ಆಸ್ಟ್ರೇಲಿಯಕ್ಕೆ ಭರ್ಜರಿ ಗೆಲುವು

ಬ್ರಿಸ್ಟಲ್‌: ಆಲ್‌ರೌಂಡ್‌ ಆಟದ ಪ್ರದರ್ಶನ ನೀಡಿದ ಆಸ್ಟ್ರೇಲಿಯ ವನಿತೆಯರು ಐಸಿಸಿ ವನಿತಾ ವಿಶ್ವಕಪ್‌ ಕ್ರಿಕೆಟ್‌ ಕೂಟದ ಬುಧವಾರದ ಪಂದ್ಯದಲ್ಲಿ ಭಾರತೀಯ ವನಿತೆಯರನ್ನು 8 ವಿಕೆಟ್‌ಗಳಿಂದ ಭರ್ಜರಿಯಾಗಿ ಸೋಲಿಸಿದ್ದಾರೆ.

ಟಾಸ್‌ ಗೆದ್ದು ಫೀಲ್ಡಿಂಗ್‌ ನಡೆಸಿದ ಆಸ್ಟ್ರೇಲಿಯ ತಂಡವು ಭಾರತ ತಂಡವನ್ನು 7 ವಿಕೆಟಿಗೆ 226 ರನ್ನಿಗೆ ನಿಯಂತ್ರಿಸಲು ಯಶಸ್ವಿಯಾಯಿತು. ಇದಕ್ಕುತ್ತರವಾಗಿ ನಾಯಕಿ ವೆ‌ುಗ್‌ ಲ್ಯಾನಿಂಗ್‌ ಮತ್ತು ಎಲಿಸ್‌ ಪೆರ್ರಿ ಅವರ ಭರ್ಜರಿ ಆಟದಿಂದಾಗಿ ಆಸ್ಟ್ರೇಲಿಯ ತಂಡವು 45.1 ಓವರ್‌ಗಳಲ್ಲಿ ಕೇವಲ 2 ವಿಕೆಟ್‌ ನಷ್ಟದಲ್ಲಿ ಜಯಭೇರಿ ಸಾಧಿಸಿತು. ಈ ಗೆಲುವಿನೊಂದಿಗೆ ಒಟ್ಟು 10 ಅಂಕ ಗಳಿಸಿರುವ ಆಸ್ಟ್ರೇಲಿಯ ಸೆಮಿಫೈನಲಿಗೇರಿತು. ಆಸ್ಟ್ರೇಲಿಯ ಅಂತಿಮ ಲೀಗ್‌ ಪಂದ್ಯದಲ್ಲಿ ಶನಿವಾರ ದಕ್ಷಿಣ ಆಫ್ರಿಕಾವನ್ನು ಎದುರಿಸಲಿದೆ. ದಕ್ಷಿಣ ಆಫ್ರಿಕಾ ದಿನದ ಇನ್ನೊಂದು ಪಂದ್ಯದಲ್ಲಿ ಶ್ರೀಲಂಕಾವನ್ನು ಸೋಲಿಸಿ ಒಟ್ಟು 9 ಅಂಕ ಪಡೆದಿದೆ. ನ್ಯೂಜಿಲ್ಯಾಂಡ್‌ ತಂಡವನ್ನು ಸೋಲಿಸಿದ ಇಂಗ್ಲೆಂಡ್‌ ಕೂಡ 10 ಅಂಕ ಹೊಂದಿದೆ. ಹಾಗಾಗಿ ಇಂಗ್ಲೆಂಡ್‌, ಆಸ್ಟ್ರೇಲಿಯ ಮತ್ತು ದಕ್ಷಿಣ ಆಫ್ರಿಕಾ ಮೊದಲ ಮೂರು ತಂಡಗಳಾಗಿ ಸೆಮಿಫೈನಲಿಗೇರುವುದು ಖಚಿತವಾಗಿದೆ. 

ಗೆಲ್ಲಲು 227 ರನ್‌ ಗಳಿಸುವ ಗುರಿ ಪಡೆದ ಆಸ್ಟ್ರೇಲಿಯಕ್ಕೆ ಆರಂಭಿಕರಾದ ನಿಕೋಲ್‌ ಬೋಲ್ಟನ್‌ ಮತ್ತು ಬೆತ್‌ ಮೂನಿ ಉತ್ತಮ ಆರಂಭ ಒದಗಿಸಿದರು. ಉತ್ತಮವಾಗಿ ಆಡಿದ ಅವರಿಬ್ಬರು ಮೊದಲ ವಿಕೆಟಿಗೆ 62 ರನ್‌ ಪೇರಿಸಿದರು. ಅವರಿಬ್ಬರು ಅನುಕ್ರಮವಾಗಿ 36 ಮತ್ತು 45 ರನ್‌ ಹೊಡೆದರು. ಇವರಿಬ್ಬರ ಬಳಿಕ ಲ್ಯಾನಿಂಗ್‌ ಮತ್ತು ಪೆರ್ರಿ ಭರ್ಜರಿ ಆಟವಾಡಿದರು. ಭಾರತೀಯ ದಾಳಿಯನ್ನು ಪುಡಿಗಟ್ಟಿದ ಅವರಿಬ್ಬರು ಮುರಿಯದ ಮೂರನೇ ವಿಕೆಟಿಗೆ 124 ರನ್‌ ಪೇರಿಸಿ ತಂಡದ ಗೆಲುವು ಸಾರಿದರು. ಲ್ಯಾನಿಂಗ್‌ 88 ಎಸೆತಗಳಿಂದ 7 ಬೌಂಡರಿ ಮತ್ತು 1 ಸಿಕ್ಸರ್‌ ನೆರವಿನಿಂದ 76 ರನ್‌ ಗಳಿಸಿದರೆ ಪೆರ್ರಿ 67 ಎಸೆತಗಳಿಂದ 60 ರನ್‌ ಗಳಿಸಿ ಅಜೇಯರಾಗಿ ಉಳಿದರು.

