ಗಾಲ್ಫ್ ನ ಲ್ಲೊಬ್ಳು ಕನ್ನಡದ ಚೆಲುವೆ

ನೋಡಲು ತೆಳ್ಳಗೆ ಬೆಳ್ಳಗೆ ಇರುವ ಸುಂದರ ಯುವತಿ ಆದಿತಿ ಅಶೋಕ್‌. ಈಗಷ್ಟೇ 19 ವರ್ಷದಾಟಿರುವ ಬೆಂಗಳೂರಿನ ಈ ಯುವತಿ ಶ್ರೀಮಂತರ ಕ್ರೀಡೆ ಎಂದೇ ಖ್ಯಾತವಾದ ಗಾಲ್ಫ್ ನಲ್ಲಿ ವಿಶಿಷ್ಟ ಸಾಧನೆ ಮಾಡಿದ್ದಾಳೆ. ಮುಂದೊಂದು ದಿನ ವೃತ್ತಿಪರ ಗಾಲ್ಫ್ ನಲ್ಲಿ ಈಕೆ ತಾರೆಯಾಗುವುದರಲ್ಲಿ ಯಾವುದೇ ಸಂದೇಹವಿಲ್ಲ.

ಐದು ವರ್ಷದ ಬಾಲಕಿಯಾಗಿರುವಾಗಲೇ ಆದಿತಿ ಗಾಲ್ಫ್ ಸ್ಟಿಕ್‌ ಹಿಡಿದು ತರಬೇತಿ ಆರಂಭಿಸಿದ್ದಾಳೆ. ತಂದೆ ಕೂಡ ಗಾಲ್ಫ್ ಆಟಗಾರನಾಗಿರುವುದರಿಂದ ತಂದೆಯೇ ಮೊದಲ ಗುರುವಾಗಿದ್ದಾರೆ. ಏಷ್ಯನ್‌ ಯೂತ್‌ ಗೇಮ್ಸ್‌, ಯೂತ್‌ ಒಲಿಂಪಿಕ್ಸ್‌ ಗೇಮ್ಸ್‌ನಲ್ಲಿ ಸ್ಪರ್ಧಿಸಿ ಗಮನಾರ್ಹ ಪ್ರದರ್ಶನ ನೀಡಿದ್ದಾರೆ. ಅಷ್ಟೇ ಅಲ್ಲ, ಈ ಎರಡೂ ಗೇಮ್ಸ್‌ ಆಡಿದ ಭಾರತದ ಮೊದಲ ಮತ್ತು ಏಕೈಕ ಯುವತಿ ಎನ್ನುವ ಪ್ರಶಂಸೆಯ ಪಟ್ಟವೂ ಈಕೆಯದ್ದು.

ರಿಯೋ ಒಲಿಂಪಿಕ್ಸ್‌ನಲ್ಲಿ ಭಾರತದಿಂದ ಗಾಲ್ಫ್ಗೆ ಆಯ್ಕೆಯಾದ ಏಕೈಕ ಮಹಿಳೆಯಾಗಿದ್ದರು. ಇಲ್ಲಿ ಶ್ರೇಷ್ಠ ಸಾಧನೆ ನೀಡಲು ಸಾಧ್ಯವಾಗಿಲ್ಲ. ನಾಲ್ಕು ಸುತ್ತುಗಳಿಂದ 291 ಅಂಕವನ್ನು ಕಲೆಹಾಕಿ 41ನೇ ಸ್ಥಾನಕ್ಕೆ ತೃಪ್ತರಾದರು. ಕೂಟದಲ್ಲಿ ಆರಂಭಿಕ ಹಂತದಲ್ಲಿ ನೀಡಿದ ಪ್ರದರ್ಶನವನ್ನು ಎಲ್ಲಾ ಸುತ್ತಿನಲ್ಲಿಯೂ ಪ್ರದರ್ಶಿಸಿದ್ದರೆ ಭಾರತಕ್ಕೆ ಗಾಲ್ಫ್ನಿಂದ ಒಂದು ಪದಕ ಬರುತ್ತಿತ್ತು. ಇತಿಹಾಸವೇ ಸೃಷ್ಟಿಯಾಗಿ ಬಿಡುತ್ತಿತ್ತು. ದುರಾದೃಷ್ಟವಶಾತ್‌ ಕೈತಪ್ಪಿತು.

ಪ್ರಮುಖ ಸಾಧನೆ
2016 ಮತ್ತು 2017ರ ಅವಧಿಯಲ್ಲಿ ಒಟ್ಟು ಮೂರು ಮಹಿಳಾ ಯೂರೋಪ್‌ ಟೂರ್‌ ಪ್ರಶಸ್ತಿ, 2 ಇತರೆ ಪ್ರಮುಖ ಪ್ರಶಸ್ತಿಯನ್ನು ಈಕೆ ಗೆದ್ದಿದ್ದಾರೆ. ಮೂರು ಯೂರೋಪ್‌ ಪ್ರಶಸ್ತಿ ಗೆಲ್ಲುವ ಮೂಲಕ ಈ ಸಾಧನೆ ಮಾಡಿದ ಭಾರತದ ಮೊದಲ ಆಟಗಾರ್ತಿ ಅನ್ನಿಸಿಕೊಂಡಿದ್ದಾರೆ. ಎಲ್‌ಪಿಜಿಎ ಟೂರ್‌ ಸೇರಿದಂತೆ ಅನೇಕ ಟೂರ್ನಿಗಳಲ್ಲಿ ಸಾಧನೆ ಮಾಡಿದ್ದಾರೆ. ಯಾಕೆಂದರೆ ಇಲ್ಲಿಯವರೆಗೂ ಭಾರತೀಯ ಮಹಿಳಾ ಗಾಲ#ರ್‌ ಯಾರೂ ಇಂತಹ ಕೂಟದಲ್ಲಿ ಸ್ಪರ್ಧಿಸುವ ಅರ್ಹತೆಯನ್ನೇ ಪಡೆದಿರಲಿಲ್ಲ. ಹೀಗಾಗಿ ಈಕೆಯ ಸಾಧನೆ ವಿಶೇಷವಾದದ್ದು.

ದೊಡ್ಡ ತಾರೆ ಆಗ್ತಾರೆ
ಈಗಾಗಲೇ ವೃತ್ತಿಪರ ಗಾಲ್ಫ್ ನಲ್ಲಿ ತಮ್ಮದೇ ಆದ ಛಾಪು ಮೂಡಿಸಿರುವ ಆದಿತಿ, ವಿಶ್ವ ಮಟ್ಟದಲ್ಲಿ ಅನೇಕ ಟೂರ್ನಿಗಳಲ್ಲಿ ತಾರಾ ಆಟಗಾರ್ತಿಯರಿಗಿಂತ ಹೆಚ್ಚಿನ ಅಂಕ ಪಡೆದು ಮಿಂಚಿದ್ದಾರೆ. ಈ ಎಲ್ಲಾ ಬೆಳವಣಿಗೆಗಳನ್ನು ನೋಡಿದರೆ ಬೆಂಗಳೂರಿನ ಈ ಯುವತಿ ಮುಂದಿನ ದಿನಗಳಲ್ಲಿ ದೊಡ್ಡ ಸಾಧನೆ ಮಾಡುವುದರಲ್ಲಿ ಅನುಮಾನವಿಲ್ಲ.