ಜಿಯೋ ತೆಕ್ಕೆಗೆ ಆರ್‌ ಕಾಮ್‌

ಹೊಸದಿಲ್ಲಿ: ಅನಿಲ್‌ ಅಂಬಾನಿ ಒಡೆತನದ ರಿಲಯನ್ಸ್‌ ಕಮ್ಯುನಿಕೇಶನ್‌ (ಆರ್‌.ಕಾಮ್‌)ಯನ್ನು  ಜಿಯೋ ಖರೀದಿ ಮಾಡಲಿದೆ.  ಸಾಲದ ಸುಳಿಗೆ ಸಿಲುಕಿದ್ದ  ಅನಿಲ್‌ ಅಂಬಾನಿ ಒಡೆತನದ ರಿಲಾಯನ್ಸ್‌ ಕಮ್ಯೂನಿಕೇಶನ್ಸ್‌ನ ಟೆಲಿಕಾಂ ವಹಿವಾಟನ್ನು ಸೋದರ ಮುಖೇಶ್‌ ಅಂಬಾನಿ ಖರೀದಿ ಸಿದ್ದಾರೆ. ತಂದೆ ದಿ. ಧೀರೂಬಾಯಿ ಅಂಬಾನಿ 85ನೇ ಜನ್ಮದಿನದಂದೇ ಈ ಘೋಷಣೆ ಮಾಡಿರುವುದು  ಮಹತ್ವದ್ದಾಗಿದೆ. ಮುಖೇಶ್‌ ಅಂಬಾನಿ ನೇತೃತ್ವದ ಜಿಯೋ ಸ್ಥಾಪಿಸಿದ ಅನಂತರದಲ್ಲಿ ರಿಲಾಯನ್ಸ್‌ ಭಾರೀ ಆಘಾತ ಅನುಭವಿಸಿತ್ತು. 2006ರಲ್ಲಿ ಇಬ್ಬರೂ ಸೋದರರು ಸ್ವತ್ತು ಹಂಚಿಕೊಂಡ ನಂತರದಲ್ಲಿ ಇದೇ ಮೊದಲ ಬಾರಿಗೆ ಸೋದರನ ಸಹಾಯಕ್ಕೆ ಮುಖೇಶ್‌ ಮುಂದಾಗಿದ್ದಾರೆ.

ತರಂಗಾಂತರ, ಟವರ್‌, ಆಪ್ಟಿಕಲ್‌ ಫೈಬರ್‌ ನೆಟ್‌ವರ್ಕ್‌ ಹಾಗೂ ಇತರ ವೈರ್‌ಲೆಸ್‌ ಸ್ವತ್ತುಗಳನ್ನು ರಿಲಾಯನ್ಸ್‌ ಜಿಯೋ ಖರೀದಿ ಸಲಿದೆ. ಆದರೆ ಇದರ ವಹಿವಾಟು ಮೊತ್ತವು 24 ರಿಂದ 25 ಸಾವಿರ ಕೋಟಿ ರೂ. ಆಗಲಿದೆ ಎಂದು ಊಹಿಸಲಾಗಿದೆ. ಆದರೆ ಈ ಬಗ್ಗೆ ನಿಖರ ಮೊತ್ತ ಬಹಿರಂಗಗೊಳಿಸಲಾಗಿಲ್ಲ.

ದೇಶದ ಹಾಗೂ ವಿದೇಶದ 35 ಬ್ಯಾಂಕ್‌ಗಳಲ್ಲಿ ಒಟ್ಟು 45 ಸಾವಿರ ಕೋಟಿ ರೂ. ಸಾಲವನ್ನು ರಿಲಾಯನ್ಸ್‌ ಕಮ್ಯೂನಿಕೇಶನ್ಸ್‌   ಹೊಂದಿದೆ. ಕೆಲವೇ ದಿನಗಳ ಹಿಂದಷ್ಟೇ 40 ಸಾವಿರ ಕೋಟಿ ರೂ. ಹೂಡಿಕೆ ಯನ್ನು ಬಾಹ್ಯ ಮೂಲದಿಂದ ತರಲಾಗಿದೆ ಎಂದು ಅನಿಲ್‌ ಅಂಬಾನಿ ಘೋಷಿಸಿದ್ದರಿಂದ, ಷೇರು ಮಾರುಕಟ್ಟೆಯಲ್ಲಿ ಷೇರು ಮೌಲ್ಯ ಶೇ.50ಕ್ಕೂ ಹೆಚ್ಚು ಏರಿಕೆ ಕಂಡಿತ್ತು.