರೀಕ್ಷಾ ಕೇಂದ್ರಗಳನ್ನೇ ಬದಲಾಯಿಸಲಾಗಿದೆ ಎಂದು ವಿದ್ಯಾರ್ಥಿಗಳು ದೂರಿದ್ದಾರೆ. “ನಾನು ಪರೀಕ್ಷಾ ಕೇಂದ್ರವಾಗಿ ಆಯ್ಕೆ ಮಾಡಿದ್ದೇ ಬೇರೆ. ಮೊದಲಿಗೆ ನನಗೆ ನನ್ನ ಆಯ್ಕೆಯ ನಗರದಲ್ಲೇ ಪರೀಕ್ಷಾ ಕೇಂದ್ರ ತೋರಿಸಲಾಗಿತ್ತು. ಆದರೆ ಕೊನೆಯ ಕ್ಷಣದಲ್ಲಿ ಪ್ರವೇಶ ಪತ್ರದಲ್ಲಿ 150ಕಿ.ಮೀ. ದೂರದ ಕೇಂದ್ರವನ್ನು ಕೊಡಲಾಗಿದೆ’ ಎಂದು ದೂರಿದ್ದಾರೆ ಅಭ್ಯರ್ಥಿ ನೇಹಾ. ಬುಧವಾರ ಸಂಜೆಯವರೆಗೂ ಇದ್ದ ಪರೀಕ್ಷಾ ಕೇಂದ್ರಗಳನ್ನು ಪರೀಕ್ಷೆಯ ದಿನ ಬೆಳಗ್ಗೆ ಬದಲಾಯಿಸಲಾಗಿದೆ ಎಂದು ಅನೇಕ ಅಭ್ಯರ್ಥಿಗಳು ದೂರಿದ್ದಾರೆ.

ಬುಧವಾರ ಕೂಡ 13 ಪರೀಕ್ಷಾ ಕೇಂದ್ರಗಳಲ್ಲಿ ತಾಂತ್ರಿಕ ಸಮಸ್ಯೆ ಉಂಟಾಗಿ 8,600 ಅಭ್ಯರ್ಥಿಗಳಿಗೆ ತೊಂದರೆಯಾಗಿತ್ತು. ಆ ಅಭ್ಯರ್ಥಿಗಳಿಗೆ ಆ.25ರಂದು ಮರುಪರೀಕ್ಷೆ ಮಾಡುವುದಾಗಿ ವಿಶ್ವವಿದ್ಯಾಲಯ ಅನುದಾನ ಆಯೋಗ(ಯುಜಿಸಿ) ತಿಳಿಸಿದೆ. ಸಿಯುಇಟಿ ನಾಲ್ಕನೇ ಹಂತದ ಪರೀಕ್ಷೆ ಆ.17ರಿಂದ 20ರವರೆಗೆ ನಡೆಯಲಿದೆ.