Bengaluru: 3 ನಾಯಿಗಳನ್ನು ಕಾರಿನ ಟಾಪ್‌ನಲ್ಲಿ ಕೂರಿಸಿ ಹುಚ್ಚಾಟ: ಮಾಲಿಕನ ಬಂಧನ

ಬೆಂಗಳೂರು: ಯಾವುದೇ ಸುರಕ್ಷತಾ ಕ್ರಮವಿಲ್ಲದೇ 3 ನಾಯಿಗಳನ್ನು ಕಾರಿನ ಟಾಪ್‌ ಮೇಲೆ ಕೂರಿಸಿಕೊಂಡು ಹುಚ್ಚಾಟ ಮೆರೆದಿದ್ದ ಆರೋಪಿ ಯನ್ನು ಬಾಣಸವಾಡಿ ಠಾಣೆ ಪೊಲೀಸರು ಬಂಧಿಸಿದ್ದಾರೆ. ಹರೀಶ್‌ (36) ಬಂಧಿತ ಆರೋಪಿ.

ಬಾಣಸವಾಡಿಯ ಕಲ್ಯಾಣನಗರ ಸಮೀಪ ಇತ್ತೀಚೆಗೆ ರಾತ್ರಿ ಹೊತ್ತಿನಲ್ಲಿ ಆರೋಪಿ ಹರೀಶ್‌ ಯಾವುದೇ ಮುಂಜಾಗ್ರತ ಕ್ರಮವಿಲ್ಲದೇ 3 ನಾಯಿಗಳನ್ನು ತಮ್ಮ ಸ್ಪಿಫ್ಟ್ ಕಾರಿನ ಟಾಪ್‌ ಮೇಲೆ ಕೂರಿಸಿಕೊಂಡು ಅಡ್ಡಾದಿಡ್ಡಿ ಕಾರು ಚಲಾಯಿಸುತ್ತಿದ್ದ. ಇದನ್ನು ಗಮನಿಸಿದ ಸ್ಥಳೀಯರು ಆತನನ್ನು ತಡೆದು ಪ್ರಶ್ನಿಸಿದ್ದಕ್ಕೆ ಅವರಿಗೆ ನಿಂದಿಸಿದ್ದ. ಆದರೆ, ಸಾರ್ವಜನಿಕರು ಕಾರಿನ ಮೇಲೆ ನಾಯಿಗಳನ್ನು ಕೂರಿಸಿಕೊಂಡು ಹೋಗುವ ದೃಶ್ಯವನ್ನು ಮೊಬೈಲ್‌ ನಲ್ಲಿ ಸೆರೆಹಿಡಿದು ಸಾಮಾಜಿಕ ಜಾಲತಾಣಗಳಲ್ಲಿ ಅಪ್‌ಲೋಡ್‌ ಮಾಡಿದ್ದರು. ಇದನ್ನು ಗಮನಿಸಿದ ಪ್ರಾಣಿ ಪ್ರಿಯರು ಆತನ ವಿರುದ್ಧ ಕ್ರಮ ತೆಗೆದುಕೊಳ್ಳುವಂತೆ ಒತ್ತಾಯಿಸಿದ್ದರು.

ಈ ಸಂಗತಿ ಬಾಣಸವಾಡಿ ಠಾಣೆ ಪೊಲೀಸರ ಗಮನಕ್ಕೆ ಬಂದು ಹರೀಶ್‌ನನ್ನು ಬಂಧಿಸಿದ್ದಾರೆ.