BJP:ಸದಸ್ಯತ್ವ ಅಭಿಯಾನ; ಬಿ.ಎಲ್‌.ಸಂತೋಷ್‌ ಖುಷಿ

ಬೆಂಗಳೂರು: ರಾಜ್ಯದಲ್ಲಿ ಬಿಜೆಪಿ ಸದಸ್ಯತ್ವ ಅಭಿಯಾನ ಪ್ರಕ್ರಿಯೆ ವರಿಷ್ಠರ ಮೆಚ್ಚುಗೆಗೆ ಪಾತ್ರವಾಗಿದ್ದು, 50 ಲಕ್ಷ ಸದಸ್ಯತ್ವ ನೋಂದಣಿಯಾಗಿರುವ ಬಗ್ಗೆ ಬಿಜೆಪಿ ರಾಷ್ಟ್ರೀಯ ಸಂಘಟನ ಪ್ರಧಾನ ಕಾರ್ಯದರ್ಶಿ ಬಿ.ಎಲ್‌.ಸಂತೋಷ್‌ ಟ್ವೀಟ್‌ ಮಾಡಿ ಶ್ಲಾಘಿಸಿದ್ದಾರೆ.

ಒಟ್ಟು 50 ಲಕ್ಷ ಸದಸ್ಯತ್ವ ನೋಂದಣಿಯಾಗಿದ್ದು, 5 ಲಕ್ಷ ಜನರು ಮಿಸ್‌ಕಾಲ್‌ ಮೂಲಕ ಹೆಸರು ನೋಂದಾಯಿಸಿಕೊಂಡಿದ್ದಾರೆ.

ಬೆಂಗಳೂರಿನ 3 ಕ್ಷೇತ್ರಗಳು ಟಾಪ್‌ ಫೈವ್‌ ಪಟ್ಟಿಗೆ
ಬಿಜೆಪಿ ಸದಸ್ಯತ್ವ ಅಭಿಯಾನದಲ್ಲಿ ಕರ್ನಾಟಕವು ರಾಷ್ಟ್ರ ಮಟ್ಟದಲ್ಲಿ 3ನೇ ಸ್ಥಾನ ಪಡೆದಿದ್ದು, ರಾಜ್ಯದ ಟಾಪ್‌ 5 ಕ್ಷೇತ್ರಗಳಲ್ಲಿ ಯಲಹಂಕ, ಮಹದೇವಪುರ, ಹಾಸನ (ನಗರ), ಬೆಂಗಳೂರು ದಕ್ಷಿಣ ಹಾಗೂ ಔರಾದ್‌ ಕ್ಷೇತ್ರಗಳು ಸ್ಥಾನ ಪಡೆದಿವೆ. ರಾಷ್ಟ್ರಮಟ್ಟದಲ್ಲಿ ಉತ್ತರ ಪ್ರದೇಶ, ಗುಜರಾತ್‌ ಹಾಗೂ ಕರ್ನಾಟಕ 50 ಲಕ್ಷ ಮೇಲ್ಪಟ್ಟು ನೋಂದಣಿ ಮಾಡಿವೆ.

ರಾಜ್ಯದಲ್ಲಿ ಸೆ. 4ರಿಂದ ಅಭಿಯಾನ ಪ್ರಾರಂಭವಾಗಿದ್ದು, ಸಂಸದ ಪಿ.ಸಿ.ಮೋಹನ್‌ ಹಾಗೂ ರಾಜ್ಯ ಪ್ರಧಾನ ಕಾರ್ಯದರ್ಶಿ ನಂದೀಶ್‌ ರೆಡ್ಡಿ ಉಸ್ತುವಾರಿಗಳಾಗಿದ್ದರು. ಕಳಪೆ ಸದಸ್ಯತ್ವ ಮಾಡಿದ 5 ಕ್ಷೇತ್ರಗಳಲ್ಲಿ ಚಿಕ್ಕನಾಯಕನಹಳ್ಳಿ, ದೇವದುರ್ಗ, ನಾಗಮಂಗಲ, ಪಾವಗಡ ಹಾಗೂ ಅರಕಲಗೂಡು ಸೇರಿದೆ.