ಫ್ರೆಂಡ್ಸ್‌  ಸ್ವಾವಲಂಬನ ಕೇಂದ್ರ ಡೊಂಬಿವಲಿ: ಸಹಾಯ ನಿಧಿ ಅರ್ಪಣೆ

ಡೊಂಬಿವಲಿ: ಡೊಂಬಿವಲಿ ಫ್ರೆಂಡ್ಸ್‌ ಸ್ವಾವಲಂಬನಾ ಇದರ ವತಿಯಿಂದ ಸಂಗೀತ ರಸಸಂಜೆ, ಸಹಾಯ ನಿಧಿ ಹಾಗೂ ದೇಣಿಗೆ ಅರ್ಪಣೆ ಕಾರ್ಯಕ್ರಮವು ಕೇಂದ್ರದ ಕಾರ್ಯಾಲಯದಲ್ಲಿ ನಡೆಯಿತು.

ಸಂಗೀತ ರಸಸಂಜೆ ಕಾರ್ಯಕ್ರಮದಲ್ಲಿ ಆಶಾ ನಾಯಕ್‌, ವರಶ್ರೀ ಶೆಟ್ಟಿ, ಸ್ಮಿತಾ ಪಾಟ್ಕರ್‌, ಉಮಾ ಶೆಟ್ಟಿ, ಯಶೋಧಾ ಪೂಜಾರಿ, ಬೇಬಿ ಪೂಜಾರಿ ಭಕ್ತಿಗೀತೆ, ಸುಗಮ ಸಂಗೀತ ಪ್ರಸ್ತುತಪಡಿಸಿದರು. ಯುವ ನ್ಯಾಯವಾದಿ ಸುರೇಶ್‌ ಆಚಾರ್ಯ  ಯಕ್ಷಗಾನದ ಹಾಡು ಹಾಡಿದರು.

ಸ್ಥಳೀಯ ಪಾನ್‌ಶಾಪ್‌ನ  ಸಂಜೀವ ಆಳ್ವ ಅವರಿಗೆ ಕೇಂದ್ರದ ವತಿಯಿಂದ 10 ಸಾವಿರ ರೂ. ಸಹಾಯ ಧನ ವನ್ನಿತ್ತು ಗೌರವಿಸಲಾಯಿತು. ಶ್ರೀ ಕಾಳಿಕಾಂಬ ವಿಶ್ವಕರ್ಮ ಸೇವಾ ಸಂಘ ಪನ್ವೇಲ್‌ ಸಮೀಪದಲ್ಲಿ ನಿರ್ಮಾಣ ಗೊಳ್ಳುತ್ತಿರುವ ಶ್ರೀ ಕಾಳಿಕಾಂಬಾ ವಿನಾಯಕ ದೇವಸ್ಥಾನಕ್ಕಾಗಿ ದೇಣಿಗೆ ನಿಧಿಯನ್ನು ಪ್ರೊ| ವೆಂಕಟೇಶ್‌ ಪೈ ಅವರು ಹಸ್ತಾಂತರಿಸಿದರು.  ದೇವಸ್ಥಾನದ ಸಮಿತಿಯ ಸಂಚಾಲಕ ಶೈಲೇಶ್‌ ಆಚಾರ್ಯ, ಸಂಘದ ಜತೆ ಕಾರ್ಯದರ್ಶಿ ನ್ಯಾಯವಾದಿ ಸುರೇಶ್‌ ಆಚಾರ್ಯ, ಸಂಘದ ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆ ಅನ್ನಪೂರ್ಣ ಶ್ರೀಧರ ಆಚಾರ್ಯ, ಜತೆ ಕಾರ್ಯದರ್ಶಿ ಪೂರ್ಣಿಮಾ ಆಚಾರ್ಯ  ಉಪಸ್ಥಿತರಿದ್ದರು.

ಯಶೋಧಾ ಪೂಜಾರಿ ಮತ್ತು ಬೇಬಿ ಪೂಜಾರಿ ಅವರ ಪ್ರಾರ್ಥನೆಯೊಂದಿಗೆ ಕಾರ್ಯಕ್ರಮ  ಪ್ರಾರಂಭಗೊಂಡಿತು. ಕೇಂದ್ರದ ಸಂಚಾಲಕ ಪ್ರೊ| ವೆಂಕಟೇಶ್‌ ಪೈ  ಪ್ರಾಸ್ತಾವಿಕವಾಗಿ ಮಾತಾಡಿದರು. ಸುಧಾ ಮಂಜುನಾಥ ಪೈ, ನಳಿನಾಕ್ಷೀ ಶೆಟ್ಟಿ ಅವರು ಸಹಕರಿಸಿದರು. ಪ್ರಬಂಧಕಿ ಜ್ಯೋತಿ ಹೆಗ್ಡೆ ವಂದಿಸಿದರು. ಕೊನೆಯಲ್ಲಿ ಲಘು ಉಪಾಹಾರದ ವ್ಯವಸ್ಥೆ ಆಯೋಜಿಸಲಾಗಿತ್ತು.