ಇನ್ನೂ 25 ಚೀತಾಗಳಿಗೆ ಆಶ್ರಯ ನೀಡುವ ಸಾಮರ್ಥ್ಯವಿದೆ

ಭೋಪಾಲ್‌: ಆಫ್ರಿಕಾದ ಚೀತಾಗಳಿಗೆ ಹೊಸ ಆವಾಸಸ್ಥಾನವಾಗಿರುವ ಮಧ್ಯಪ್ರದೇಶದ ಕುನೋ ರಾಷ್ಟ್ರೀಯ ಉದ್ಯಾನವು ಅಂಥ 20ರಿಂದ 25ರಷ್ಟು ಚೀತಾಗಳಿಗೆ ಆಶ್ರಯ ನೀಡುವಷ್ಟು ವಿಶಾಲವಾ­ಗಿದ್ದು, ಅಲ್ಲಿ ಅವುಗಳಿಗೆ ಅಗತ್ಯ ವಾದಷ್ಟು ಶಿಕಾರಿಗಳೂ ಲಭ್ಯವಿದೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ಚೀತಾ ಮರುಪರಿಚಯ ಯೋಜನೆ ಖಂಡಿತಾ ಯಶಸ್ವಿಯಾಗ­ಲಿದೆ. ಕುನೋ ಉದ್ಯಾನವು 750 ಚದರ ಕಿ. ಮೀ. ವ್ಯಾಪ್ತಿಯಲ್ಲಿ ಹಬ್ಬಿದ್ದು, ಅದರ ಸುತ್ತಲೂ 6 ಸಾವಿರ ಚದರ ಕಿ.ಮೀ. ಪ್ರದೇಶದಲ್ಲಿ ದಟ್ಟ ಕಾಡಿದೆ. ಮಧ್ಯಪ್ರದೇಶದ ಶಿವಪುರಿ ಮತ್ತು ಶಿಯೋಪುರ ಜಿಲ್ಲೆಗಳಿಂದ ರಾಜಸ್ಥಾನದ ಬಾರನ್‌ ಜಿಲ್ಲೆಯವರೆಗೂ ಇದು ವ್ಯಾಪಿಸಿದೆ. ಅಲ್ಲದೇ, ಈ ಚೀತಾಗಳು ಮಾನವ-ಪ್ರಾಣಿ ಸಂಘರ್ಷದ ಬಲೆಗೆ ಬೀಳುವ ಸಾಧ್ಯತೆ ಕಡಿಮೆ ಎಂದು ಮಧ್ಯಪ್ರದೇಶದ ಪ್ರಧಾನ ಅರಣ್ಯ ಸಂರಕ್ಷಕ ಜೆ.ಎಸ್‌.ಚೌಹಾಣ್‌ ಹೇಳಿದ್ದಾರೆ.

ಮೋದಿ ವಿರುದ್ಧ ಜೈರಾಂ ಕಿಡಿ: “ಭಾರತದಲ್ಲಿ ಚೀತಾಗಳನ್ನು ಮರುಪರಿಚಯಿಸಲು ಹಿಂದಿನ ಸರಕಾರಗಳು ರಚನಾತ್ಮಕ ಪ್ರಯತ್ನವನ್ನು ಮಾಡಲೇ ಇಲ್ಲ’ ಎಂಬ ಪ್ರಧಾನಿ ನರೇಂದ್ರ ಮೋದಿ ಅವರ ಹೇಳಿಕೆಯ ವಿರುದ್ಧ ಕಾಂಗ್ರೆಸ್‌ ಹಿರಿಯ ನಾಯಕ ಜೈರಾಂ ರಮೇಶ್‌ ಹರಿಹಾಯ್ದಿದ್ದಾರೆ. ಪತ್ರವೊಂ­ದನ್ನು ಟ್ವಿಟರ್‌ನಲ್ಲಿ ಅಪ್‌ಲೋಡ್‌ ಮಾಡಿರುವ ಜೈರಾಂ, “2009ರಲ್ಲಿ ಪ್ರಾಜೆಕ್ಟ್ ಚೀತಾವನ್ನು ಅನಾವರಣಗೊಳಿಸಿದ ಪತ್ರವಿದು. ಮೋದಿ­ಯವರು ಒಬ್ಬ ವಿವೇಕವೇ ಇಲ್ಲದ ಸುಳ್ಳುಗಾರ’ ಎಂದಿದ್ದಾರೆ.

