“ಬಕಾಸುರ’ ನಂತರ ಹೊಸ ಸಿನಿಮಾ ಮಾಡುವುದಾಗಿ “ಕರ್ವ’ ನವನೀತ್‌ ಹೇಳಿದ್ದರು. ಜೊತೆಗೆ ಆ ಚಿತ್ರದಲ್ಲಿ ಆಕಾಂಕ್ಷ ನಾಯಕಿಯಾಗಿ ನಟಿಸುತ್ತಿದ್ದು, ಚಿತ್ರದ ಚಿತ್ರೀಕರಣ ಊಟಿಯಲ್ಲಿ ನಡೆಯಲಿದೆ ಎಂದಿದ್ದರು. ಆದರೆ, ಯಾವ ಚಿತ್ರ ಎಂಬ ಬಗ್ಗೆ ಅನೇಕರಿಗೆ ಕುತೂಹಲವಿತ್ತು. ಈಗ ಆ ಕುತೂಹಲಕ್ಕೆ ಉತ್ತರ ಸಿಕ್ಕಿದೆ. ಅದು “ಕರ್ವ-2′. “ಕರ್ವ’ ಚಿತ್ರದ ಸಮಯದಲ್ಲೇ ತಾವು “ಕರ್ವ-2′ ಮಾಡುವುದಾಗಿ ನವನೀತ್‌ ಘೋಷಿಸಿದ್ದರು. ಈಗ ಆ ಚಿತ್ರದ ಸಿದ್ಧತೆ ನಡೆಯುತ್ತಿದೆ.
ಆರಂಭದಲ್ಲಿ ಆಕಾಂಕ್ಷ ಆಯ್ಕೆಯಾದಾಗ “ಕರ್ವ-2′ ಅಲ್ಲದೇ, ನವನೀತ್‌ ಮತ್ತೂಂದು ಚಿತ್ರ ಮಾಡುತ್ತಿದ್ದು, ಆ ಚಿತ್ರಕ್ಕೆ ಆಕಾಂಕ್ಷ ನಾಯಕಿ ಎನ್ನಲಾಗಿತ್ತು. ಆದರೆ, ಈಗ ಎಲ್ಲವೂ ಪಕ್ಕಾ ಆಗಿದೆ. “ಕರ್ವ-2′ ಚಿತ್ರಕ್ಕೆ ಹೊಸ ಸೇರ್ಪಡೆಯಾಗಿ ಆಕಾಂಕ್ಷ ಬಂದಿದ್ದಾರೆ. “ಆರ್‌ಎಕ್ಸ್‌ ಸೂರಿ’, “ಜಲ್ಸಾ’, “ಕ್ರ್ಯಾಕ್‌’ ಚಿತ್ರಗಳಲ್ಲಿ ನಟಿಸಿರುವ ಆಕಾಂಕ್ಷ ಈಗ ಮೊದಲ ಬಾರಿಗೆ ಹಾರರ್‌ ಸಿನಿಮಾದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ.
ಅಂದಹಾಗೆ, ಈ ಚಿತ್ರದಲ್ಲಿ ಆಕಾಂಕ್ಷಗೆ ತುಂಬಾ ಸವಾಲಿನ ಪಾತ್ರ ಸಿಕ್ಕಿದೆ. ಅದು ಬ್ಲೈಂಡ್‌ ಗರ್ಲ್. ಹೌದು, ಆಕಾಂಕ್ಷ ಇಲ್ಲಿ ಅಂಧ ಹುಡುಗಿಯಾಗಿ ನಟಿಸುತ್ತಿದ್ದಾರೆ. ಈ ಪಾತ್ರಕ್ಕಾಗಿ ಆಕಾಂಕ್ಷ ಒಂದಷ್ಟು ಸಿದ್ಧತೆಗಳನ್ನು ಕೂಡಾ ಮಾಡಿಕೊಳ್ಳುತ್ತಿದ್ದಾರಂತೆ. ಸದ್ಯ “ಬಕಾಸುರ’ ಚಿತ್ರದ ಚಿತ್ರೀಕರಣ ಮುಗಿಸಿರುವ ನವನೀತ್‌ ಆ ಚಿತ್ರದ ಪೋಸ್ಟ್‌ ಪ್ರೊಡಕ್ಷನ್‌ ಕೆಲಸಗಳಲ್ಲಿ ಬಿಝಿ. ಚಿತ್ರವನ್ನು ಅಕ್ಟೋಬರ್‌ನಲ್ಲಿ ಬಿಡುಗಡೆ ಮಾಡುವ ಯೋಚನೆ ಕೂಡಾ ನವನೀತ್‌ಗಿದೆ.
“ಬಕಾಸುರ’ ಚಿತ್ರ ಬಿಡುಗಡೆಯಾದ ಕೂಡಲೇ ನವನೀತ್‌ “ಕರ್ವ-2′ ಆರಂಭಿಸಲಿದ್ದಾರೆ. ಆಕಾಂಕ್ಷ ಬಿಟ್ಟರೆ “ಕರ್ವ-2’ನಲ್ಲಿ ಅದೇ ತಂಡ ಮುಂದುವರೆಯಲಿದೆ. ತಿಲಕ್‌, ರೋಹಿತ್‌, ಅನೀಶಾ, ಅನು ಸೇರಿದಂತೆ ಅದೇ ತಂಡ “ಕರ್ವ-2’ನಲ್ಲೂ ಬೆಚ್ಚಿಬೀಳಿಸಲಿದೆ. ಚಿತ್ರದ ತಾಂತ್ರಿಕ ಬಳಗದಲ್ಲಿ “ಕರ್ವ’ ತಂಡವೇ ಮುಂದುವರೆಯಲಿದೆ. ಚಿತ್ರದ ಚಿತ್ರೀಕರಣ ಊಟಿಯಲ್ಲಿ ನಡೆಯಲಿದೆ.
