ಅಮಿತಾಬ್ ಬಚ್ಚನ್ ನಂತರ ಅನುಪಮ್ ಖೇರ್ ಕುಟುಂಬಕ್ಕೂ ಕಾಡಿದ ಕೋವಿಡ್-19

ಮುಂಬೈ: ಬಾಲಿವುಡ್ ನಟ ಅನುಪಮ್ ಖೇರ್ ಕುಟುಂಬಕ್ಕೂ ಕೋವಿಡ್ ಬರಸಿಡಿಲು ಬಡಿದಿದೆ. ಅನುಪಮ್ ಖೇರ್ ತಾಯಿ ದುಲ್ಹಾರಿ ಅವರಿಗೆ ಸೊಂಕು ದೃಢಪಟ್ಟಿದ್ದು ಮುಂಬೈನ ಕೋಕಿಲಾಬೆನ್ ಆಸ್ಪತ್ರೆಗೆ ದಾಖಲಿಸಲಾಗಿದೆ.

ಅನುಪಮ್ ಖೇರ್ ಸ್ವತಃ ಟ್ವೀಟ್ ನಲ್ಲಿ ವಿಷಯ ಖಚಿತಪಡಿಸಿದ್ದು, ತಾಯಿಗೆ ಮಾತ್ರವಲ್ಲದೆ, ಸಹೋದರ ರಾಜು ಖೇರ್, ಅತ್ತಿಗೆ ಮತ್ತು ಸೋದರ ಸೊಸೆಗೆ ಸೋಂಕು ತಗುಲಿದೆ ಎಂದಿದ್ದಾರೆ. ಆದರೇ ತಮಗೆ ಪರೀಕ್ಷಾ ವರದಿ ನೆಗೆಟಿವ್ ಬಂದಿದೆ ಎಂದು ಇದೇ ವೇಳೆ ಸ್ಪಷ್ಟಪಡಿಸಿದ್ದಾರೆ.

ತಮ್ಮ ಕುಟುಂಬ ಇದೀಗ ಮನೆಯಲ್ಲಿ ಕ್ವಾರಂಟೈನ್ ಗೆ ಒಳಪಟ್ಟಿದ್ದು,  ಅಧಿಕಾರಿಗಳಿಗೆ ಮಾಹಿತಿ ನೀಡಲಾಗಿದೆ   ಎಂದಿದ್ದಾರೆ.

ಇದನ್ನೂ ಓದಿ:ಐಶ್ವರ್ಯ ರೈ, ಮಗಳು ಆರಾಧ್ಯಗೂ ಕೋವಿಡ್ ಪಾಸಿಟಿವ್: ಜಯಾ ಬಚ್ಚನ್ ವರದಿ ನೆಗೆಟಿವ್

ಸೋನಮ್ ಕಪೂರ್, ರಣ್ ವೀರ್ ಶೋರೆ, ಅನುಭವ ಸಿನ್ಹಾ ಮೊದಲಾದ ಬಾಲಿವುಡ್ ತಾರೆಯರು, ಅನುಪಮ್ ಖೇರ್ ಕುಟುಂಬ ಶೀಘ್ರ ಗುಣಮುಖರಾಗಲಿ ಎಂದು ಹಾರೈಸಿದ್ದಾರೆ.

ಇದಕ್ಕೂ ಮೊದಲು ಬಾಲಿವುಡ್ ಖ್ಯಾತ ನಟ ಬಿಗ್ ಬಿ ಅಮಿತಾಬ್ ಬಚ್ಚನ್ ಮತ್ತು ಪುತ್ರ ಅಭಿಷೇಕ್ ಬಚ್ಚನ್ ಅವರಿಗೂ ಕೋವಿಡ್ ಸೊಂಕು ದೃಢಪಟ್ಟಿತ್ತು. ಇವರು ಮುಂಬೈನ ನಾನಾವತಿ ಆಸ್ಪತ್ರೆಗೆ ದಾಖಲಾಗಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.