ಅಮೆರಿಕನ್ನರ ಗನ್‌ ವ್ಯಾಮೋಹಕ್ಕೆ ಅಂಕುಶ ಅನಿವಾರ್ಯ

ವಿಶ್ವದ ದೊಡ್ಡಣ್ಣ ಎಂದು ಕರೆಸಿಕೊಳ್ಳುವ ಅಮೆರಿಕದ ಪಾಲಿಗೆ ಸಾಮೂಹಿಕ ಗುಂಡಿನ ದಾಳಿ ಎನ್ನುವುದು ಬಲುದೊಡ್ಡ ಕಂಟಕವಾಗಿ ಪರಿಣಮಿಸಿದೆ. ಕಳೆದ ಐದಾರು ದಶಕಗಳಿಂದೀಚೆಗೆ ದೇಶದಲ್ಲಿ ಗುಂಡಿನ ಮೊರೆತ ಸಾಮಾನ್ಯ ಘಟನೆ ಎಂಬಂತಾಗಿದೆ. ಇತ್ತೀಚಿನ ದಿನಗಳಲ್ಲಂತೂ ಅಮೆರಿಕದ ಮೂಲೆ ಮೂಲೆಗಳಲ್ಲಿ ಗುಂಡಿನ ದಾಳಿ ಪ್ರಕರಣಗಳು ವರದಿಯಾಗ ತೊಡಗಿದ್ದು ಅಮಾಯಕರು ಪ್ರಾಣ ಕಳೆದುಕೊಳ್ಳುತ್ತಿದ್ದಾರೆ. ಹೊಸವರ್ಷದ ಮೊದಲ ತಿಂಗಳಲ್ಲೇ ದೇಶದಲ್ಲಿ ಪ್ರತಿನಿತ್ಯ ಎಂಬಂತೆ ಗುಂಡಿನ ದಾಳಿ ನಡೆದಿದೆ. ಇವುಗಳಲ್ಲಿ ಬಹುತೇಕ ಪ್ರಕರಣಗಳು ಸಾಮೂಹಿಕ ದಾಳಿಗಳಾಗಿರುವುದು ಇನ್ನೂ ಆತಂಕಕಾರಿ ವಿಷಯ.

2022ರ ಅಂಕಿಅಂಶಗಳ ಪ್ರಕಾರ ಅಮೆರಿಕದಲ್ಲಿ 523 ಸಾಮೂಹಿಕ ಗುಂಡಿನ ದಾಳಿಗಳು ನಡೆದಿದ್ದವು. ಇದೇನು ಇಂದು-ನಿನ್ನೆಯ ಸಮಸ್ಯೆಯಲ್ಲ. ದೇಶದ ಇತಿಹಾಸದತ್ತ ಬೆಳಕು ಚೆಲ್ಲಿದರೆ 2 ಶತಮಾನಗಳಷ್ಟು ಹಿಂದಿನಿಂದಲೇ ಗನ್‌ ಸಂಸ್ಕೃತಿ ಬೆಳೆದು ಬಂದಿದೆ. ಅಮೆರಿಕದಲ್ಲಿ ಬ್ರಿಟಿಷರು ವಸಾಹತು ಸ್ಥಾಪಿಸಿದ್ದ ವೇಳೆ ತಮ್ಮ ಕುಟುಂಬಗಳನ್ನು ರಕ್ಷಿಸಲು ಮನೆಯಲ್ಲಿ ಬಂದೂಕುಗಳನ್ನು ಇರಿಸಿಕೊಳ್ಳುತ್ತಿದ್ದರು. ಅಲ್ಲಿಂದ ಆರಂಭಗೊಂಡ ಈ “ಗನ್‌ ಕ್ರೇಝ್’ ದೇಶದಲ್ಲಿ ಇಂದಿಗೂ ಮುಂದುವರಿದಿದೆ. 1971ರಲ್ಲಿ ಅಮೆರಿಕದ ಸಂವಿಧಾನಕ್ಕೆ ತಿದ್ದುಪಡಿ ತಂದು ನಾಗರಿಕರಿಗೆ ಶಸ್ತ್ರಾಸ್ತ್ರಗಳನ್ನು ಹೊಂದಲು ನೀಡಿದ ಕಾನೂನುಬದ್ಧ ಹಕ್ಕು ಇಂದಿಗೂ ಮುಂದುವರಿದಿದ್ದು ಅದೀಗ ಅಮೆರಿಕದ ಖ್ಯಾತಿಗೆ ಮಸಿ ಬಳಿಯುತ್ತಿದೆ. ವಿದೇಶಿ ಸಂಶೋಧನ ಸಂಸ್ಥೆಯ ಅಧ್ಯಯನ ವರದಿಯ ಪ್ರಕಾರ ವಿಶ್ವದ ಒಟ್ಟಾರೆ ಜನಸಂಖ್ಯೆಯ ಶೇ.5ರಷ್ಟು ಜನರು ಅಮೆರಿಕದಲ್ಲಿದ್ದರೆ, ವಿಶ್ವದಲ್ಲಿರುವ ಒಟ್ಟಾರೆ ಬಂದೂಕುಗಳ ಪೈಕಿ ಶೇ. 46.9ರಷ್ಟು ಬಂದೂಕುಗಳು ಅಮೆರಿಕನ್ನರ ಬಳಿ ಇವೆ. ಇದು ನಿಜಕ್ಕೂ ಸೋಜಿಗವೇ ಸರಿ. ಇನ್ನೊಂದು ಆಘಾತಕಾರಿ ವಿಷಯ ಎಂದರೆ ಅಮೆರಿಕದಲ್ಲಿ ನಡೆದ ಸ್ವಾತಂತ್ರ್ಯ ಸಮರದ ವೇಳೆ ಸಾವನ್ನಪ್ಪಿದವರಿಗಿಂತ ಅಧಿಕ ಮಂದಿ ಶೂಟೌಟ್‌ಗಳಿಂದ ಪ್ರಾಣ ಕಳೆದುಕೊಂಡಿದ್ದಾರೆ. ಭಾರತವೂ ಸೇರಿದಂತೆ ಹಲವು ದೇಶಗಳ ಜನರು ಅಮೆರಿಕದಲ್ಲಿ ಸಾಕಷ್ಟು ಮಂದಿ ಇದ್ದಾರೆ. ಗನ್‌ ದಾಳಿ ನಡೆಸುವ ದುಷ್ಕರ್ಮಿ ಎಲ್ಲಿ, ಯಾರ ಮೇಲೆ ದಾಳಿ ನಡೆಸುತ್ತಾನೆ ಎಂಬುದನ್ನು ನಿರೀಕ್ಷಿಸುವಂತಿಲ್ಲ. ಹೊಟ್ಟೆಪಾಡಿಗಾಗಿ ಅಮೆರಿಕಕ್ಕೆ ಆಗಮಿಸಿರುವವರೂ ಇತ್ತೀಚೆಗಿನ ಬೆಳವಣಿಗೆಗಳಿಂದ ಆತಂಕಕ್ಕೆ ಒಳಗಾಗಿದ್ದಾರೆ.