ಈ ಸೋಲಿನಿಂದ ಭಾರತಕ್ಕೆ ಸೆಮಿಫೈನಲಿಗೇರುವ ದಾರಿ ದುರ್ಗಮವಾಗಿದೆ. ಭಾರತ ಅಂತಿಮ ಲೀಗ್‌ ಪಂದ್ಯದಲ್ಲಿ ಶನಿವಾರ ನ್ಯೂಜಿಲ್ಯಾಂಡ್‌ ತಂಡವನ್ನು ಎದುರಿಸಲಿದೆ. ನ್ಯೂಜಿಲ್ಯಾಂಡ್‌ ಬುಧವಾರದ ಪಂದ್ಯದಲ್ಲಿ ಇಂಗ್ಲೆಂಡಿಗೆ ಶರಣಾಗಿದೆ. ಸದ್ಯ ಭಾರತ ಮತ್ತು ನ್ಯೂಜಿಲ್ಯಾಂಡ್‌ ಅನುಕ್ರಮವಾಗಿ 8 ಮತ್ತು 7 ಅಂಕ ಹೊಂದಿದೆ. ಅಂತಿಮ ಲೀಗ್‌ ಪಂದ್ಯ ಎರಡೂ ತಂಡಗಳಿಗೆ ಕ್ವಾರ್ಟರ್‌ಫೈನಲ್‌ ಪಂದ್ಯವಿದ್ದಂತೆ. ಗೆದ್ದ ತಂಡ ನಾಲ್ಕನೇ ತಂಡವಾಗಿ ಸೆಮಿಫೈನಲಿಗೇರಲಿದೆ. 

ಪೂನಂ ರಾವತ್‌ ಶತಕ: ಆರಂಭಿಕ ಆಟಗಾರ್ತಿ ಪೂನಂ ರಾವತ್‌ ಮತ್ತು ವಿಶ್ವದಾಖಲೆಗೈದ ಮಿಥಾಲಿ ರಾಜ್‌ ಅವರ ಸಾಧನೆಯಿಂದಾಗಿ ಭಾರತ ಚೇತರಿಸುವಂತಾಯಿತು.

ರಾವತ್‌ ಮತ್ತು ಮಿಥಾಲಿ ಅವರನ್ನು ಬಿಟ್ಟರೆ ಉಳಿದವರ್ಯಾರೂ ಉತ್ತಮ ಬ್ಯಾಟಿಂಗ್‌ ಪ್ರದರ್ಶಿಸಿಲ್ಲ. ಆದರೆ ರಾವತ್‌ ಮತ್ತು ಮಿಥಾಲಿ ಅವರ ಆಟ ಅತ್ಯಂತ ನಿಧಾನಗತಿಯಲ್ಲಿ ಸಾಗಿತ್ತು. ಇದರಿಂದಾಗಿ ಭಾರತ ಉತ್ತಮ ಮೊತ್ತ ಪೇರಿಸಲು ವಿಫ‌ಲವಾಯಿತು.

ಸ್ಮತಿ ಮಂಧನಾ ಅವರನ್ನು ಕಳೆದುಕೊಂಡ ಬಳಿಕ ರಾವತ್‌ ಅವರನ್ನು ಸೇರಿಕೊಂಡ ಮಿಥಾಲಿ ಅವರು ತಂಡವನ್ನು ಆಧರಿಸುವ ಪ್ರಯತ್ನ ನಡೆಸಿದರು. ಅವರಿಬ್ಬರು ದ್ವಿತೀಯ ವಿಕೆಟಿಗೆ ಅಮೂಲ್ಯ 157 ರನ್‌ ಪೇರಿಸಿದರೂ ಅದಕ್ಕಾಗಿ 37 ಓವರ್‌ ತೆಗೆದುಕೊಂಡಿದ್ದರು. 
 

ಸಂಕ್ಷಿಪ್ತ ಸ್ಕೋರು: ಭಾರತ 7 ವಿಕೆಟಿಗೆ 226 (ಪೂನಂ ರಾವತ್‌ 106, ಮಿಥಾಲಿ ರಾಜ್‌ 69, ಹರ್ಮನ್‌ಪ್ರೀತ್‌ ಕೌರ್‌ 23, ಮೆಗಾನ್‌ ಶಟ್‌ 52ಕ್ಕೆ 2, ಎಲಿಸ್‌ ಪೆರ್ರಿ 37ಕ್ಕೆ 2); ಆಸ್ಟ್ರೇಲಿಯ 2 ವಿಕೆಟಿಗೆ 227 (ನಿಕೋಲ್‌ ಬೋಲ್ಟನ್‌ 36, ಬೆತ್‌ ಮೂನಿ 45, ಮೆಗ್‌ ಲ್ಯಾನಿಂಗ್‌ 76 ಔಟಾಗದೆ, ಎಲಿಸ್‌ ಪೆರ್ರಿ 60 ಔಟಾಗದೆ).