3 ವರ್ಷಗಳ ಕಡ್ಡಾಯ ವಿಶ್ರಾಂತಿ ಬದಲಿಸಲು ಸುಪ್ರೀಂಗೆ ಬಿಸಿಸಿಐ ಮನವಿ?

ನವದೆಹಲಿ: ಬಿಸಿಸಿಐ ಆಡಳಿತಾತ್ಮಕ ಸುಧಾರಣೆ ಕುರಿತಂತೆ ತಾನು ನೀಡಿರುವ ಆದೇಶ ಎಷ್ಟರ ಮಟ್ಟಿಗೆ ಜಾರಿಯಾಗಿದೆ ಎಂದು ಸರ್ವೋಚ್ಚ ನ್ಯಾಯಾಲಯ ಜು.14ರಂದು ವಿಚಾರಣೆ ನಡೆಸಲಿದೆ. ಆದರೆ ಇದೇ ವೇಳೆ 3 ವರ್ಷಗಳ ಕಡ್ಡಾಯ ವಿಶ್ರಾಂತಿ ಸೇರಿದಂತೆ ಕೆಲವೊಂದು ಕ್ರಮಗಳನ್ನು ಬದಲಿಸಬೇಕೆಂದು ಬಿಸಿಸಿಐ ಮನವಿ ಮಾಡಲಿದೆ. ಅದರಲ್ಲೂ ಕಡ್ಡಾಯ ವಿಶ್ರಾಂತಿಗೆ ಪರ್ಯಾಯವಾಗಿ ಒಂದಷ್ಟು ಬೇರೆ ದಾರಿಗಳನ್ನು ಸೂಚಿಸುವ ಇರಾದೆಯನ್ನು ಬಿಸಿಸಿಐ ಹೊಂದಿದೆ. 

ನ್ಯಾಯಾಲಯದಿಂದ ನೇಮಕಗೊಂಡಿರುವ ಆಡಳಿತಾಧಿಕಾರಿಗಳೂ ಈ ಬಗ್ಗೆ ಮೃದು ಧೋರಣೆ ಹೊಂದಿದ್ದಾರೆಂದು ಕೆಲವು ತಿಂಗಳ ಹಿಂದೆ ಹೇಳಲಾಗಿತ್ತು. ಪ್ರತಿ 3 ವರ್ಷದ ಅವಧಿಯ ನಂತರ 3 ವರ್ಷಗಳ ಕಡ್ಡಾಯ ವಿಶ್ರಾಂತಿಯನ್ನು ರದ್ದು ಮಾಡಬೇಕು. ಬದಲಿಗೆ 4 ವರ್ಷಗಳ ಎರಡು ಅವಧಿಯಲ್ಲಿ ಸತತವಾಗಿ ಮುಂದುವರಿಯಲು ಅವಕಾಶ ನೀಡಬೇಕು. ನಂತರ 4 ವರ್ಷ ವಿಶ್ರಾಂತಿಗೆ ಅವಕಾಶ ನೀಡಬೇಕು ಎಂದು ಬಿಸಿಸಿಐನಲ್ಲಿ ಕೆಲವರು ಸಲಹೆ ನೀಡಿದ್ದಾರೆನ್ನಲಾಗಿದೆ. ಅಥವಾ ಸತತ 9 ವರ್ಷ ಹುದ್ದೆ ಹೊಂದಿದ್ದು ನಂತರ ಪೂರ್ಣವಾಗಿ ಬಿಸಿಸಿಐನಿಂದ ಹೊರ ಹೋಗಲು ಆದೇಶಿಸಬೇಕೆಂಬ ಸಲಹೆಯೂ ಇದೆ.