ಬ್ರಿಟನ್‌: ಲಾಕ್‌ಡೌನ್‌ ಸಡಿಲಿಕೆ ಮಾರ್ಗಸೂಚಿ ಶೀಘ್ರ

ಲಂಡನ್‌: ಬ್ರಿಟನ್‌ ಕೋವಿಡ್ ವೈರಸ್‌ನ ಉತ್ತುಂಗವನ್ನು ದಾಟಿದ್ದು, ಲಾಕ್‌ಡೌನ್‌ ನಿಯಮಾವಳಿ ಸಡಿಲಿಕೆಗೆ ಸರಕಾರವು ಮುಂದಿನವಾರ ಮಾರ್ಗಸೂಚಿಯನ್ನು ಪ್ರಕಟಿಸಲಿದೆ ಎಂದು ಪ್ರಧಾನಿ ಬೋರಿಸ್‌ ಜಾನ್ಸನ್‌ ಗುರುವಾರ ಹೇಳಿದ್ದಾರೆ.

ಬಿಳಿಯರಿಗೆ ಹೋಲಿಸಿದರೆ ಬ್ಲ್ಯಾಕ್‌ ಕೆರಿಬಿಯನ್‌ ಹಿನ್ನೆಲೆಯ ಹಾಗೂ ಧಾರ್ಮಿಕ ಅಲ್ಪಸಂಖ್ಯಾತ ಸಮುದಾಯಗಳಲ್ಲಿ ಕೋವಿಡ್ ಸಾವಿನ ಪ್ರಮಾಣ 1.7 ಪಟ್ಟು ಜಾಸ್ತಿ ಇರುವುದು ಅಧ್ಯಯನಗಳಿಂದ ಬಹಿರಂಗಗೊಂಡಿದೆ.

ಅಗತ್ಯ ವಸ್ತುಗಳು ಹಾಗೂ ಆಹಾರಕ್ಕಾಗಿ ಜನ ಫ‌ುಡ್‌ ಬ್ಯಾಂಕ್‌ಗಳಿಗೆ ಅವಲಂಬಿಸಿರುವುದು ಹೆಚ್ಚಿದೆ. ಇಂಗ್ಲಂಡ್‌ನ‌ ಅತಿ ದೊಡ್ಡ ಆಹಾರ ಅಭಿಯಾನವಾಗಿರುವ ದಿ ಟ್ರಸೆಲ್‌ ಟ್ರಸ್ಟ್‌ ಒಂದು ವಾರದ ಅವಧಿಯಲ್ಲಿ 50 ಸಾವಿರ ಆಹಾರ ಕಿಟ್‌ಗಳನ್ನು ವಿತರಿಸಿದೆ. ಸಾಮಾನ್ಯ ದಿನಗಳಿಗೆ ಹೋಲಿಸಿದರೆ ಇದು ಎರಡು ಪಟ್ಟು ಜಾಸ್ತಿ. ವಿಮಾನಯಾನ ಕ್ಷೇತ್ರದ ಪುನಶ್ಚೇತನಕ್ಕೂ ಪ್ರಯತ್ನಗ‌ಳು ನಡೆಯುತ್ತಿದ್ದು, ರಿಯಾನೈರ್‌ ಸಂಸ್ಥೆ 3,000 ಉದ್ಯೋಗಕ್ಕೆ ಕತ್ತರಿ ಹಾಕಲು ಮುಂದಾಗಿದೆ. ಜಾಗತಿಕವಾಗಿ ಲಾಕ್‌ಡೌನ್‌ ಘೋಷಣೆಯಾಗಿರುವ ಕಾರಣ ಬ್ರಿಟನ್‌ನ ಕೈಗಾರಿಕಾ ಉತ್ಪಾದನೆಗಳಿಗೆ ಬೇಡಿಕೆ ಕುಸಿದಿದೆ. ಈ ಸ್ಥಿತಿ ಸುಧಾರಿಸಲು ಇನ್ನೂ ಹಲವು ತಿಂಗಳು ಹಿಡಿಯಬಹುದು ಎಂದು ಅಂದಾಜಿಸಲಾಗಿದೆ.