ವಿವಿಧೆಡೆ ಸಾಧಾರಣ ಮಳೆ

ಬಸವನಬಾಗೇವಾಡಿ: ಪಟ್ಟಣ ಸೇರಿದಂತೆ ತಾಲೂಕಿನ ಮನಗೂಳಿ, ಮುತ್ತಗಿ, ಹೂವಿನಹಿಪ್ಪರಗಿ, ಜಾಯವಾಡಗಿ, ಕಾನ್ನಾಳ ಸೇರಿದಂತೆ ವಿವಿಧೆಡೆ ಗುರುವಾರ ಸಾಧಾರಣ ಮಳೆಯಾಗಿದೆ.

ಬೆಳಗ್ಗೆಯಿಂದಲ್ಲೇ ಬಿಸಿಲಿನ ತಾಪ ಹೆಚ್ಚಾಗಿತ್ತು. ಆಗಾಗ್ಗೆ ಮೋಡ ಕವಿದ ವಾತಾವರಣವಿದ್ದರೂ ಶಕೆ ಇತ್ತು. ಸಂಜೆ ಪಟ್ಟಣದಲ್ಲಿ ಕೆಲ ಹೊತ್ತು ತುಂತುರು ಮಳೆಯಾಯಿತು. ಮಧ್ಯರಾತ್ರಿ ಪಟ್ಟಣ ಸೇರಿದಂತೆ ವಿವಿಧೆಡೆ ಕೆಲ ಗಂಟೆಯವರೆಗೆ ಉತ್ತಮ ಮಳೆ ಸುರಿಯಿತು. ನಂತರ ಜಿಟಿ ಜಿಟಿ ಮಳೆಯಾಗಿದೆ. ಕೆಲವೆಡೆ ಸಾಧಾರಣ ಮಳೆಯಾದ ವರದಿಯಾಗಿದೆ. ಮಳೆಯಿಂದಾಗಿ ಹೊಲದ ಬದುವು, ವಿವಿಧೆಡೆ ತಗ್ಗು ಪ್ರದೇಶ, ರಸ್ತೆ, ಚರಂಡಿ ತುಂಬಿ ಹರಿದಿವೆ. ಮಳೆಯಿಂದಾಗಿ ಮುಂಗಾರು ಬೆಳೆಗೆ ಅನುಕೂಲವಾಗಿದ್ದು, ರೈತರಿಗೆ ಸಂತಸ ಮನೆ ಮಾಡಿದೆ.

ಜತೆಗೆ ಇನ್ನೂ ಬಿತ್ತನೆಗೆ ಅಣಿಯಾಗಿರುವ ರೈತರಿಗೆ ಮಳೆ ನಿರೀಕ್ಷೆ ಹೆಚ್ಚಿಸಿದೆ. ತಾಲೂಕಿನ ವಿವಿಧೆಡೆ ಗುರುವಾರ ಬಸವನಬಾಗೇವಾಡಿ- 23.3 ಮಿ.ಮೀ, ಮಟ್ಟಿಹಾಳ- 31.6 ಮಿ.ಮೀ, ಆಲಮಟ್ಟಿ- 15.5 ಮಿ.ಮೀ, ಮನಗೂಳಿ- 15 ಮಿ.ಮೀ, ಹೂವಿನಹಿಪ್ಪರಗಿ- 63.2 ಮಿ.ಮೀ, ಆರೇಶಂಕರ ಮಳೆ ಮಾಪನ ಕೇಂದ್ರದಲ್ಲಿ 28 ಮಿ.ಮೀ ಮಳೆ ಪ್ರಮಾಣ ದಾಖಲಾಗಿದೆ.