ಮದುವೆಯ ಔತಣ ಕೂಟಕ್ಕೆ ಬಂದ ನೂರಾರು ಆನೆಗಳು… ವಧು, ವರ ಬೈಕ್ ಏರಿ ಪರಾರಿ

ಪಶ್ಚಿಮ ಬಂಗಾಳ: ಅವರೆಲ್ಲರೂ ಮದುವೆ ಸಮಾರಂಭ ಮುಗಿದು ಔತಣ ಕೂಟದ ಖುಷಿಯಲ್ಲಿದ್ದರು. ಅದಕ್ಕಾಗಿ ಎಲ್ಲ ರೀತಿಯ ತಯಾರಿ ಕೂಡ ನಡೆಯುತ್ತಿತ್ತು ಅಡುಗೆಯವರು ಅಡುಗೆ ತಯಾರಿಯಲ್ಲಿ ಬ್ಯುಸಿ ಯಾಗಿದ್ದರು, ಅಡುಗೆಯ ಪರಿಮಳ ಕೂಡ ಇಡೀ ಊರಿಗೆ ಹಬ್ಬಿತ್ತು ಅಷ್ಟೋತ್ತಿಗೆ ಅಡುಗೆ ರುಚಿ ನೋಡಲು ಬಂತು ನೂರಾರು ಆನೆಗಳು… ಮುಂದೆ ನಡೆದದ್ದೇ ಬೇರೆ.

ಏನಿದು ಘಟನೆ:
ಪಶ್ಚಿಮ ಬಂಗಾಳದ ಝಾರ್‌ಗ್ರಾಮ್ ಜಿಲ್ಲೆಯಲ್ಲಿ ಕಳೆದ ವಾರ ಮದುವೆ ಸಮಾರಂಭ ನಡೆದಿದೆ ಮದುವೆಯಾದ ಬಳಿಕ ವರನ ಮನೆಯಲ್ಲಿ ಔತಣ ಕೂಟವನ್ನು ಕಳೆದ ಭಾನುವಾರ ಏರ್ಪಡಿಸಿದ್ದರು. ಮನೆಯವರೆಲ್ಲಾ ಔತಣ ಕೂಟದ ತಯಾರಿಯಲ್ಲಿದ್ದರು, ಬರುವ ನೆಂಟರಿಗೆ ಭರ್ಜರಿ ಊಟವನ್ನು ತಯಾರಿ ಮಾಡಲಾಗುತ್ತಿತ್ತು ಇದಕ್ಕಾಗಿ ಕೆಲವು ಮಂದಿ ಅಡುಗೆಯವರೂ ಬಂದಿದ್ದರು, ನೂರಾರು ಮಂದಿಗೆ ಬೇಕಾಗುವ ಅಡುಗೆಯನ್ನು ತಯಾರು ಮಾಡುತ್ತಿದ್ದರು. ಅಷ್ಟೋತ್ತಿಗೆ ಮದುವೆ ಮನೆಯಲ್ಲಿ ಮಾಡುತ್ತಿದ್ದ ಅಡುಗೆಯ ಪರಿಮಳ ಊರಿಗೆ ಹಬ್ಬಿತ್ತು ಅದೇ ಹೊತ್ತಿಗೆ ನೂರಾರು ಆನೆಗಳು ಬಂದು ಮದುವೆ ಮನೆಯ ಅಡುಗೆ ಕೋಣೆಗೆ ನುಗ್ಗಿ ಎಲ್ಲ ಅಡುಗೆಗಳನ್ನು ತಿಂದು ತೇಗಿದೆ.

ಆನೆಗಳು ಪ್ರವೇಶಿಸುತ್ತಿದ್ದಂತೆ ಅಡುಗೆಯವರು ತಮ್ಮ ಜೀವ ಉಳಿಸಿಕೊಳ್ಳಲು ಸ್ಥಳದಿಂದ ಜಾಗ ಖಾಲಿ ಮಾಡಿದ್ದಾರೆ. ಮನೆಗೆ ಬಂದ ಕೆಲ ನೆಂಟರು ಸಿಕ್ಕ ಸಿಕ್ಕ ಕಡೆ ಓಡಲಾರಂಭಿಸಿದ್ದಾರೆ. ಅಷ್ಟೋತ್ತಿಗೆ ಮನೆಯ ಒಳಗಿದ್ದ ವಧು ಮತ್ತು ವರನಿಗೆ ವಿಚಾರ ಗೊತ್ತಾಗಿದೆ ಇನ್ನು ಆನೆಗಳು ನಮ್ಮನ್ನು ಬಿಡುವುದಿಲ್ಲ ಎಂದು ಹೇಳಿ ಇಬ್ಬರು ಬೈಕ್ ಏರಿ ಸ್ಥಳದಿಂದ ಪರಾರಿಯಾಗಿದ್ದಾರೆ.

