Boxing; ಪಂಘಲ್‌, ಜೈಸ್ಮಿನ್‌ಗೆ ಪ್ಯಾರಿಸ್‌ ಒಲಿಂಪಿಕ್ಸ್‌  ಅರ್ಹತೆ

ಬ್ಯಾಂಕಾಕ್‌: ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿ ಬೆಳ್ಳಿ ಪದಕ ಗೆದ್ದಿದ್ದ ಭಾರತದ ಬಾಕ್ಸರ್‌ ಅಮಿತ್‌ ಪಂಘಲ್‌ (51 ಕೆಜಿ) ಪ್ಯಾರಿಸ್‌ ಒಲಿಂಪಿಕ್ಸ್‌ಗೆ ಅರ್ಹತೆ ಪಡೆದಿದ್ದಾರೆ. ಅವರು ಬ್ಯಾಂಕಾಕ್‌ನಲ್ಲಿ ನಡೆಯುತ್ತಿರುವ 2ನೇ ವಿಶ್ವ ಬಾಕ್ಸಿಂಗ್‌ ಅರ್ಹತಾ ಕೂಟದ ಸೆಮಿಫೈನಲ್‌ನಲ್ಲಿ ಜಯ ಸಾಧಿಸಿದರು. ಮಹಿಳೆಯರ 57 ಕೆಜಿ ವಿಭಾಗದಲ್ಲಿ ಜೈಸ್ಮಿನ್‌ ಲಂಬೋರಿಯ ಅವರಿಗೂ ಪ್ಯಾರಿಸ್‌ ಪ್ರವೇಶ ಸಿಕ್ಕಿದೆ. ಇದು ಭಾರತಕ್ಕೆ ಲಭಿಸಿದ 5ನೇ ಒಲಿಂಪಿಕ್‌ ಕೋಟಾ ಆಗಿದೆ.

ಪುರುಷರ ಕ್ವಾರ್ಟರ್‌ ಫೈನಲ್‌ನಲ್ಲಿ ಪಂಘಲ್‌ ಚೀನದ ಚುವಾಂಗ್‌ ಲಿಯು ವಿರುದ್ಧ 5-0 ಅಂತರದಿಂದ ಜಯ ಗಳಿಸಿದರು. ಮಹಿಳಾ ಕ್ವಾರ್ಟರ್‌ ಫೈನಲ್‌ನಲ್ಲಿ ಜೈಸ್ಮಿನ್‌ ಮಾಲಿಯ ಮರಿನ್‌ ಕ್ಯಾಮರಾ ವಿರುದ್ಧ ಗೆಲುವು ದಾಖಲಿಸಿದರು. 60 ಕೆಜಿಯಲ್ಲಿ ಸ್ಪರ್ಧಿಸುತ್ತಿದ್ದ ಜೈಸ್ಮಿನ್‌, ಕಳೆದ ತಿಂಗಳು ಉದ್ದೀಪನಾ ಪರೀಕ್ಷೆ ವಿಚಾರವಾಗಿ ಪರ್ವೀನ್‌ ಹೂಡಾ ಅಮಾನತಾಗಿದ್ದರಿಂದ, ಅವರ 57 ಕೆಜಿ ವಿಭಾಗದಲ್ಲಿ ಸ್ಪರ್ಧಿಸಿ ಈ ಅರ್ಹತೆ ಪಡೆದಿದ್ದಾರೆ.