ಆರ್‌ಬಿಐ ಖಡಕ್‌ ನೀತಿಗೆ ಮುಂಬಯಿ ಶೇರು 205 ಅಂಕ ಕುಸಿತ

ಮುಂಬಯಿ : ಬಡ್ಡಿದರ ಕಡಿತಕ್ಕೆ ಪೂರಕವಾದ ಹಣದುಬ್ಬರ ಸನ್ನಿವೇಶ ಇದ್ದ ಹೊರತಾಗಿಯೂ ಆರ್‌ಬಿಐ ತನ್ನ ಪ್ರಮುಖ ಬಡ್ಡಿದರಗಳನ್ನು ಇಳಿಸದೇ ಅವುಗಳನ್ನು ಯಥಾವತ್‌ ಉಳಿಸಿಕೊಂಡ ಕಾರಣ ನಿರಾಶೆಗೊಂಡ ಮುಂಬಯಿ ಶೇರು ಪೇಟೆ ಇಂದು ಬುಧವಾರದ ವಹಿವಾಟನ್ನು 205 ಅಂಕಗಳ ನಷ್ಟದೊಂದಿಗೆ 32,597.18 ಅಂಕಗಳ ಮಟ್ಟದಲ್ಲಿ ಕೊನೆಗೊಳಿಸಿತು.

ಬ್ಯಾಂಕ್‌ ಶೇರುಗಳು ವಸ್ತುತಃ ಪ್ರಪಾತವನ್ನು ಕಂಡವು. ಬಾಶ್‌, ಹಿಂಡಾಲ್ಕೊ, ಈಶರ್‌ ಮೋಟರ್‌, ಅರಬಿಂದೋ ಫಾರ್ಮಾ, ವೇದಾಂತ ಶೇರುಗಳು ಕೂಡ ಹಿನ್ನಡೆಗೆ ಗುರಿಯಾದವು. 

ಸೆನ್ಸೆಕ್ಸ್‌ನಂತೆ ಕುಸಿತ ಕಂಡ ರಾಷ್ಟ್ರೀಯ ಶೇರು ಮಾರುಕಟ್ಟೆಯ ನಿಫ್ಟಿ ಸೂಚ್ಯಂಕ 74.20 ಅಂಕಗಳ ನಷ್ಟಕ್ಕೆ ಗುರಿಯಾಗಿ ದಿನದ ವಹಿವಾಟನ್ನು 10,044.10 ಅಂಕಗಳ ಮಟ್ಟದಲ್ಲಿ ನಿರಾಶಾದಾಯಕವಾಗಿ ಕೊನೆಗೊಳಿಸಿತು.

ಇಂದಿನ ವಹಿವಾಟಿನಲ್ಲಿ ಏರಿಕೆ ಭಾಗ್ಯ ಪಡೆದ ಪ್ರತೀ ಒಂದು ಶೇರಿಗೆ ವ್ಯತಿರಿಕ್ತವಾಗಿ ಎರಡು ಶೇರುಗಳು ಕುಸಿದಿರುವುದು ಗಮನಾರ್ಹ. ಬ್ಯಾಂಕ್‌ ನಿಫ್ಟಿ ಇಂದಿನ ವಹಿವಾಟಿನಲ್ಲಿ 273 ಅಂಕಗಳ ಭಾರೀ ಕುಸಿತವನ್ನು ಕಂಡವು.