ಬಿಟ್‌ಕಾಯಿನ್‌ ಕಳ್ಳತನ: ದೂರು

ನವದೆಹಲಿ: ಭಾರತದಲ್ಲಿ ಬಿಟ್‌ಕಾಯಿನ್‌ (ಡಿಜಿಟಲ್‌ ಕರೆನ್ಸಿ) ವಿನಿಮಯ ವ್ಯವಹಾರ ನಡೆಸುತ್ತಿರುವ ಹಾಗೂ ಆ ಕ್ಷೇತ್ರದಲ್ಲಿ ದೈತ್ಯ ಕಂಪನಿಯಾದ “ಕಾಯಿನ್‌ಸೆಕ್ಯೂರ್‌’ನ ಡಿಜಿಟಲ್‌ ವ್ಯಾಲೆಟ್‌ನಿಂದ ಸುಮಾರು 19 ಕೋಟಿ ರೂ. ಮೌಲ್ಯದಷ್ಟು ಬಿಟ್‌ಕಾಯಿನ್‌ ಕಳುವಾಗಿದೆ ಎಂದು ಸಂಸ್ಥೆ ಪ್ರಕಟಿಸಿದೆ. 

ತನ್ನ ಜಾಲತಾಣದ ಮುಖಪುಟದಲ್ಲೇ ಈ ವಿಚಾರ ಪ್ರಕಟಿಸಿರುವ ಸಂಸ್ಥೆ, ಈ ಕಳುವಿಗೆ ತನ್ನಲ್ಲಿ ಸಿಎಸ್‌ಒ ಆಗಿ ಸೇವೆ ಸಲ್ಲಿಸುತ್ತಿರುವ ಅಮಿತಾಭ್‌ ಸೆಕ್ಸೇನಾ ಅವರೇ ಕಾರಣ ಎಂದು ದೂರಿದೆ.  ದೆಹಲಿ ಸೈಬರ್‌ ಕ್ರೈಂ ಪ್ರಕರಣ ದಾಖಲಾಗಿದೆ. ದೂರಿನಲ್ಲಿ ಅಮಿತಾಭ್‌ ಸೆಕ್ಸೇನಾ ಅವರು, ಕಂಪನಿಯ ವ್ಯಾಲೆಟ್‌ನಿಂದ  438.318 ಬಿಟ್‌ಕಾಯಿನ್‌ಗಳು (19 ಕೋಟಿ ರೂ. ಮೌಲ್ಯದ) ಕಳುವಾಗಿವೆ ಎಂದು ಏ. 8ರಂದು ಸಂಸ್ಥೆಗೆ ತಿಳಿಸಿದ್ದಾರೆ. ಇದಕ್ಕೆ ಸೈಬರ್‌ ಆಕ್ರಮಣ ಎಂದೂ ಅವರು ತಿಳಿಸಿದ್ದಾರೆ. ಆದರೆ, ಕಂಪನಿಗೆ ಸೆಕ್ಸೇನಾ ಅವರ ಮೇಲೆಯೇ ಅನುಮಾನವಿದೆ ಎಂದು “ಕಾಯಿನ್‌ಸೆಕ್ಯೂರ್‌’ ಹೇಳಿದೆ. ಕಂಪನಿಯ ವ್ಯವಸ್ಥಾಪಕ ನಿರ್ದೇಶಕ ಮೋಹಿತ್‌ ಕಾರ್ಲಾ, ಸೆಕ್ಸೇನಾ ಅವರು ದೇಶಬಿಟ್ಟು ಓಡಿಹೋಗುವ ಅಪಾಯವಿದ್ದು, ಕೂಡಲೇ ಅವರ ಪಾಸ್‌ಪೋರ್ಟ್‌ ವಶಕ್ಕೆ ಪಡೆಯಬೇಕು ಎಂದು ಮನವಿ ಮಾಡಿದ್ದಾರೆ.