ಬ್ಯಾಡ್ಮಿಂಟನ್‌: ರಾಜ್ಯಕ್ಕೆ 9 ಪದಕ

ಬೆಂಗಳೂರು: ಲಕ್ನೋದಲ್ಲಿ ಮುಗಿದ 5ನೇ ರಾಷ್ಟ್ರೀಯ ದಿವ್ಯಾಂಗರ ಬ್ಯಾಡ್ಮಿಂಟನ್‌ ಕೂಟದಲ್ಲಿ ಕರ್ನಾಟಕ 9 ಪದಕಗಳನ್ನು ಗೆದ್ದಿದೆ. ಈ ಪೈಕಿ ಕೆ.ಎಂ. ಪಲ್ಲವಿ ಒಬ್ಬರೇ ಮೂರು ಪದಕ ಜಯಿಸಿದರು.

ಕೇರಳದ ಆಲ್ಫಿಯಾ ಜೇಮ್ಸ್‌ ಜತೆಗೂಡಿದ ಪಲ್ಲವಿ, ಮಹಿಳೆಯರ ಡಬಲ್ಸ್‌ ವಿಭಾಗದಲ್ಲಿ ಕರ್ನಾಟಕದ ಅಮ್ಮು ಮೋಹನ್‌-ಆಂಧ್ರ ಪ್ರದೇಶದ ರೂಪಾ ಪಡಾಲ ಅವರನ್ನು 21-7, 21-8ರಿಂದ ಮಣಿಸಿ ಚಿನ್ನ ಗೆದ್ದರು.

ಮಿಶ್ರ ಡಬಲ್ಸ್‌ ಸೆಮಿಫೈನಲ್‌ನಲ್ಲಿ ರಾಜ್ಯದ ಅಮ್ಮು ಮೋಹನ್‌-ಶಶಾಂಕ್‌ ಕುಮಾರ್‌ ವಿರುದ್ಧ ಪಲ್ಲವಿ-ಅಬು ಹುಬೈದ ಜೋಡಿ ಸೋಲನುಭವಿಸಿತು. ಇಲ್ಲಿ ಪಲ್ಲವಿಗೆ ಕಂಚು ಲಭಿಸಿತು. ರಾಜ್ಯದ ಅಮ್ಮು ಮೋಹನ್‌ ಒಟ್ಟು 3 ಬೆಳ್ಳಿ ಪದಕ ಗೆದ್ದರು. ಸಿ. ಮಂಜುನಾಥ್‌ ಕಂಚು ಗೆದ್ದರು. ಪರೀಕ್ಷಿತ್‌ ಪ್ರಸಾದ್‌, ಸುಮಿತ್‌ ಕುಮಾರ್‌ ಕಂಚಿನ ಪದಕ ಗೆದ್ದರು.