ಮುಂಬಯಿ : ರಿಲಯನ್ಸ್‌ ಜಿಯೋ ಗೆ ಸಡ್ಡು ಹೊಡೆದಿರುವ ಭಾರ್ತಿ ಏರ್‌ಟೆಲ್‌ ಈಗ ತನ್ನ ಗ್ರಾಹಕರಿಗೆ ಹೊಸ ಬಂಪರ್‌ ಕೊಡುಗೆಯನ್ನು ನೀಡಿದೆ. ಏರ್‌ಟೆಲ್‌ 4ಜಿ ನೆಟ್‌ವರ್ಕ್‌ ಗೆ ಶಿಫ್ಟ್ ಆಗುವ ಗ್ರಾಹಕರಿಗೆ 12 ತಿಂಗಳ ಫ್ರೀ ಡಾಟಾ ಕೊಡುಗೆಯನ್ನು ಭಾರ್ತಿ ಏರ್‌ಟೆಲ್‌ ನೀಡಿದೆ !
ನಾಳೆ ಜನವರಿ 4, 2017ರಂದು ಆರಂಭಗೊಳ್ಳುವ ಈ ಆಫ‌ರ್‌, ಫೆಬ್ರವರಿ 28, 2017ರಂದು ಮುಗಿಯಲಿದೆ. ದೇಶಾದ್ಯಂತದ ಏರ್‌ಟೆಲ್‌ ಗ್ರಾಹಕರಿಗೆ ಈ ಕೊಡುಗೆ ಲಭ್ಯವಿದೆ. ಇದೇ ವೇಳೆ ಏರ್‌ಟೆಲ್‌ ತನ್ನ ಹೊಸ 4ಜಿ ಗ್ರಾಹಕರಿಗೆ ಒಂದು ವರ್ಷದ ಮಟ್ಟಿಗೆ ತಿಂಗಳಿಗೆ 3ಜಿಬಿ ಉಚಿತ ಡಾಟಾ ನೀಡಲಿದೆ.
ರಿಲಯನ್ಸ್‌ ಜಿಯೋ “ಹ್ಯಾಪಿ ನ್ಯೂ ಇಯರ್‌’ ಆಫ‌ರ್‌ ಆರಂಭಿಸಿದ ಕೆಲವೇ ದಿನಗಳ ಬಳಿಕ ಭಾರ್ತಿ ಏರ್‌ಟೆಲ್‌ ತನ್ನ ಈ ಹೊಸ ಬಂಪರ್‌ ಕೊಡುಗೆಯನ್ನು ಘೋಷಿಸಿರುವುದು ಗಮನಾರ್ಹವಾಗಿದೆ.
ಈ ಉಚಿತ ಕೊಡುಗೆಯಲ್ಲಿ ಗ್ರಾಹಕರಿಗೆ ಫ್ರೀ ವಾಯ್ಸ ಕಾಲಿಂಗ್‌, ವಿಡಿಯೋ ಕಾಲಿಂಗ್‌, ಡಾಟಾ ಮತ್ತು ಮೆಸೇಜಿಂಗ್‌ ಲಭ್ಯವಿರುತ್ತದೆ. ಆದರೆ ದಿನದ ಮಟ್ಟಿಗೆ ಡಾಟಾ ಬಳಕೆಯನ್ನು 1 ಜಿಬಿಗೆ ಇಳಿಸಲಾಗಿದೆ.
ಈ ಮೊದಲು ರಿಲಯನ್ಸ್‌ ಜಿಯೊ ವೆಲ್‌ಕಂ ಆಫ‌ರ್‌ನಲ್ಲಿ ಗ್ರಾಹಕರಿಗೆ ದಿನವಹಿ ಉಚಿತ ಬಳಕೆ ನೀತಿಯಡಿ 4ಜಿಬಿ ಪರಿಮಿತಿಯನ್ನು ನೀಡಲಾಗಿತ್ತು. ಈಗ ಹೊಸ ನಿಯಮಗಳ ಪ್ರಕಾರ ಗ್ರಾಹಕರಿಗೆ ದಿನವಹಿ ಡಾಟಾ ಪರಿಮಿತಿಯು 1 ಜಿಬಿ ಆಗಿರುತ್ತದೆ. ಅಂತೆಯೇ ಅದರ ವೇಗ ಕೂಡ 128 ಕೆಬಿಪಿಎಸ್‌ಗೆ ತನ್ನಿಂತಾನೇ ಇಳಿಯುತ್ತದೆ.