ಆನೆಗಳ ಉಪಟಳ ಇಂದು ನಿನ್ನೆಯದ್ದಲ್ಲ:
ಜಾರ್‌ಗ್ರಾಮ್‌ನ ಸುತ್ತಮುತ್ತಲ ಅರಣ್ಯ ಪ್ರದೇಶದಲ್ಲಿ 100 ಕ್ಕೂ ಹೆಚ್ಚು ಆನೆಗಳು ಸಂಚರಿಸುತ್ತಿರುವುದು ಇಲ್ಲಿನ ನಿವಾಸಿಗಳಲ್ಲಿ ಭಯವನ್ನು ಹುಟ್ಟುಹಾಕಿದೆ, ಅಲ್ಲದೆ ಜೊವಾಲ್‌ಬಂಗಾ, ಕಾಜ್ಲಾ, ಕುಸುಮ್‌ಗ್ರಾಮ್, ಝೋಬಾನಿ, ಆದಿಶೋಲ್ ಮತ್ತು ಕೊಲಬಾನಿ ಮುಂತಾದ ಪ್ರದೇಶಗಳಲ್ಲಿ ಆನೆಗಳ ಉಪಟಳ ಹೆಚ್ಚಾಗಿದೆ ಎಂದು ಇಲ್ಲಿನ ನಿವಾಸಿಗಳು ಬೇಸರ ವ್ಯಕ್ತಪಡಿಸಿದ್ದಾರೆ. ಇಲ್ಲಿನ ನಿವಾಸಿಗಳು ಮನೆಯಲ್ಲಿ ಅಡುಗೆ ಮಾಡಲು ಹೆದರುತ್ತಾರಂತೆ ಕಾರಣ ಅಡುಗೆಯ ಸುವಾಸನೆಗೆ ಆನೆಗಳು ಮನೆಯತ್ತ ಬರುತ್ತವೆ ಎಂಬ ಭಯದಿಂದ.

ಮದುವೆಯನ್ನು ಮುಂದೆ ಹಾಕಿದ ಕುಟುಂಬ
ಆನೆಗಳ ಉಪಟಳ ವಿಪರೀತವಾಗಿದ್ದು ಊರಿನಲ್ಲಿ ಸಮಾರಂಭ ನಡೆಸಲು ಜನ ಪಡುತ್ತಾರೆ, ಕಳೆದ ಭಾನುವಾರ ನಡೆದ ಘಟನೆ ನೆನೆದು ಊರಿನ ಕೆಲ ಕುಟುಂಬ ನಿಗಧಿಯಾಗಿದ್ದ ಮದುವೆಯನ್ನು ಮುಂದೂಡಿದ್ದಾರಂತೆ.

ಚುನಾವಣೆ ಮೇಲೂ ಪರಿಣಾಮ
ಇಲ್ಲಿ ಆನೆಗಳ ಹಾವಳಿ ಕೇವಲ ಮದುವೆಗೆ ಮಾತ್ರವಲ್ಲದೆ ಪಂಚಾಯತ್ ಚುನಾವಣೆಯ ಮೇಲೂ ಪರಿಣಾಮ ಬೀರಿದ್ದು ಪ್ರತಿ ಭಾರಿ ನಡೆಯುವ ಚುನಾವಣೆ ಸಮಯದಲ್ಲೂ ಆನೆಗಳು ತೊಂದರೆ ನೀಡುತ್ತದೆಯಂತೆ ಹಾಗಾಗಿ ಇಲ್ಲಿ ಚುನಾವಣಾ ಪ್ರಚಾರದಿಂದಲೂ ಅಭ್ಯರ್ಥಿಗಳು ದೂರ ಉಳಿಯುತ್ತಾರಂತೆ.

ಇದನ್ನೂ ಓದಿ: G20 ಶೃಂಗಸಭೆಯಲ್ಲಿ ಪುಟಿನ್ ಭಾಗಿಯಾಗುವುದನ್ನು ಎದುರು ನೋಡುತ್ತಿದ್ದೇವೆ: MEA