ಅಂಬಲಪಾಡಿ: ಬಾವಿಗೆ ತ್ಯಾಜ್ಯ ನೀರು

ಉಡುಪಿ: ದಲಿತ ಸಮುದಾಯಕ್ಕೆ ಸೇರಿದ ಅಂಬಲಪಾಡಿ ಗ್ರಾಮದ ಸೀತು ಅವರ ಮನೆಯ ಬಾವಿಗೆ ತ್ಯಾಜ್ಯ ನೀರು ಸೇರಿದೆ. ಇದರಿಂದಾಗಿ ಕುಟುಂಬ ತೊಂದರೆಗೀಡಾಗಿದೆ.

ಮನೆ ತಗ್ಗು ಪ್ರದೇಶದಲ್ಲಿರುವುದರಿಂದ ಮಳೆಗಾಲದಲ್ಲಿ ಮನೆ
ಆವರಣ, ಬಾವಿ ತ್ಯಾಜ್ಯ ನೀರಿನಿಂದ ತುಂಬಿ ಹೋಗುತ್ತದೆ. ಕಳೆದ ವರ್ಷ ಇದೇ ರೀತಿ ಸಮಸ್ಯೆಯಾಗಿದ್ದಾಗ ಅಂದಿನ ಜಿಲ್ಲಾಧಿಕಾರಿಯವರಿಗೆ ಮನವಿ ಮಾಡಲಾಗಿತ್ತು. ಅವರು ನೀರು ಹರಿಯಲು ವ್ಯವಸ್ಥೆ ಮಾಡಿಸಿಕೊಟ್ಟಿದ್ದರು. ಆದರೆ ಈ ವರ್ಷ ತಡೆಯನ್ನು ತೆರವು ಮಾಡಲಾಗಿದೆ. ಇದರಿಂದ ಸಮಸ್ಯೆಯಾಗಿದೆ. ಹಾಗಾಗಿ ಕುಟುಂಬ ಮತ್ತೆ ಈ ಬಾರಿಯೂ ಜಿಲ್ಲಾಡಳಿತದ ಮೊರೆ ಹೋಗಿದೆ. ಕೊಳಕು ನೀರು ಕುಡಿಯುವ ಸ್ಥಿತಿ ನಿರ್ಮಾಣವಾಗಿದೆ.

ಕಲುಷಿತ ನೀರು ಕುಡಿದು ಮನೆಯ ಕೆಲವು ಮಂದಿ ಅನಾರೋಗ್ಯಕ್ಕೀಡಾಗಿದ್ದಾರೆ. ಸೊಳ್ಳೆಗಳ ಉತ್ಪತ್ತಿಯಿಂದಾಗಿ ಜ್ವರ ಪೀಡಿತರಾಗಿದ್ದಾರೆ. ಜಿಲ್ಲಾಡಳಿತ ಕೂಡಲೇ ಸ್ಪಂದಿಸಬೇಕು ಎಂದು ಕುಟುಂಬ ಮನವಿ ಮಾಡಿದೆ.