ಜತೆಗೆ 2009ರಲ್ಲಿ ವನ್ಯಜೀವಿ ಟ್ರಸ್ಟ್‌ನ ಎಂ.ಕೆ.ರಂಜಿತ್‌ಸಿನ್ಹಾರಿಗೆ “ಚೀತಾಗಳನ್ನು ಮರುಪರಿ­ಚಯಿಸುವ ಯೋಜನೆಗೆ ಮಾರ್ಗಸೂಚಿ ಸಿದ್ಧಪಡಿಸಿ’ ಎಂದು ಸೂಚಿಸಿ ಬರೆದ ಪತ್ರವನ್ನೂ ಜೈರಾಂ ಅಪ್‌ಲೋಡ್‌ ಮಾಡಿದ್ದಾರೆ.

ಎಡಿಟ್‌ ಮಾಡಿದ ಫೋಟೋ ಟ್ವೀಟ್‌
ಕುನೋ ರಾಷ್ಟ್ರೀಯ ಉದ್ಯಾನ ವನಕ್ಕೆ 8 ಚೀತಾಗಳನ್ನು ಬಿಡುಗಡೆ ಮಾಡಿದ ಬಳಿಕ ಪ್ರಧಾನಿ ಮೋದಿ ಫೋಟೊ ತೆಗೆಯುವ ವೇಳೆ ಕೆಮರಾದ ಕ್ಯಾಪ್‌ ತೆಗೆದಿರಲಿಲ್ಲ ಎಂದು ವಿಪಕ್ಷಗಳ ಕೆಲವು ಮುಖಂಡರು ಕಾಲೆಳೆಯುವ ಪ್ರಯತ್ನ ಮಾಡಿದ್ದಾರೆ. ಆದರೆ ಆ ಫೋಟೋ ಎಡಿಟ್‌ಮಾಡಲಾಗಿದೆ. ಅದನ್ನೇ ವಿಪಕ್ಷಗಳ ಮುಖಂಡರು ಶೇರ್‌ ಮಾಡಿದ್ದಾರೆ ಎಂದು ಬಿಜೆಪಿಯ ಡಾ| ಸುಖಾಂತ ಮಜುಂದಾರ್‌ ಟ್ವೀಟ್‌ ಮಾಡಿದ್ದಾರೆ. ನಿಕಾನ್‌ ಕಂಪೆನಿಯ ಕೆಮರಾಕ್ಕೆ ಕ್ಯಾನೊನ್‌ ಕಂಪೆನಿಯ ಕ್ಯಾಪ್‌ ಹಾಕಲಾಗಿದೆ ಎಂದೂ ಅವರು ಬರೆದುಕೊಂಡಿದ್ದಾರೆ. ಎಡಿಟ್‌ ಮಾಡಲಾಗಿರುವ ಫೋಟೋ ಹಂಚಿಕೊಂಡಿರುವ ಬಗ್ಗೆ ಟಿಎಂಸಿ ಸಂಸದ ಜವ್ಹಾರ್‌ ಸಿರ್ಕಾರ್‌ ಸೇರಿ ವಿಪಕ್ಷಗಳ ಹಲವು ಸಂಸದರು ಪ್ರಧಾನಿ­ ಯವರನ್ನು ಟೀಕಿಸಿದ್ದಾರೆ. ಈ ಬಗ್ಗೆ ಪ್ರತಿಕ್ರಿಯಿಸಿರುವ ಬಿಜೆಪಿ ನಾಯಕರು, “ಫೋಟೋ ಎಡಿಟ್‌ ಮಾಡಿದವರಿಗೆ ಕಂಪೆನಿಗಳ ಮಧ್ಯದ ವ್ಯತ್ಯಾಸವೂ ತಿಳಿದಿಲ್ಲ. ನಾಯಕರ ಬಗ್ಗೆ ಅಪಪ್ರಚಾರ ಮಾಡುವಲ್ಲಿ ನೀವು ಎಡವಿದ್ದೀರಿ’ ಎಂದು ವಿಪಕ್ಷಗಳ ನಾಯಕರ ಕಾಲೆಳೆದಿದ್ದಾರೆ.