ವೈವಾಹಿಕ ಪ್ರಕರಣ ವಿಚಾರಣೆಗೆ ಮಹಿಳಾ ನ್ಯಾಯಪೀಠ ರಚನೆ

ನವದೆಹಲಿ: ವೈವಾಹಿಕ ವಿಚಾರಗಳು, ಜಾಮೀನು ವಿಚಾರಗಳಿಗೆ ಸಂಬಂಧಿಸಿದಂತೆ ಇರುವ ಪ್ರಕರಣಗಳ ವಿಚಾರಣೆ ನಡೆಸಲು ಮಹಿಳಾ ನ್ಯಾಯಮೂರ್ತಿಗಳು ಇರುವ ನ್ಯಾಯಪೀಠವನ್ನು ರಚಿಸಲಾಗಿದೆ.

ನ್ಯಾ.ಹಿಮಾ ಕೋಹ್ಲಿ ಮತ್ತು ನ್ಯಾ.ಬೇಲಾ ಎಂ.ತ್ರಿವೇದಿ ಅವರನ್ನು ಒಳಗೊಂಡಿರುವ ನ್ಯಾಯಪೀಠ ಈ ಪ್ರಕರಣಗಳ ವಿಚಾರಣೆ ನಡೆಸಲಿದೆ ಎಂದು ಮುಖ್ಯ ನ್ಯಾಯಮೂರ್ತಿ ಡಿ.ವೈ.ಚಂದ್ರಚೂಡ್‌ ತಿಳಿಸಿದ್ದಾರೆ. ಮೂರನೇ ಬಾರಿಗೆ ಇಂಥ ತೀರ್ಮಾನ ಕೈಗೊಳ್ಳಲಾಗಿದೆ.

2013ರಲ್ಲಿ ನ್ಯಾ.ಜ್ಞಾನ ಸುಧಾಮಿಶ್ರಾ ಮತ್ತು ನ್ಯಾ.ರಂಜನಾ ಪ್ರಕಾಶ್‌ ದೇಸಾಯಿ ಅವರನ್ನು ಒಳಗೊಂಡ ನ್ಯಾಯಪೀಠವನ್ನು ಮೊದಲಿಗೆ ರಚಿಸಲಾಗಿತ್ತು. 2018ರಲ್ಲಿ ನ್ಯಾ.ಆರ್‌. ಭಾನುಮತಿ ಮತ್ತು ನ್ಯಾ.ಇಂದಿರಾ ಬ್ಯಾನರ್ಜಿ ಅವರನ್ನು ಒಳಗೊಂಡ ನ್ಯಾಯಪೀಠವನ್ನು 2ನೇ ಬಾರಿಗೆ ರಚಿಸಲಾಗಿತ್ತು.