ದೇವರಿಗೇ ಪೊಲೀಸ್‌ ಸಮವಸ್ತ್ರ! ಕಾಶಿಯ ಕೊತ್ವಾಲ ಬಾಬಾ ಕಾಲ ಭೈರವನಿಗೆ ಖಾಕಿ ಸಮವಸ್ತ್ರ

ಲಕ್ನೋ: ಕೊರೊನಾ ತಡೆಗಟ್ಟಲು ಕಠಿಣ ನಿಯಮಗಳು ಎಲ್ಲೆಡೆ ಜಾರಿಯಿರುವ ಹಿನ್ನೆಲೆ ಬಹುತೇಕ ಸ್ಥಳಗಳಲ್ಲಿ ಪೊಲೀಸರೇ ಕಾಣಲಾರಂಭಿಸಿದ್ದಾರೆ. ಇಂತಹ ಸಮಯದಲ್ಲಿ ದೇವರಿಗೂ ಪೊಲೀಸ್‌ ಸಮವಸ್ತ್ರ ತೊಡಿಸಿರುವ ವಿಶೇಷ ಘಟನೆ ಉತ್ತರ ಪ್ರದೇಶದ ಕಾಶಿಯಲ್ಲಿ ನಡೆದಿದೆ.

ಕಾಶಿಯ ಕೊತ್ವಾಲ ಎಂದೇ ಪ್ರಸಿದ್ಧವಾಗಿರುವ ಬಾಬಾ ಕಾಲ ಭೈರವನಿಗೆ ಖಾಕಿ ಸಮವಸ್ತ್ರ ತೊಡಿಸಲಾಗಿದೆ. ತಲೆ ಮೇಲೆ ಪೊಲೀಸ್‌ ಟೋಪಿಯನ್ನೂ ಹಾಕಲಾಗಿದೆ.

“ಪೊಲೀಸ್‌ ರೂಪದಲ್ಲಿರುವ ಭೈರವ ತಪ್ಪಿತಸ್ಥರಿಗೆ ಶಿಕ್ಷೆ ನೀಡಲಿದ್ದಾನೆ’ ಎಂದು ಅಲ್ಲಿನ ಭಕ್ತಾದಿಗಳು ನಂಬಿದ್ದಾರಂತೆ. ಕೊರೊನಾ ಹೆಚ್ಚಾಗುತ್ತಿರುವ ಈ ಸಮಯದಲ್ಲಿ ದೇಶದ ಜನರು ಸುರಕ್ಷಿತವಾಗಿರಲಿ ಎಂದು ಈ ರೀತಿಯ ವಿಶೇಷ ಉಡುಗೆಯೊಂದಿಗೆ ಪೂಜೆ ಸಲ್ಲಿಸುತ್ತಿರುವುದಾಗಿ ಅಲ್ಲಿನ ಆಡಳಿತ ಮಂಡಳಿ ತಿಳಿಸಿದೆ. ಪೊಲೀಸ್‌ ಸಮವಸ್ತ್ರದಲ್ಲಿರುವ ದೇವರ ಮುಂದೆ ಮದ್ಯವನ್ನು ನೈವೇದ್ಯವಾಗಿ ಇಟ್ಟಿರುವ ಫೋಟೋ ಎಲ್ಲೆಡೆ ಹರಿದಾಡಿದೆ.

ಇದನ್ನೂ ಓದಿ : ರಾಜ್ಯದಲ್ಲಿ ಹೊಸ ಕೋವಿಡ್ ಪ್ರಕರಣಗಳಲ್ಲಿ ಸ್ವಲ್ಪ ಇಳಿಕೆ; ಒಮಿಕ್ರಾನ್ ಏರಿಕೆ