Ranji ಪಂದ್ಯ ಆಡಲಿಳಿಯುವ ಹೊತ್ತಲ್ಲೇ ಬಂತು ನಿಷೇಧ ಪತ್ರ!

ವಡೋದರ: ಪ್ರಸಕ್ತ ಸಾಲಿನ ರಣಜಿ ಟ್ರೋಫಿ ಕ್ರಿಕೆಟ್‌ ಪಂದ್ಯಾವಳಿ ವಿಚಿತ್ರ ಸನ್ನಿವೇಶದೊಂದಿಗೆ ಆರಂಭಗೊಂಡಿದೆ. ಇನ್ನೇನು ತಂಡದಲ್ಲಿ ಕಾಣಿಸಿಕೊಂಡು ಆಡಲಿಳಿಯಬೇಕೆನ್ನುವ ಹೊತ್ತಿನಲ್ಲೇ ಬಿಸಿಸಿಐ ನೀಡಿದ 2 ವರ್ಷಗಳ “ನಿಷೇಧ ಪತ್ರ’ ಆಟಗಾರರೊಬ್ಬರ ಕೈ ಸೇರಿದೆ!

ಈ ಸಂಕಟಕ್ಕೆ ಸಿಲುಕಿದ ಆಟಗಾರ ಒಡಿಶಾದ ಆಲ್‌ರೌಂಡರ್‌ ಸುಮಿತ್‌ ಶರ್ಮ. ಅವರು ಬರೋಡ ವಿರುದ್ಧ ಶುಕ್ರವಾರದ ಮೊದಲ ಪಂದ್ಯದಲ್ಲಿ ಆಡಲು ಅಣಿಯಾಗಿದ್ದರು. ಅಷ್ಟರಲ್ಲಿ ನಿಷೇಧದ ಆಘಾತಕ್ಕೆ ಸಿಲುಕಿದರು. ಕಾರಣ, ಜನನ ಪ್ರಮಾಣಪತ್ರ ಗೊಂದಲ!

ಸುಮಿತ್‌ ಶರ್ಮ ಜೂನಿಯರ್‌ ಕ್ರಿಕೆಟಿಗೆ ಅಡಿಯಿರಿಸುವ ವೇಳೆ 2015-16ರಲ್ಲಿ ನೀಡಿದ ಜನನ ಪ್ರಮಾಣಪತ್ರಕ್ಕೂ ಈಗಿನ ಜನನ ಪ್ರಮಾಣಪತ್ರಕ್ಕೂ ತಾಳೆಯಾಗದ ಕಾರಣ ಬಿಸಿಸಿಐ ಈ ಕ್ರಮ ತೆಗೆದುಕೊಂಡಿದೆ ಎಂಬುದಾಗಿ ಒಡಿಶಾ ಕ್ರಿಕೆಟ್‌ ಮಂಡಳಿಯ ಕಾರ್ಯದರ್ಶಿ ಸಂಜಯ್‌ ಬೆಹೆರಾ ಪತ್ರಿಕಾಗೋಷ್ಠಿಯಲ್ಲಿ ಹೇಳಿದರು.