ಸಂಹಿತೆ ಕಾಯ್ದುಕೊಳ್ಳುವಲ್ಲಿ ಆ್ಯಂಟಿ ಡಿಫೇಸ್‌ಮೆಂಟ್‌  ಸ್ಕ್ವಾಡ್ ಗಳ ಸಕ್ರಿಯ ಚಟುವಟಿಕೆ 

ಬದಿಯಡ್ಕ : ಕಾಸರಗೋಡು ಜಿಲ್ಲೆಯಲ್ಲಿ ಲೋಕಸಭೆ ಚುನಾವಣೆ ಸಂಬಂಧ ರಚಿಸಿರುವ ಆ್ಯಂಟಿ ಡಿಫೇಸ್‌ಮೆಂಟ್‌ ಸ್ಕ್ವಾಡ್ ಗಳ ಚಟುವಟಿಕೆ ಸಕ್ರಿಯವಾಗಿ ನಡೆಯುತ್ತಿದೆ.

ಚುನಾವಣೆ ಆಯೋಗ ಸಾರ್ವಜನಿಕರಿಗೆ ಒದಗಿಸಿರುವ ಸಿ – ವಿಝಿಲ್‌ ಆ್ಯಪ್‌ ಮೂಲಕ ಲಭಿಸುವ ಎಲ್ಲ ದೂರುಗಳಿಗೆ 100 ನಿಮಿಷಗಳ ಅವಧಿಯಲ್ಲಿ ಇವರು ಪರಿಹಾರ ಒದಗಿಸುತ್ತಾರೆ. ಅರ್ಧರಾತ್ರಿಗೆ ಜನ ಕರೆ ಮಾಡಿದರೂ ತಕ್ಷಣ ಪರಿಹಾರಕ್ಕೆ ಧಾವಿಸುವುದು ಸ್ಕ್ವಾಡ್ ನ‌ ಕ್ರಮವಾಗಿದೆ. ಸಾರ್ವಜನಿಕ ಪ್ರದೇಶಗಳಲ್ಲಿ , ಖಾಸಗಿ ವ್ಯಕ್ತಿಯ ಅನುಮತಿ ಇಲ್ಲದೆ ರಾಜಕೀಯ ಲಾಂಛನಗಳು, ಭಿತ್ತಿಪತ್ರ, ಬ್ಯಾನರ್‌ ಇತ್ಯಾದಿ ಸ್ಥಾಪಿಸಿದ್ದರೆ ಅದನ್ನು ತೆರವುಗೊಳಿಸಲು ರಚಿಸಿರುವ ದಳವೇ ಆ್ಯಂಟಿ ಡಿಫೇಸ್‌ಮೆಂಟ್‌ ಸ್ಕ್ವಾಡ್.

ಚುನಾವಣೆ ಅಧಿಸೂಚನೆ ಪ್ರಕಟಗೊಂಡ ನಂತರ ಈ ದಳ ಚಟುವಟಿಕೆ ಆರಂಭಿಸಿದೆ. ಜಿಲ್ಲೆಯ 5 ವಿಧಾನಸಭೆ ಕ್ಷೇತ್ರಗಳನ್ನು ಪ್ರಧಾನವಾಗಿರಿಸಿ ರಚಿಸಿರುವ 5 ದಳಗಳು, ಒಂದು ಜಿಲ್ಲಾ ಮಟ್ಟದ ದಳ ಸಹಿತ 6
ಸ್ಕ್ವಾಡ್ ಗಳು ಈ ನಿಟ್ಟಿನಲ್ಲಿ ಚಟುವಟಿಕೆ ನಡೆಸುತ್ತಿದೆ. 5 ಮಂದಿ ಸದಸ್ಯರು ಪ್ರಧಾನವಾಗಿ ಒಂದು ತಂಡದಲ್ಲಿದ್ದಾರೆ. ನ್ಯಾಯಮೂರ್ತಿ, ಎ.ಎಸ್‌.ಐ., ಕಾನ್‌ಸ್ಟೆಬಲ್‌, ಸಹಾಯಕ, ವಿಡಿಯೋಗ್ರಾಫರ್‌, ಚಾಲಕ ಒಂದು ತಂಡದಲ್ಲಿ ಕರ್ತವ್ಯಲ್ಲಿದ್ದಾರೆ.

ಸಿ – ವಿಝಿಲ್‌ ಮೂಲಕ ಲಭಿಸುವ ದೂರುಗಳನ್ನು ಇವರು ಪ್ರಧಾನವಾಗಿ ಪರಿಹರಿಸುತ್ತಾರೆ. ಸಿ – ವಿಝಿಲ್‌ ಮೂಲಕ ದೂರು ಲಭಿಸದೇ ಇದ್ದರೂ ಎಲ್ಲಿ ನೀತಿ ಸಂಹಿತೆ ಉಲ್ಲಂಘನೆ ಕಂಡರೂ ಸ್ವಯಂ ಪ್ರೇರಣೆಯಿಂದ ತಂಡ ಕ್ರಮ ಕೈಗೊಳ್ಳತ್ತದೆ. ಲೋಕಸಭೆ ಚುನಾವಣೆಯನ್ನು ಪ್ರಕೃತಿ ಸ್ನೇಹಿಯಾಗಿಸುವ ನಿಟ್ಟಿನಲ್ಲಿ ಚುನಾವಣೆ ಆಯೋಗ ಆದೇಶ ಹೊರಡಿಸಿದೆ. ಹಸುರು ಸಂಹಿತೆ ಕಡ್ಡಾಯವಾಗಿ ಪಾಲಿಸುವಲ್ಲಿ ಈ ದಳ ಸಕ್ರಿಯವಾಗಿದೆ.