Bagladesh Crisis: ಭಾರತ-ಬಾಂಗ್ಲಾದೇಶ ಗಡಿಯಲ್ಲಿ ಬೈರಕ್ತಾರ್‌ ಟಿಬಿ2 ಡ್ರೋನ್‌!

ಢಾಕಾ: ಅಲ್ಪಸಂಖ್ಯಾಕ ಹಿಂದೂ ಸಮು ದಾಯದ ಮೇಲಿನ ದಾಳಿ ಸಂಬಂಧ ಭಾರತ-ಬಾಂಗ್ಲಾ ನಡುವೆ ವೈಮನಸ್ಸು ಉಂಟಾಗಿರುವಂತೆಯೇ ಬಾಂಗ್ಲಾ ಸೇನೆಯು ಟರ್ಕಿ ನಿರ್ಮಿತ “ಬೈರಕ್ತಾರ್‌ ಟಿಬಿ2′ ಡ್ರೋನ್‌ಗಳನ್ನು ಭಾರತ- ಬಾಂಗ್ಲಾ ಗಡಿಯಲ್ಲಿ ನಿಯೋಜಿಸಿದೆ ಎಂದು ಮೂಲಗಳು ತಿಳಿಸಿವೆ.

ವ್ಯೂಹಾತ್ಮಕವಾಗಿ ಸೂಕ್ಷ್ಮ ಪ್ರದೇಶ ಗಳಲ್ಲಿ ಈ ನಿಯೋಜನೆ ಭಾರತದ ಆತಂಕ ಹೆಚ್ಚಿಸಿದೆ. ಬಾಂಗ್ಲಾ ರಾಜಕೀಯ ಅಸ್ಥಿರತೆಯ ಲಾಭ ಪಡೆದು ಭಯೋತ್ಪಾದಕರು ಮತ್ತು ಕಳ್ಳಸಾಗಣೆದಾರರ ಜಾಲವು ಭಾರತಕ್ಕೆ ನುಸುಳಲು ಪ್ರಯತ್ನಿಸುತ್ತಿವೆ ಎಂದು ಗುಪ್ತಚರ ಸಂಸ್ಥೆಗಳು ವರದಿ ನೀಡಿರುವ ಬೆನ್ನಲ್ಲೇ ಈ ಬೆಳವಣಿಗೆ ಮಹತ್ವ ಪಡೆದಿದೆ.

ಭಾರತ ಕೂಡ ಗಡಿಯಲ್ಲಿ ಕಣ್ಗಾವಲು ಹೆಚ್ಚಿಸಿದೆ. “ಬೈರಕ್ತಾರ್‌ ಟಿಬಿ2′ ಟರ್ಕಿ ನಿರ್ಮಿತ ಡ್ರೋನ್‌ ಆಗಿದ್ದು, ಕಣ್ಗಾವಲು, ಸಣ್ಣ ಪ್ರಮಾಣದ ದಾಳಿ ಗಳಿಗೆ ಇವುಗಳನ್ನು ಬಳಸಲಾಗುತ್ತದೆ. ಈ ಡ್ರೋನ್‌ ಒಂದೇ ಬಾರಿಗೆ 4 ಲೇಸರ್‌ ನಿರ್ದೇಶಿತ ಅಸ್ತ್ರಗಳು, 150ಕೆಜಿ ಪೇಲೋಡ್‌ ಹೊತ್ತೂಯ್ಯುವ ಸಾಮರ್ಥ್ಯ ಹೊಂದಿದೆ. ಏತನ್ಮಧ್ಯೆ, ಬಾಂಗ್ಲಾ ಹಿಂದೂಗಳ ಮೇಲಿನ ದಾಳಿ ಖಂಡಿಸಿ, ಆಕ್ರಮಣಕಾರರ ವಿರುದ್ಧ ಕ್ರಮ ಕೈಗೊಳ್ಳಿ ಎಂದು ಅಲ್ಲಿನ ಅಲ್ಪಸಂಖ್ಯಾಕ ವಕೀಲರ ಸಂಘ ಆಗ್ರಹಿಸಿದೆ.