ಇವೆಲ್ಲದರ ಹೊರತಾಗಿಯೂ ದೇಶದಲ್ಲಿ ಬಂದೂಕುಗಳ ಪರವಾನಿಗೆಯನ್ನು ಕಾನೂನಾತ್ಮಕವಾಗಿ ನಿಯಂತ್ರಿಸಲು ಅಲ್ಲಿನ ಸರಕಾರ ಮುಂದಾಗುತ್ತಿಲ್ಲ. ಪ್ರತೀ ಬಾರಿ ಸಾಮೂಹಿಕ ಗುಂಡಿನ ದಾಳಿ ನಡೆದಾಗಲೂ ಅಲ್ಲಿನ ಅಧ್ಯಕ್ಷರಾದಿಯಾಗಿ ಆಡಳಿತ ವ್ಯವಸ್ಥೆ ಅಮಾಯಕ ಜನರ ಪ್ರಾಣರಕ್ಷಣೆಯ ನಿಟ್ಟಿನಲ್ಲಿ ಬಂದೂಕುಗಳ ವಿವೇಚನಾತ್ಮಕ ಬಳಕೆಗೆ ಕರೆ ನೀಡುವಲ್ಲಿಗೆ ಪ್ರಕರಣ ಅಂತ್ಯಗೊಳ್ಳುತ್ತದೆ. ಆದರೆ ಗನ್‌ ಪರವಾನಿಗೆಯ ನಿಯಂತ್ರಣದ ದಿಸೆಯಲ್ಲಿ ಯಾವುದೇ ಕಾನೂನಾತ್ಮಕ ಕ್ರಮಗಳನ್ನು ಕೈಗೊಳ್ಳಲು ಸರಕಾರ ಮುಂದಾಗದಿರುವುದರಿಂದಲೇ ಈ ಸಮಸ್ಯೆ ಇಂದು ದೇಶವನ್ನು ಬಲುದೊಡ್ಡ ಪೆಡಂಭೂತವಾಗಿ ಕಾಡತೊಡಗಿದೆ.
ಈಗಾಗಲೇ ಅತಿರೇಕಕ್ಕೆ ತಲುಪಿರುವ ಅಮೆರಿಕನ್ನರ ಗನ್‌ ವ್ಯಾಮೋಹಕ್ಕೆ ಕಡಿವಾಣ ಹಾಕಲು ಅಲ್ಲಿನ ಸರಕಾರ ಇನ್ನಾದರೂ ಮನಸ್ಸು ಮಾಡಬೇಕಿದೆ. ದೇಶದ ಸಂವಿಧಾನಕ್ಕೆ ಅಗತ್ಯ ತಿದ್ದುಪಡಿ ತರುವ ಮೂಲಕ ಗನ್‌ ಪರವಾನಿಗೆ ಕಾನೂನನ್ನು ಬಿಗಿಗೊಳಿಸುವ ಜತೆಯಲ್ಲಿ ಈಗಾಗಲೇ ಗನ್‌ ಲೈಸನ್ಸ್‌ ಹೊಂದಿರುವವರಿಗೆ ಗನ್‌ ಬಳಕೆಗೆ ಸಂಬಂಧಿಸಿದಂತೆ ಕಠಿನ ನಿಯಮಾವಳಿಗಳನ್ನು ರೂಪಿಸಬೇಕಿದೆ. ಇಲ್ಲವಾದಲ್ಲಿ ಸದ್ಯೋಭವಿಷ್ಯದಲ್ಲಿ ದೇಶದೊಳಗೇ ಗನ್‌ ಸಮರ ನಡೆದರೆ ಅಚ್ಚರಿ ಏನೂ ಇಲ್ಲ.