ಗೌಪ್ಯತೆ ವಿಚಾರ: ಸಾಂವಿಧಾನಿಕ ಪೀಠದಲ್ಲಿ 18, 19ಕ್ಕೆ ವಿಚಾರಣೆ

ನವದೆಹಲಿ: ಸರ್ಕಾರದ ಎಲ್ಲ ಯೋಜನೆಗಳ ಲಾಭ ಪಡೆಯಲು ಆಧಾರ್‌ ಕಡ್ಡಾಯ ಮಾಡಿ ಸಾರ್ವಜನಿಕರ ಖಾಸಗಿತನಕ್ಕೆ ಧಕ್ಕೆ ತಂದಿದೆ ಎಂಬ ಆರೋಪಗಳ ಬಗ್ಗೆ ಸುಪ್ರೀಂಕೋರ್ಟಿನ ಸಾಂವಿಧಾನಿಕ ಪೀಠ 18, 19ರಂದು ವಿಚಾರಣೆ ನಡೆಸಲಿದೆ. ಮುಖ್ಯ ನ್ಯಾಯಮೂರ್ತಿ ಜೆ.ಎಸ್‌.ಖೆಹರ್‌, ನ್ಯಾ. ಡಿ.ವೈ. ಚಂದ್ರಚೂಡ್‌ ಅವರನ್ನೊಳಗೊಂಡ ನ್ಯಾಯಪೀಠ ಬುಧವಾರ ಈ ಬಗ್ಗೆ ಮಾಹಿತಿ ನೀಡಿದೆ. ಆಧಾರ್‌ ಕಡ್ಡಾಯ ಮಾಡಿದ್ದನ್ನು ಪ್ರಶ್ನಿಸಿ ಹಿರಿಯ ವಕೀಲ ಶ್ಯಾಮ್‌ ದಿವಾನ್‌ ಅರ್ಜಿ ಸಲ್ಲಿಸಿದ್ದರು. ವೈಯಕ್ತಿಕ ಗೌಪ್ಯತೆ ಹಕ್ಕು ಹಾಗೂ ಆಧಾರ್‌ಗೆ ಸಂಬಂಧಿಸಿ ಸಲ್ಲಿಸಲಾಗಿರುವ ಎಲ್ಲಾ ಅರ್ಜಿಗಳನ್ನು ಶೀಘ್ರ ವಿಚಾರಣೆ ನಡೆಸುವಂತೆ ಮನವಿ ಮಾಡಿಕೊಂಡಿದ್ದರು. 

ತ್ರಿಸದಸ್ಯ ಪೀಠ ಏನು ಹೇಳಿತ್ತು?: ಒಮ್ಮೆ ಸಾಂವಿಧಾನಿಕ ನ್ಯಾಯಪೀಠದ ಮುಂದೆ ಹೋದ ಬಳಿಕ ಎಲ್ಲ ವಿಚಾರಗಳನ್ನೂ ಅದೇ ಪೀಠವೇ ವಿಚಾರಣೆ ನಡೆಸಲಿದೆ. ಒಂಬತ್ತು ಸದಸ್ಯರ ನ್ಯಾಯಪೀಠದಿಂದಲೇ ಈ ವಿಚಾರ ವಿಚಾರಣೆ ನಡೆಯುವುದು ಸೂಕ್ತ ಎಂದು ನ್ಯಾಯಪೀಠದ ಮುಖ್ಯಸ್ಥ ನ್ಯಾ.ಜೆ. ಚೆಲಮೇಶ್ವರ್‌ ಅಭಿಪ್ರಾಯಪಟ್ಟಿದ್ದರು.