ಲಾಜ್‌ನಲ್ಲಿ ಕತ್ತು ಕೊಯ್ದು ಕೊಲೆಗೈಯಲಾದ ಮಹಿಳೆಯ ಶವ ಪತ್ತೆ

ರಾಮೇಶ್ವರ : ಕುತ್ತಿಗೆ ಕೊಯ್ದು ಕೊಲೆಗೈಯಲಾದ ಮಹಿಳೆಯೋರ್ವಳ ಶವ ಇಲ್ಲಿನ ಲಾಜಿಂಗ್‌ ರೂಮ್‌ ಒಂದರಲ್ಲಿ ಪತ್ತೆಯಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ನಿನ್ನೆ ರಾತ್ರಿಯಷ್ಟೇ ಈ ಮಹಿಳೆ, ಆಕೆಯ ಪತಿ ಎಂದು ನಂಬಲಾದ ಒಬ್ಬ ಪುರುಷ ಹಾಗೂ ಒಂದು ವರ್ಷದ ಮಗುವಿನೊಂದಿಗೆ ಈ ಹೊಟೇಲಿಗೆ ಬಂದು ರೂಮ್‌ ಹಿಡಿದುಕೊಂಡಿದ್ದರು. 

ಮಹಿಳೆಯೊಂದಿಗಿದ್ದ ಪುರುಷನು ಮಗವನ್ನು ತನ್ನ ಜತೆಗೆ ಒಯ್ದು ಪರಾರಿಯಾಗಿದ್ದಾನೆ. ಲಾಜ್‌ನ ಮಾಲೀಕರು ಪೊಲೀಸರಲ್ಲಿ ದೂರು ನೀಡಿದ್ದಾರೆ.

ಪೊಲೀಸರು ಲಾಜ್‌ ರೂಮಿನ ಬಾಗಿಲು ಒಡೆದು ಒಳ ಪ್ರವೇಶಿಸಿದಾಗಲೇ ಅವರಿಗೆ ಕತ್ತು ಕೊಯ್ದು ಕೊಲೆಗೀಡಾದ ಮಹಿಳೆಯ ಶವ ಕೋಣೆಯಲ್ಲಿ ಬಿದ್ದುಕೊಂಡಿದ್ದುದು ಪತ್ತೆಯಾಯಿತು.

ಪೊಲೀಸರು ಕೇಸು ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ.