Brahmavar: ಬಸ್‌ನಿಂದ ರಸ್ತೆಗೆ ಬಿದ್ದ ಕಂಡಕ್ಟರ್‌

ಬ್ರಹ್ಮಾವರ: ಚಲಿಸುತ್ತಿದ್ದ ಬಸ್‌ನಿಂದ ರಸ್ತೆಗೆ ಬಿದ್ದು ಕಂಡಕ್ಟರ್‌ ತೀವ್ರ ಗಾಯಗೊಂಡ ಘಟನೆ ಉಪ್ಪೂರು ಬಳಿ ನಡೆದಿದೆ.

ಉಡುಪಿಯಿಂದ ಕುಂದಾಪುರಕ್ಕೆ ತೆರಳುತ್ತಿದ್ದ ಖಾಸಗಿ ಬಸ್‌ನ್ನು ಚಾಲಕ ಒಮ್ಮೆಲೆ ಬಲ ಭಾಗದಿಂದ ಎಡಕ್ಕೆ ತಿರುಗಿಸಿದ ಪರಿಣಾಮ ಹಿಂಬದಿಯ ಪ್ರಯಾಣಿಕರ ಸೀಟಿನ ಬಳಿ ಟಿಕೆಟ್‌ ನೀಡುತ್ತಿದ್ದ ಕಂಡಕ್ಟರ್‌ ನಾಗರಾಜ ಅವರು ನಿಯಂತ್ರಣ ತಪ್ಪಿ ಫುಟ್‌ಬೋರ್ಡ್‌ ಮೇಲೆ ಬಿದ್ದು ಅಲ್ಲಿಂದ ರಸ್ತೆಗೆ ಬಿದ್ದರು.

ತತ್‌ಕ್ಷಣ ಪ್ರಯಾಣಿಕರು ಕಿರುಚಿಕೊಂಡಾಗ ಚಾಲಕ ಬಸ್‌ನ್ನು ನಿಲ್ಲಿಸಿದ್ದಾನೆ. ರಸ್ತೆಯಲ್ಲಿ ಬಿದ್ದಿದ್ದ ನಾಗರಾಜ ಅವರನ್ನು ಕೂಡಲೇ ಪ್ರಯಾಣಿಕರು ಉಪಚರಿಸಿದರು. ತಲೆಗೆ ತೀವ್ರ ಹಾಗೂ ಇತರೆಡೆ ತರಚಿದ ಗಾಯಗಳಾದ ಅವರನ್ನು ಬ್ರಹ್ಮಾವರದ ಖಾಸಗಿ ಆಸ್ಪತ್ರೆಗೆ ಬಳಿಕ ಹೆಚ್ಚಿನ ಚಿಕಿತ್ಸೆಗೆ ಮಣಿಪಾಲ ಆಸ್ಪತ್ರೆಗೆ ದಾಖಲಿಸಲಾಯಿತು.

ಬ್ರಹ್ಮಾವರ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.