ಬಿಕರ್ನಕಟ್ಟೆ : ಬಾಲಯೇಸು ಪುಣ್ಯಕ್ಷೇತ್ರದ ವಾರ್ಷಿಕ ಮಹೋತ್ಸವ

ಮಂಗಳೂರು: ಬಿಕರ್ನಕಟ್ಟೆಯ ಬಾಲಯೇಸು ಪುಣ್ಯಕ್ಷೇತ್ರದಲ್ಲಿ “ಆಂತರಿಕ ವಿಮೋಚನೆ ಪಡೆಯೋಣ, ಫಲಭರಿತ ಜೀವನ ನಡೆಸೋಣ’ ಎಂಬ ಸಂದೇಶದೊಂದಿಗೆ ಎರಡು ದಿನಗಳ ವಾರ್ಷಿಕ ಮಹೋತ್ಸವ ರವಿವಾರ ಆರಂಭಗೊಂಡಿದ್ದು, ಸಂಜೆ 6 ಗಂಟೆಗೆ ನಡೆದ ದಿವ್ಯ ಬಲಿ ಪೂಜೆಯಲ್ಲಿ ಲಕ್ನೋ ಧರ್ಮಪ್ರಾಂತದ ಬಿಷಪ್‌ ರೈ| ರೆ| ಡಾ| ಜೆರಾಲ್ಡ್‌ ಜೆ. ಮಥಾಯಸ್‌ ಅವರು ಪ್ರಧಾನ ಗುರುಗಳಾಗಿ ಭಾಗವಹಿಸಿದ್ದರು. ಮಂಗಳೂರು ಆಸುಪಾಸಿನ ಹಲವಾರು ಮಂದಿ ಧರ್ಮಗುರುಗಳು ಸಹಭಾಗಿಗಳಾದರು.

ಬಿಷಪ್‌ ರೈ| ರೆ| ಡಾ| ಜೆರಾಲ್ಡ್‌ ಜೆ. ಮಥಾಯಸ್‌ ಅವರು ತಮ್ಮ ಸಂದೇಶದಲ್ಲಿ ಬಾಲ ಯೇಸುವಿನ ಭಕ್ತಿ ಆಚರಣೆಯ ಉಗಮವನ್ನು ವಿವರಿಸಿ ಬಾಲಯೇಸುವಿಗೆ ವಿಶೇಷ ಭಕ್ತಿಯನ್ನು ಅರ್ಪಿಸಿದ ಕೆಲವರಿಗೆ ಸಂತ ಪದವಿ ಕೂಡ ಪ್ರಾಪ್ತಿಯಾಗಿದೆ ಎಂದರು.

ಕಿನ್ನಿಗೋಳಿಯ ಸೈಂಟ್‌ ಮೇರೀಸ್‌ ಶಾಲೆಯ ಪ್ರಾಂಶುಪಾಲ ಫಾ| ಸುನಿಲ್‌ ಪಿಂಟೊ ಪ್ರವಚನ ನೀಡಿದರು. ಬಾಲಯೇಸು ಪುಣ್ಯಕ್ಷೇತ್ರದ ನಿರ್ದೇಶಕ ಫಾ| ವಿಲ್ಫೆಡ್‌, ಫಾ| ಪ್ರಕಾಶ್‌ ಡಿ’ಕುನ್ಹಾ, ಫಾ| ಪಿಯುಸ್‌ ಜೇಮ್ಸ್‌ ಡಿ’ಸೋಜಾ ಅವರು ಉಪಸ್ಥಿತರಿದ್ದರು.

ಸೋಮವಾರ ಬೆಳಗ್ಗೆ 10.30ಕ್ಕೆ ನಡೆಯುವ ಹಬ್ಬದ ಸಂಭ್ರಮದ ಬಲಿಪೂಜೆಯ ನೇತೃತ್ವವನ್ನು ಮಂಗಳೂರು ಧರ್ಮಪ್ರಾಂತದ ಬಿಷಪ್‌ ರೈ| ರೆ| ಡಾ| ಅಲೋಶಿಯಸ್‌ ಪಾವ್‌ ಡಿ’ಸೋಜಾ ವಹಿಸ‌ಲಿದ್ದಾರೆ. ಸೋಮವಾರ ಬೆಳಗ್ಗೆ 6.30, 7.30, 9ಕ್ಕೆ  ಮತ್ತು ಮಧ್ಯಾಹ್ನ 12 ಗಂಟೆಗೆ (ಕನ್ನಡದಲ್ಲಿ) ಬಲಿ ಪೂಜೆ, ಸಂಜೆ 5ಕ್ಕೆ ಆಂತರಿಕ ಅಸ್ವಸ್ಥತಾ ಪ್ರಾರ್ಥನೆ, 6ಕ್ಕೆೆ ಬಲಿ ಪೂಜೆ ಮತ್ತು 7.15ಕ್ಕೆ ಪರಮ ಪ್ರಸಾದ ಮೆರವಣಿಗೆ ನಡೆಯಲಿದೆ.