Advertisement

ಪೊಲೀಸರ ಹೆಸರು ಬಳಸಿಕೊಂಡು ಸುಲಿಗೆ: ಆರೋಪಿ ಬಂಧನ

01:30 PM May 17, 2022 | Team Udayavani |

ಬೆಂಗಳೂರು: ಕ್ಲಬ್‌ಗಳಲ್ಲಿ ಜೂಜಾಟ ನಡೆಸಲು ಒಪ್ಪಂದ ಮಾಡಿಕೊಂಡು ಪೊಲೀಸರಿಗೆ ಹಣ ಕೊಟ್ಟರೆ ರಕ್ಷಣೆ ನೀಡುತ್ತಾರೆ ಎಂದು ಮಾತ ನಾಡಿರುವ ಆಡಿಯೋ ವೈರಲ್‌ ಸಂಬಂಧ ಆರ್‌ ಟಿಐ ಕಾರ್ಯಕರ್ತ ಅಶೋಕ್‌ ಕುಮಾರ್‌ ಅಡಿಗ ಎಂಬಾತನನ್ನು ಸಿಸಿಬಿ ಪೊಲೀಸರು ಬಂಧಿಸಿದ್ದಾರೆ.

Advertisement

ಸೋಮವಾರ ಆರೋಪಿಯನ್ನು ಕೋರ್ಟಿಗೆ ಹಾಜರು ಪಡಿಸಿ 10 ದಿನಗಳ ಕಾಲ ಪೊಲೀಸ್‌ ಕಸ್ಟಡಿಗೆ ಪಡೆದುಕೊಂಡಿದ್ದಾರೆ. ವೈರಲ್‌ ಆಗಿರುವ ಆಡಿಯೋದಲ್ಲಿ ಅಶೋಕ್‌ ಕುಮಾರ್‌ ಅಡಿಗ, “ಸಿಸಿಬಿ ಪೊಲೀಸರು ಹಾಗೂ ಠಾಣಾ ಮಟ್ಟದ ಪೊಲೀಸರಿಗೆ ತಿಂಗಳು ಅಥವಾ ವಾರಕ್ಕೆ ಇಂತಿಷ್ಟು ನಿಗದಿ ಮಾಡಲಾಗಿದೆ’ ಎಂದು ಕ್ಲಬ್‌ ಮಾಲೀಕರೊಬ್ಬರ ಜತೆ ಮಾತನಾಡಿದ್ದಾರೆ.

ಅಲ್ಲದೆ, ಕ್ಲಬ್‌ಗಳನ್ನು ತನ್ನ ಹೆಸರಿಗೆ ಅಗ್ರಿಮೆಂಟ್‌ ಮಾಡಿಕೊಟ್ಟರೆ, “ನಗರ ಪೊಲೀಸ ಆಯುಕ್ತರು, ಸಿಸಿಬಿ ಮುಖ್ಯಸ್ಥ ರಮಣಗುಪ್ತಾ ಸೇರಿ ಕಾನ್‌ಸ್ಟೇಬಲ್‌ ವರೆಗೂ ಯಾವೊಬ್ಬ ಅಧಿಕಾರಿಯೂ ತೊಂದರೆ ಕೊಡದಂತೆ ನೋಡಿಕೊಳ್ಳುತ್ತೇನೆ. ವಿಷಯ ಏನೆಂದರೆ, ಅಡಿಗ ಹೆಸರಿನಲ್ಲಿ ಕ್ಲಬ್‌ಗಳ ಅಗ್ರಿಮೆಂಟ್‌ಗಳಿದ್ದರೆ ಯಾವುದೇ ದಾಳಿ ನಡೆಸುವುದಿಲ್ಲ ಎಂದು ಪೊಲೀಸ್‌ ಇನ್‌ಸೆಕ್ಟರ್‌ಗಳೇ ಹೇಳುತ್ತಿದ್ದಾರೆ. ಹೀಗಾಗಿ ಕ್ಲಬ್‌ಗಳನ್ನು ತನ್ನ ಹೆಸರಿಗೆ ಅಗ್ರಿಮೆಂಟ್‌ ಮಾಡಿಕೊಡುವಂತೆ’ ಅಡಿಗ ಮಾತನಾಡಿದ್ದಾನೆ.

