ಬ್ರಿಟನ್‌ನಲ್ಲಿ ಬೀದಿ ಪಾಲಾಗುತ್ತಿವೆ ಸಾಕು ಪ್ರಾಣಿಗಳು!

ಲಂಡನ್‌: ವಿಷಕಾರಿ ಪ್ರಾಣಿಯಾದ ಹಾವನ್ನು ಸಾಕುವುದಕ್ಕೂ ಅವಕಾಶವಿರುವ ರಾಷ್ಟ್ರ ಬ್ರಿಟನ್‌. ಆದರೆ ಇದೀಗ ಬ್ರಿಟನ್‌ನ ಸಾಕುಪ್ರಾಣಿಗಳು ಬೀದಿ ಪಾಲಾಗುತ್ತಿವೆ. ಕಾರಣ ಅಲ್ಲಿನ ಜೀವನ ವೆಚ್ಚ!

ಬ್ರಿಟನ್‌ನಲ್ಲಿ ಮನುಷ್ಯರ ಜೀವನ ವೆಚ್ಚ ಭಾರೀ ಪ್ರಮಾಣದಲ್ಲಿ ಏರಿದೆ. ಹೀಗಾಗಿ ಪ್ರಾಣಿಗಳನ್ನು ಸಾಕುವುದು ಜನರಿಗೆ ಅತ್ಯಂತ ಕಷ್ಟವಾಗಿದೆ. ಹಾಗಾಗಿ ಅನೇಕರು ತಮ್ಮ ಮನೆಯ ಸಾಕು ಪ್ರಾಣಿಗಳನ್ನು ಬೀದಿಯಲ್ಲಿ ಬಿಟ್ಟು ಹೋಗಲಾರಂಭಿಸಿದ್ದಾರೆ.

ಬೀದಿ ಬೀದಿ ಸುತ್ತಲಾರಂಭಿಸಿರುವ ನಾಯಿ, ಬೆಕ್ಕುಗಳು ಮಾಲೀಕರಿಗಾಗಿ ಹುಡುಕಾಟ ಆರಂಭಿಸಿವೆ. ಅಲ್ಲಿನ ಪ್ರಾಣಿ ದತ್ತು ಕೇಂದ್ರಗಳಲ್ಲಿ ಪ್ರಾಣಿಗಳ ಸಂಖ್ಯೆ ಗಣನೀಯ ಏರಿಕೆ ಕಂಡಿದೆ. ಯಾವಾಗಲೂ 10,000 ಅಧಿಕವಿರುತ್ತಿದ್ದ ಪ್ರಾಣಿ ದತ್ತು ಬೇಡಿಕೆ ಈಗ ನೂರಕ್ಕೆ ಇಳಿದಿದೆ. ದತ್ತು ಪಡೆದವರೂ ವಾಪಸು ಕೊಡಲು ಮುಂದಾಗಿದ್ದಾರೆ ಎನ್ನುತ್ತಾರೆ ಕೇಂದ್ರಗಳ ನಿರ್ವಾಹಕರು.