ಪುನೀತ್‌ ರಾಜಕುಮಾರ್‌ ಹೊಸ ಚಿತ್ರದ ಕುರಿತ ಗೊಂದಲ ಬಗೆಹರಿದಂತೆ ಕಾಣುತ್ತಿದೆ. ಸದ್ಯಕ್ಕೆ ಪುನೀತ್‌ ಕೈಯಲ್ಲಿ ಮೂರು ಚಿತ್ರಗಳಿದ್ದು, ಆ ಪೈಕಿ ಯಾವುದನ್ನು ಅವರು ಮೊದಲು ಕೈಗೆತ್ತಿಕೊಳ್ಳುತ್ತಾರೆ ಎಂಬ ಗೊಂದಲ ಮತ್ತು ಕುತೂಹಲ ಎಲ್ಲರಿಗೂ ಇತ್ತು. ಈ ಸಂಬಂಧ ಎಲ್ಲರೊಂದಿಗೆ ಚರ್ಚೆ ನಡೆಸಿ, ಫೆಬ್ರವರಿ ಮೊದಲ ವಾರದ ಹೊತ್ತಿಗೆ ಒಂದು ತೀರ್ಮಾನಕ್ಕೆ ಬಂದು ಪ್ರಕಟಿಸುವುದಾಗಿ ಪುನೀತ್‌ ಹೇಳಿದ್ದರು.
ಮೂಲಗಳ ಪ್ರಕಾರ, ಈ ಸಂಬಂಧ ಪುನೀತ್‌ ತೀರ್ಮಾನಕ್ಕೆ ಬಂದಿದ್ದು, ಮೊದಲು ರಾಕ್‌ಲೈನ್‌ ವೆಂಕಟೇಶ್‌ ನಿರ್ಮಾಣದ ಚಿತ್ರವನ್ನು ಕೈಗೆತ್ತಿಕೊಳ್ಳುವ ಸಾಧ್ಯತೆ ಇದೆಯಂತೆ. ಹೌದು, ರಾಕ್‌ಲೈನ್‌ ವೆಂಕಟೇಶ್‌ ನಿರ್ಮಾಣದ ಮತ್ತು ಪವನ್ ಒಡೆಯರ್‌ ನಿರ್ದೇಶನದ ಚಿತ್ರವನ್ನು ಪುನೀತ್‌ ಮೊದಲು ಕೈಗೆತ್ತಿಕೊಳ್ಳುವ ಸಾಧ್ಯತೆ ಇದೆ.
ಅದಕ್ಕೆ ಪೂರಕವೆಂಬಂತೆ, ಶಶಾಂಕ್‌ ನಿರ್ದೇಶನದಲ್ಲಿ ಪುನೀತ್‌ ಅಭಿನಯಿಸಬೇಕಿದ್ದ ಚಿತ್ರವು ಮುಂದಕ್ಕೆ ಹೋಗಿದ್ದು, ಅದಕ್ಕೂ ಮುನ್ನ “ತಾಯಿಗೆ ತಕ್ಕ ಮಗ’ ಚಿತ್ರವನ್ನು ಶಶಾಂಕ್‌ ನಿರ್ದೇಶಿಸಲಿದ್ದಾರೆ. ಇನ್ನು ನಿರ್ದೇಶಕ ಸಂತೋಷ್‌ ಆನಂದರಾಮ್‌, ಈ ಹಿಂದೆಯೇ ಜೂನ್‌ನಲ್ಲಿ ಪುನೀತ್‌ ಅವರ ಚಿತ್ರವನ್ನು ನಿರ್ದೇಶಿಸುವುದಾಗಿ ಹೇಳಿದ್ದರು. ಅಲ್ಲಿಗೆ ಉಳಿದಿದ್ದು ರಾಕ್‌ಲೈನ್‌ ಚಿತ್ರ ಮಾತ್ರ.
ಹಲವು ವರ್ಷಗಳಿಂದ ಪುನೀತ್‌ ಅವರ ಡೇಟ್‌ಗಾಗಿ ರಾಕ್‌ಲೈನ್‌ ವೆಂಕಟೇಶ್‌ ಕಾಯುತ್ತಿದ್ದರು. ಪುನೀತ್‌ ಸಹ ಬೇರೆ ಚಿತ್ರಗಳಲ್ಲಿ ತೊಡಗಿಸಿಕೊಂಡ ಕಾರಣ, ರಾಕ್‌ಲೈನ್‌ ನಿರ್ಮಾಣದ ಚಿತ್ರದಲ್ಲಿ ನಟಿಸುವುದಕ್ಕೆ ಸಾಧ್ಯವಾಗಿರಲಿಲ್ಲ. ಹಾಗಾಗಿ ಈ ಬಾರಿ, ರಾಕ್‌ಲೈನ್‌ಗೆ ಮೊದಲ ಪ್ರಾಶಸ್ತ್ಯವನ್ನು ಪುನೀತ್‌ ನೀಡಿದ್ದಾರೆ ಮತ್ತು ರಾಕ್‌ಲೈನ್‌ ನಿರ್ಮಾಣದ ಚಿತ್ರದಲ್ಲೇ ಮೊದಲು ಕಾಣಿಸಿಕೊಳ್ಳಲಿದ್ದಾರೆ ಎಂದು ಹೇಳಲಾಗುತ್ತಿದೆ.
ಅಲ್ಲಿಗೆ ಪುನೀತ್‌ ಅವರ ಮುಂದಿನ ಚಿತ್ರವನ್ನು ಯಾರು ನಿರ್ಮಿಸಿ, ನಿರ್ದೇಶಿಸುತ್ತಾರೆ ಎಂಬ ಗೊಂದಲಕ್ಕೆ ಬಹುತೇಕ ತೆರೆ ಬಿದ್ದಂತಾಗಿದೆ. ಪುನೀತ್‌ ಹೊಸ ಚಿತ್ರವನ್ನು ರಾಕ್‌ಲೈನ್‌ ವೆಂಕಟೇಶ್‌ ನಿರ್ಮಿಸುತ್ತಿದ್ದು, ಪವನ್ ಒಡೆಯರ್‌ ನಿರ್ದೇಶಿಸಲಿದ್ದಾರೆ. ಚಿತ್ರವು ಮಾರ್ಚ್‌ನಲ್ಲಿ ಪ್ರಾರಂಭವಾಗುವ ಸಾಧ್ಯತೆ ಇದೆ. ಚಿತ್ರದ ಹೆಸರೇನು, ಯಾರೆಲ್ಲಾ ನಟಿಸುತ್ತಾರೆ ಎಂಬ ಪ್ರಶ್ನೆಗಳಿಗೆ ಇನ್ನಷ್ಟೇ ಉತ್ತರ ಸಿಗಬೇಕಿದೆ.