ಕ್ಲಬ್‌ ಮಾಲೀಕರಿಂದ ದೂರು: ಈ ಸಂಬಂಧ ಅಶೋಕ್‌ ಕುಮಾರ್‌ ಅಡಿಗ ಕಳೆದ ತಿಂಗಳು ಮಾಗಡಿ ರಸ್ತೆಯ ಕ್ಲಬ್‌ವೊಂದರಲ್ಲಿ ಇಸ್ಪೀಟ್‌ ಕ್ಲಬ್‌ ಮಾಲೀಕರ ಸಭೆ ನಡೆಸಿದ್ದ. ಈ ವೇಳೆ ತನ್ನ ಹೆಸರಿಗೆ ಕ್ಲಬ್‌ಗಳನ್ನು ಅಗ್ರಿಮೆಂಟ್‌ ಮಾಡಿಕೊಡುವಂತೆ ಕ್ಲಬ್‌ಗಳ ಮಾಲೀಕರಿಗೆ ಸೂಚಿಸಿದ್ದ. ಅದಕ್ಕಾಗಿ ಪ್ರತಿ ತಿಂಗಳು 50 ಸಾವಿರ ರೂ.ನೀಡ ಬೇಕು ಎಂದು ಬೇಡಿಕೆ ಇಟ್ಟಿದ್ದ. ಅದಕ್ಕೆ ಒಪ್ಪದ ರಮೇಶ್‌ ಹಾಗೂ ಇತರರು ಅಡಿಗಗೆ ಎಚ್ಚರಿಕೆ ನೀಡಿದ್ದರು.

ಅದರಿಂದ ಆಕ್ರೋಶಗೊಂಡ ಆರೋಪಿ, ತನ್ನ ಸಹಕಾರ ಇಲ್ಲದೆ ಕ್ಲಬ್‌ಗಳನ್ನು ಹೇಗೆ ನಡೆಸುತ್ತಿರಾ? ಎಂದು ಪಿಸ್ತೂಲ್‌ ತೋರಿಸಿ ಇನ್ನು ಅರ್ಧ ಗಂಟೆಯಲ್ಲಿ ಕ್ಲಬ್‌ ಮುಚ್ಚಿಸುತ್ತೇನೆ ಎಂದು ಬೆದರಿಕೆ ಹಾಕಿದ್ದ. ಅದರಿಂದ ಹೆದರಿದ ಶ್ರೀನಿವಾಸ್‌ ಎಂಬ ಕ್ಲಬ್‌ ಮಾಲೀಕ 50 ಸಾವಿರ ರೂ. ಕೊಟ್ಟಿದ್ದರು ಎಂದು ರಮೇಶ್‌ ಮಾಗಡಿ ರಸ್ತೆ ಠಾಣೆಯಲ್ಲಿ ದೂರು ನೀಡಿದ್ದರು. ಈ ಸಂಬಂಧ ಕಾರ್ಯಾಚರಣೆ ನಡೆಸಿದ ಪೊಲೀಸರು ಆರೋಪಿಯನ್ನು ಬಂಧಿಸಿದ್ದಾರೆ.

Advertisement

ಆರ್‌ಟಿಐ ಕಾರ್ಯಕರ್ತನ ಸೋಗಿನಲ್ಲಿ ವಂಚನೆ : ಅಶೋಕ್‌ ಕುಮಾರ್‌ ಅಡಿಗ ಆರ್‌ಟಿಐ ಕಾರ್ಯಕರ್ತನ ಸೋಗಿನಲ್ಲಿ ಸರ್ಕಾರಿ ಅಧಿಕಾರಿಗಳು ಹಾಗೂ ಅಮಾಯಕರ ಬಳಿ ಹಣ ಸುಲಿಗೆ ಮಾಡುತ್ತಿದ್ದ. ಪೊಲೀಸರ ಹೆಸರು ಬಳಸಿಕೊಂಡು ನಿರಂತರವಾಗಿ ಕ್ಲಬ್‌ ಮಾಲೀಕರು, ಹೋಟೆಲ್‌ ಮಾಲೀಕರಿಗೆ ಬೆದರಿಕೆ ಹಾಕಿ ಹಣ ಸುಲಿಗೆ ಮಾಡುತ್ತಿದ್ದ ಎಂಬ ಆರೋಪ ಕೂಡ ಇದೆ. ಈ ಬಗ್ಗೆ ತನಿಖೆ ನಡೆಯುತ್ತಿದೆ. ಈ ಸಂಬಂಧ 10 ದಿನಗಳ ಕಾಲ ಆರೋಪಿಯನ್ನು ವಶಕ್ಕೆ ಪಡೆದು ವಿಚಾರಣೆ ಮುಂದುವರಿಸಲಾಗಿದೆ ಎಂದು ಪೊಲೀಸರು ಹೇಳಿದರು.

ಪ್ರೊಪೋಸಲ್‏ಗೆ ನಿರೀಕ್ಷಿಸುತ್ತಿದ್ದೀರಾ? ಕನ್ನಡ ಮ್ಯಾಟ್ರಿಮೋನಿಯಲ್ಲಿ - ಉಚಿತ ನೋಂದಣಿ !

Advertisement

Udayavani is now on Telegram. Click here to join our channel and stay updated with the latest news.

Next