ಖಾಕಿ ಕಣ್ಗಾವಲಿನಲ್ಲಿ ಬನಹಟ್ಟಿ : ಶನಿವಾರದವರೆಗೆ ಸೆಕ್ಷನ್ 144 ಮುಂದೂಡಿಕೆ

ರಬಕವಿ-ಬನಹಟ್ಟಿ,: ಹಿಜಾಬ್ ಮತ್ತು ಕೇಸರಿ ಶಾಲು ವಿವಾದವು ಹಿಂಸೆಗೆ ತಿರುಗಿದ ಹಿನ್ನಲೆಯಲ್ಲಿ ಪರಿಸ್ಥಿತಿ ಮತ್ತಷ್ಟು ವಿಕೋಪಕ್ಕೆ ಹೋಗುವ ಮುನ್ನವೇ ಶುಕ್ರವಾರ ಮುಂಜಾನೆ 6 ಗಂಟೆವರೆಗೆ ಜಾರಿಗೊಳಿಸಿದ್ದ 144 ನಿಷೇದಾಜ್ಞೆಯನ್ನು ಶನಿವಾರ ಬೆಳಿಗ್ಗೆ 6 ಗಂಟೆವರೆಗೆ ವಿಸ್ತರಿಸಲಾಗಿದೆ ಎಂದು ತಹಶೀಲ್ದಾರ ಸಂಜಯ ಇಂಗಳೆ ಸ್ಪಷ್ಟಪಡಿಸಿದ್ದಾರೆ.

ಬಾಗಲಕೋಟೆ ಜಿಲ್ಲೆಯ ಬನಹಟ್ಟಿ ಹಾಗು ರಬಕವಿ ಪಟ್ಟಣದಲ್ಲೂ ನಿಷೇದಾಜ್ಞೆ ಮುಂದುವರೆಸಿದ್ದು, ಯಾವದೇ ರೀತಿ ರ‍್ಯಾಲಿ ಹಾಗು ಕಾರ್ಯಕ್ರಮಗಳಿಗೆ ನಿಷೇಧ ಹೇರಿರುವ ಹಿನ್ನಲೆ ಈಗಷ್ಟೇ ಪೊಲೀಸರ ಹತೋಟಿಯಲ್ಲಿ ಬನಹಟ್ಟಿ ನಗರವಿದ್ದು, ಎಲ್ಲೆಂದರಲ್ಲಿ ಪೊಲೀಸ್ ಕಣ್ಗಾವಲು ಹೆಚ್ಚಾಗಿದ್ದು, ಸೂಕ್ಷ್ಮ ಪ್ರದೇಶಗಳೆಂದು ಗುರ್ತಿಸಲಾದ ಸ್ಥಳಗಳಲ್ಲಿ ಪೊಲೀಸ್ ಹೆಚ್ಚಿನ ಬಂದೋಬಸ್ತ್ ಒದಗಿಸಿ ಚಿತ್ರೀಕರಣಗಳೂ ಸಹಿತ ನಡೆಯುತ್ತಿವೆ.

ಮತ್ತೋರ್ವನ ಬಂಧನ: ಮಂಗಳವಾರ ಮಧ್ಯಾಹ್ನ ಶಿಕ್ಷಕನೋರ್ವನ ಮೇಲೆ ನಡೆದ ಮಾರಣಾಂತಿಕ ಹಲ್ಲೆಯಲ್ಲಿ ಭಾಗಿಯಾದ ಆರೋಪಿತರಲ್ಲಿ ಮತ್ತೋರ್ವನನ್ನು ಬಂಧಿಸಿದ್ದು, ಇದೀಗ ಒಟ್ಟು ೧೪ ಜನರನ್ನು ಬಂಧಿಸಲಾಗಿದೆ. ಇನ್ನೂರಕ್ಕೂ ಅಧಿಕ ಜನರು ಈ ಘಟನೆಯಲ್ಲಿ ಭಾಗಿಯಾಗಿರುವ ಬಗ್ಗೆ ಪೊಲೀಸ್ ಪ್ರಾಥಮಿಕ ತನಿಖೆಯಿಂದ ತಿಳಿದು ಬಂದಿರುವ ಹಿನ್ನಲೆ ಪಟ್ಟಣದಾದ್ಯಂತ ಹಾಗು ಕೆಲ ಹೊರಗಡೆಯಿಂದ ಬಂದವರ ಬಗ್ಗೆ ತೀಕ್ಷ್ಣವಾಗಿ ಪರಿಶೀಲಿಸಿ ಠಾಣೆಗೆ ಕರೆತರುವಲ್ಲಿ ಪೊಲೀಸರು ಯಶಸ್ವಿಯಾಗುತ್ತಿದ್ದು, ಮುಂದಿನ ದಿನಗಳಲ್ಲಿ ಮತ್ತಷ್ಟು ಆರೋಪಿತರನ್ನು ಬಂಧಿಸುವ ನಿರೀಕ್ಷೆಯಿದೆ.

