ಬಂಗಾರದಿಂದ ಸಿಂಗಾರಗೊಂಡ ಬಜರಂಗ್‌: ಚಿನ್ನ ಉಳಿಸಿಕೊಂಡು ನಂ.1 ಸ್ಥಾನಕ್ಕೆ ಮರಳಿದ ಸಾಧನೆ

ರೋಮ್‌: ಅಂತಿಮ ಅರ್ಧ ನಿಮಿಷದಲ್ಲಿ 2 ಅಂಕಗಳನ್ನು ಸಂಪಾದಿಸುವಲ್ಲಿ ಯಶಸ್ವಿಯಾದ ಬಜರಂಗ್‌ ಪೂನಿಯ ರೋಮ್‌ನಲ್ಲಿ ನಡೆದ “ಮ್ಯಾಟ್ಯೂ ಪೆಲ್ಲಿಕಾನ್‌ ರ್‍ಯಾಂಕಿಂಗ್‌ ಸೀರಿಸ್‌’ ಕುಸ್ತಿ ಸ್ಪರ್ಧೆಯಲ್ಲಿ ಚಿನ್ನದ ಪದಕ ಜಯಿಸಿದ್ದಾರೆ. ಇದು ಈ ಕೂಟದಲ್ಲಿ ಬಜರಂಗ್‌ಗೆ ಒಲಿದ ಸತತ ಎರಡನೇ ಸ್ವರ್ಣ ಪದಕ ಎಂಬುದು ವಿಶೇಷ.

ಈಗಾಗಲೇ ಟೋಕಿಯೊ ಒಲಿಂಪಿಕ್ಸ್‌ಗೆ ಅರ್ಹತೆ ಪಡೆದಿರುವ ಬಜರಂಗ್‌ ಪೂನಿಯ ರವಿವಾರ ರಾತ್ರಿ ನಡೆದ 65 ಕೆ.ಜಿ. ವಿಭಾಗದ ಫೈನಲ್‌ನಲ್ಲಿ ಮಂಗೋಲಿಯಾದ ಟುಲ್ಗ ಟುಮುರ್‌ ಒಶಿರ್‌ ವಿರುದ್ಧ ಮೇಲುಗೈ ಸಾಧಿಸಿದರು. ಬ್ರೇಕ್‌ ವೇಳೆ ಬಜರಂಗ್‌ 0-2 ಹಿನ್ನಡೆಯಲ್ಲಿದ್ದರು. ಆದರೆ ಅಂತಿಮ 30 ಸೆಕೆಂಡ್‌ಗಳಲ್ಲಿ 2 ಅಂಕ ಗಳಿಸುವಲ್ಲಿ ಯಶಸ್ವಿಯಾದ ಬಜರಂಗ್‌ ಬಂಗಾರದಿಂದ ಸಿಂಗಾರಗೊಂಡರು. 2-2 ಅಂಕಗಳೊಂದಿಗೆ ಈ ಸ್ಪರ್ಧೆ ಮುಗಿದಿತ್ತು. ಅಂತಿಮ ಸ್ಕೋರಿಂಗ್‌ ಪಾಯಿಂಟ್‌ ಬಜರಂಗ್‌ ಅವರಿಂದ ಬಂದುದರಿಂದ ಅವರನ್ನೇ ವಿಜಯಿ ಎಂದು ಘೋಷಿಸಲಾಯಿತು.

ಈ ಸಾಧನೆಯೊಂದಿಗೆ ಬಜರಂಗ್‌ ಪೂನಿಯ 65 ಕೆ.ಜಿ. ವಿಭಾಗದಲ್ಲಿ ನಂ.1 ರ್‍ಯಾಂಕಿಂಗ್‌ ಮರಳಿ ಪಡೆದರು. ಕೂಟದ ಆರಂಭದ ವೇಳೆ ಅವರು ದ್ವಿತೀಯ ರ್‍ಯಾಂಕಿಂಗ್‌ ಹೊಂದಿದ್ದರು.

ವಿಶಾಲ್‌ಗೆ ಕಂಚು
ಒಲಿಂಪಿಕ್ಸ್‌ 70 ಕೆ.ಜಿ. ವಿಭಾಗದ ಸ್ಪರ್ಧೆಯಲ್ಲಿ ಭಾರತದ ವಿಶಾಲ್‌ ಕಾಳೀರಮಣ ಕಂಚಿನ ಪದಕ ಗೆದ್ದರು. ಅವರು ಕಜಾಕ್‌ಸ್ಥಾನದ ಸಿರ್ಬಾಜ್‌ ಟಲ್ಗಾಟ್‌ ವಿರುದ್ಧ 5-1 ಅಂತರದ ಮೇಲುಗೈ ಸಾಧಿಸಿದರು. ಆದರೆ ಇದು “ನಾನ್‌ ಒಲಿಂಪಿಕ್ಸ್‌’ ವಿಭಾಗವಾದ್ದರಿಂದ ವಿಶಾಲ್‌ಗೆ ಯಾವುದೇ ಲಾಭವಾಗಲಿಲ್ಲ.

ಇತ್ತೀಚೆಗಷ್ಟೇ ಡೋಪಿಂಗ್‌ ನಿಷೇಧದಿಂದ ಮುಕ್ತರಾಗಿ ಸ್ಪರ್ಧೆಗೆ ಇಳಿದ ನರಸಿಂಗ್‌ ಪಂಚಮ್‌ ಯಾದವ್‌ ಕಂಚಿನ ಸ್ಪರ್ಧೆಯಲ್ಲಿ ಕಜಾಕ್‌ಸ್ಥಾನದ ಡಾನಿಯರ್‌ ಕೈಸನೋವ್‌ ವಿರುದ್ಧ 0-5 ಅಂಕಗಳ ಸೋಲನುಭವಿಸಿದರು.

ಭಾರತಕ್ಕೆ 7 ಪದಕ
ಈ ಕೂಟದಲ್ಲಿ ಭಾರತ ಒಟ್ಟು 7 ಪದಕ ಜಯಿಸಿತು. ಉಳಿದ ಪದಕ ವಿಜೇತರೆಂದರೆ ವಿನೇಶ್‌ ಫೋಗಟ್‌ (ಚಿನ್ನ), ಸರಿತಾ ಮೋರ್‌ (ಬೆಳ್ಳಿ), ನೀರಜ್‌ (63 ಕೆ.ಜಿ.), ಕುಲದೀಪ್‌ ಮಲಿಕ್‌ (72 ಕೆ.ಜಿ.) ಮತ್ತು ನವೀನ್‌ (130 ಕೆ.ಜಿ.).