BBK11: ಚೈತ್ರಾ ಅಭಿನಯ ‌ಕಂಡು‌ ಮೂಕವಿಸ್ಮಿತರಾದ ಮನೆಮಂದಿ

ಬೆಂಗಳೂರು: ಮಹಾರಾಜ- ಯುವರಾಣಿ ಕಪಿಮುಷ್ಠಿಯಲ್ಲಿ ಈ ವಾರ ಬಿಗ್ ಮನೆಯ ಆಟ ಸಾಗಿದೆ.

ರಾಜ ಮನೆತನದ ವಿರುದ್ಧ ಸ್ಪರ್ಧಿಗಳು ರೊಚ್ಚಿಗೆದ್ದಿದ್ದಾರೆ. ನಾವೆಲ್ಲರೂ ಜತೆ ಸೇರಿ ನಮ್ಮದೇ ಸಾಮ್ರಾಜ್ಯವನ್ನು ಕಟ್ಟುವ ಎಂದು ಧ್ವನಿಗೂಡಿಸಿದ್ದಾರೆ.

ರಾಣಿ – ಮಹಾರಾಜರನ್ನು ಸರಪಳಿಯಲ್ಲಿ ಸುತ್ತಿ ಬಂಧನದಲ್ಲಿ ‌ಇರಿಸಲಾಗಿದೆ. ಆಯಾ ಬಣದ ಪ್ರಜೆಗಳು ರಾಜ – ಯುವರಾಣಿಯನ್ನು ರಕ್ಷಣೆ ಮಾಡುವ ಟಾಸ್ಕ್ ವೊಂದನ್ನು ಮನೆ ಮಂದಿಗೆ ನೀಡಲಾಗಿದೆ. ಈ ಟಾಸ್ಕ್ ಗೆಲ್ಲುವ ತಂಡ ಕ್ಯಾಪ್ಟನ್ಸಿ ಆಟಕ್ಕೆ ಆಯ್ಕೆ ಆಗಲಿದೆ.

ಕಣ್ಣಿಗೆ ಬಟ್ಟೆ ಕಟ್ಟಿ, ನೀಲಾ ನಕ್ಷೆಯನ್ನು ಬಿಡಿಸಿಕೊಂಡು ಈ ಟಾಸ್ಕ್ ನ್ನು ಮಹಾರಾಜ ಮಂಜು ಅವರ ಬಣ ಗೆದ್ದುಕೊಂಡಿದೆ. ಗೆದ್ದ ಬಳಿಕ ಮಹಾರಾಜ ಮಂಜು ಅವರಿಗೆ ಪ್ರಜೆಗಳು ಜೈಕಾರ ಹಾಕಿದ್ದಾರೆ.

ಚೈತ್ರಾ ಅಭಿಮನ್ಯುಗಾಗಿ‌ ಕೃಷ್ಣ(ಶಿಶಿರ್) ಅವರ ಮುಂದೆ ಉತ್ತರೆಯಾಗಿ‌ ಮಾಡಿದ ಅಭಿನಯ ನೋಡಿ ಮನೆಮಂದಿ ಮೂಕವಿಸ್ಮಿತರಾಗಿದ್ದಾರೆ.

ವಾರದ ಕ್ಯಾಪ್ಟನ್ಸಿ ಟಾಸ್ಕ್‌ 6 ಅಭ್ಯರ್ಥಿಗಳ ನಡುವೆ ನಡೆದಿದೆ. ಒಂದು ಪಂಗಡ ಗೌತಮಿ ಹಾಗೂ ಮಂಜು ಅವರನ್ನು ಕ್ಯಾಪ್ಟನ್ಸಿ ಓಟದಿಂದ ಆಚೆ ಇಡಬೇಕೆಂದು ಸಂಚು ರೂಪಿಸಿದ್ದಾರೆ.

ಕ್ಯಾಪ್ಟನ್ಸಿ ಓಟದಿಂದ ಮೊದಲು ಗೌತಮಿ ಅವರು ಆಚೆ ಬಿದ್ದಿದ್ದಾರೆ. ಎರಡನೇ ಅವರಾಗಿ ಮಂಜು ಅವರು ಆಚೆ ಬಂದಿದ್ದಾರೆ. ಆ ಬಳಿಕ ಭವ್ಯ ಆಚೆ ಬಂದಿದ್ದಾರೆ.

ಐಶ್ವರ್ಯಾ, ಸುರೇಶ್ ಹಾಗೂ ಧನರಾಜ್ ಅವರ ಪೈಕಿ ಧನರಾಜ್ ಅವರು ಈ ವಾರ ಮನೆ ಕ್ಯಾಪ್ಟನ್ ಆಗಿ ಆಯ್ಕೆಯಾಗಿದ್ದಾರೆ.

ಮೊದಲ ಬಾರಿ ಕ್ಯಾಪ್ಟನ್ ಆದ ಧನರಾಜ್ ಅವರನ್ನು ತಲೆಯಮೇಲೆ ಹೊತ್ತು‌ ಹನುಮಂತು ಸಂಭ್ರಮಿಸಿದ್ದಾರೆ‌.

ಇನ್ನೊಂದು ಕಡೆ ಸುರೇಶ್ ಅವರು ಎಲ್ಲರೂ ಟಾರ್ಗೆಟ್ ಮಾಡಿ ಆಡಿದ್ದಾರೆ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಕಳಪೆ ಪಟ್ಟಿಯಿಂದ ಜೈಲು: ಕಣ್ಣೀರಿಟ್ಟ ಶೋಭಾ:
ಶೋಭಾ ಶೆಟ್ಟಿ ಅವರಿಗೆ ಕಳಪೆ ಪಟ್ಟಿ ಸಿಕ್ಕಿದೆ. ಕ್ಯಾಪ್ಟನ್ ಧನರಾಜ್ ಅವರಿಗೆ ಈ ವಾರದ ಉತ್ತಮ ಹಾಗೂ ಕಳಪೆ ನೀಡುವ ಅಧಿಕಾರವನ್ನು ನೀಡಲಾಗಿದೆ. ಅದರಂತೆ ಧನರಾಜ್ ಅವರು ಶೋಭಾ ಅವರಿಗೆ ಕಳಪೆ ಪಟ್ಟವನ್ನು ನೀಡಿದ್ದಾರೆ.

ಈ ವಾರ ನಿಮ್ಮ ಆ್ಯಕ್ಟಿವಿಟಿ ಅಷ್ಟಾಗಿ ಕಂಡಿಲ್ಲವೆನ್ನುವ ಕಾರಣವನ್ನು ನೀಡಿದ್ದಾರೆ. ಇದಕ್ಕೆ ಶೋಭಾ ನೀವು ಯಾಕೆ ನನ್ನನ್ನು ಟಾರ್ಗೆಟ್ ಮಾಡುತ್ತಿದ್ದೀರಿ. ಲೈಫ್ ಅಲ್ಲಿ ಏನೇನೂ ಫೇಸ್ ಮಾಡಿದ್ದೀನಿ 24 ಗಂಟ ಜೈಲು ಅಲ್ಲಿರೋದು ದೊಡ್ಡ ವಿಷ್ಯವಲ್ಲವೆಂದು ಕಣ್ಣೀರಿಡುತ್ತಲೇ ಜೈಲಿನೊಳಗೆ ಹೋಗಿದ್ದಾರೆ .