ಮಾರುಕಟ್ಟೆ ಸಂಪೂರ್ಣ ಬಂದ್: ನಿಷೇದಾಜ್ಞೆ ಜಾರಿಯಲ್ಲಿ ರಬಕವಿ ಹಾಗು ಬನಹಟ್ಟಿ ಪಟ್ಟಣಗಳ ಮಾರುಕಟ್ಟೆ ಸಂಪೂರ್ಣ ಬಂದ್ ಆಗಿ ಬಿಕೋ ಎನ್ನುತ್ತಿದ್ದವು. ಎಂದಿನAತೆ ಸರ್ಕಾರಿ ಕಛೇರಿ, ಶಾಲೆ, ಖಾಸಗಿ ಹಣಕಾಸು, ಆಸ್ಪತ್ರೆ, ಮೆಡಿಕಲ್ ಹಾಗು ಅಗತ್ಯ ವಸ್ತುಗಳು ಎಂದಿನಂತೆ ಕಾರ್ಯನಿರ್ವಹಿಸುತ್ತಿದ್ದವು.

ಬಸ್ ಸಂಚಾರ ಸೇರಿದಂತೆ ಖಾಸಗಿ ವಾಹನಗಳ ಓಡಾಟಕ್ಕೆ ಯಾವದೇ ನಿರ್ಭಂಧ ಹೇರದೆ ರಾಜ್ಯ ಹೆದ್ದಾರಿಯಲ್ಲಿನ ಸಂಚಾರ ದೈನಂದಿನದಂತೆ ಕಾರ್ಯನಿರ್ವಹಿಸುತ್ತಿದ್ದವು.
ಸೂಕ್ಷ್ಮವಾಗಿ ಗಮನಿಸುತ್ತಿರುವ ಜಿಲ್ಲಾಡಳಿತ: ಬನಹಟ್ಟಿಯಲ್ಲಿ ನಡೆದ ಘಟನೆಯನ್ನು ಜಿಲ್ಲಾಡಳಿತ ಹಾಗು ಪೊಲೀಸ್ ಇಲಾಖೆ ಅತ್ಯಂತ ಸೂಕ್ಷ್ಮವಾಗಿ ಗಮನಿಸುತ್ತಿದ್ದು, ಅಂದಿನ ದೃಶ್ಯಾವಳಿಗಳಿಂದ ಸಮಗ್ರ ಮಾಹಿತಿ ಪಡೆದು ಆರೋಪಿತರನ್ನು ಹುಡುಕಿ ತರುವಲ್ಲಿ ಜಾಣತನದ ಪ್ರದರ್ಶನ ತೋರಿಸುವಲ್ಲಿ ಕಾರಣವಾಗಿದೆ. ಕೆಲ ಕಿಡಿಗೇಡಿಗಳು ಪಟ್ಟಣದಿಂದ ಕಾಲ್ಕಿತ್ತಿದ್ದು, ಅವರ ಹುಡುಕಾಟದಲ್ಲಿಯೂ ತೀವ್ರ ಶೋಧಕಾರ್ಯ ನಡೆಸಿದ್ದಾರೆ.

ಖಾಸಗಿ ಸಮಾರಂಭಕ್ಕೆ ಅವಕಾಶ: ಮದುವೆ-ಮುಂಜಿವೆ, ವಾಸ್ತು ಶಾಂತಿ ಸೇರಿದಂತೆ ವಯಕ್ತಿಕ ಕಾರ್ಯಕ್ರಮಗಳಿಗೆ ಯಾವದೇ ರೀತಿ ಅಡ್ಡಿಪಡಿಸದೆ ಸರಾಗವಾಗಿ ಕಾರ್ಯಕ್ರಮಗಳು ನಡೆದಿರುವದು ಜನರಲ್ಲಿ ನೆಮ್ಮದಿ ತಂದಿದೆ.

ನಿತ್ಯ ಕಾರ್ಯನಿರ್ವಹಿಸುತ್ತಿದ್ದ ವ್ಯಾಪಾರಿಗಳೂ ಸಹಿತ ಬಂದ್‌ಗೆ ಬೇಸರ ವ್ಯಕ್ತಪಡಿಸಿ ತಮ್ಮ ತಮ್ಮ ಅಂಗಡಿ-ಮುಗ್ಗಟ್ಟುಗಳ ಮುಂದೆ ಹೈರಾಣಾಗಿ ಕುಳಿತಿದ್ದರು.