Road Mishap; ಬೈಕ್‌ ಅಪಘಾತ ಸವಾರ ಸಾವು

ಅಜೆಕಾರು: ಮುನಿಯಾಲು ಚಟ್ಕಲ್‌ ಪಾದೆ ಬಳಿ ಎರಡು ಬೈಕ್‌ಗಳ ನಡುವೆ ನಡೆದ ಮುಖಾಮುಖಿ ಅಪಘಾತದಲ್ಲಿ ಓರ್ವ ಬೈಕ್‌ ಸವಾರ ಗಂಭೀರ ಗಾಯಗೊಂಡು ಸಾವನ್ನಪ್ಪಿದ್ದಾರೆ. ಇನ್ನೋರ್ವ ಬೈಕ್‌ ಸವಾರ ಗಂಭೀರ ಗಾಯಗೊಂಡಿದ್ದಾರೆ.

ಮೂಲತಃ ಅಂಡಾರು ನಿವಾಸಿ ಪ್ರಸ್ತುತ ಮುದ್ರಾಡಿ ಉಪ್ಪಳದವರಾದ ಭಾಸ್ಕರ್‌ಶೆಟ್ಟಿ ಅವರು ತನ್ನ ಮೂಲ ಮನೆ ಅಂಡಾರಿಗೆ ಬೈಕ್‌ನಲ್ಲಿ ಬರುವ ಸಂದರ್ಭ ಕಾರ್ಕಳ ಕಡೆಯಿಂದ ಶಿಕಾರಿಪುರದ ಕಡೆ ತೆರಳುತ್ತಿದ್ದ ಬೈಕ್‌ ನಡುವೆ ಅಪಘಾತ ನಡೆದಿದ್ದು ಭಾಸ್ಕರ್‌ಶೆಟ್ಟಿ (53) ಗಂಭೀರ ಗಾಯಗೊಂಡು ಆಸ್ಪತ್ರೆಗೆ ಕರೆದುಕೊಂಡು ಹೋಗುವ ವೇಳೆ ಮೃತಪಟ್ಟಿದ್ದಾರೆ.

ಭಾಸ್ಕರ್‌ಶೆಟ್ಟಿ ಮುಂಬಯಿಯಲ್ಲಿ ಉದ್ಯೋಗದಲ್ಲಿದ್ದು ಮೇ 11ರಂದು ಊರಿಗೆ ಬಂದಿದ್ದು ಮೇ 12ರಂದು ಪತ್ನಿ, ಮಕ್ಕಳು ಹಾಗೂ ಸಹೋದರನ ಜತೆಗೂಡಿ ಕಟೀಲು ದೇವಸ್ಥಾನಕ್ಕೆ ತೆರಳಿ ಮನೆಗೆ ವಾಪಸ್ಸಾಗಿದ್ದರು. ಅನಂತರ ಸಂಜೆ ವೇಳೆ ತನ್ನ ಮೂಲ ಮನೆಗೆ ಬೈಕ್‌ ನಲ್ಲಿ ತೆರಳುತ್ತಿದ್ದ ವೇಳೆ ಅಪಘಾತವಾಗಿದೆ.ಮೃತರು ಪತ್ನಿ, ಪುತ್ರ ಮತ್ತು ಪುತ್ರಿಯನ್ನು ಅಗಲಿದ್ದಾರೆ.