ಕೋವಿಡ್ 19 ಭಯ; 3 ಗಂಟೆ ಕಾಲ ಪ್ರಜ್ಞೆ ತಪ್ಪಿ ರಸ್ತೆ ಮೇಲೆ ಬಿದ್ದಿದ್ದ ವ್ಯಕ್ತಿ ಸಾವು

ನವದೆಹಲಿ:ಸುಮಾರು 65ವರ್ಷದ ವ್ಯಕ್ತಿಯೊಬ್ಬರು ದಕ್ಷಿಣ ದೆಹಲಿಯ ಜನನಿಬಿಡ ರಸ್ತೆ ಮೇಲೆ ಮೂರು ಗಂಟೆಗಳ ಕಾಲ ಪ್ರಜ್ಞಾಹೀನರಾಗಿ ಬಿದ್ದಿದ್ದರು. ಆದರೆ ಯಾರೊಬ್ಬರು ಆ ವ್ಯಕ್ತಿಯ ನೆರವಿಗೆ ಧಾವಿಸಲಿಲ್ಲ. ಯಾಕೆಂದರೆ ಕೋವಿಡ್ 19 ವೈರಸ್ ಭಯದಿಂದ! ನಂತರ ಆ ವ್ಯಕ್ತಿ ಸಾವನ್ನಪ್ಪಿರುವುದಾಗಿ ಘೋಷಿಸಲಾಗಿದೆ ಎಂದು ವರದಿ ತಿಳಿಸಿದೆ.

ನಂತರ ಕೆಲವು ಪೊಲೀಸರು ಪಿಪಿಇ ಕಿಟ್ ಜತೆ ಡ್ರೆಸ್ ಹಾಕಿಕೊಂಡು ಬಂದು ರಸ್ತೆ ಮೇಲೆ ಬಿದ್ದಿದ್ದ ಯೂಸೂಫ್ ಸರಾಯ್ ಎಂಬ ಅಜ್ಜನನ್ನು ಆ್ಯಂಬುಲೆನ್ಸ್ ನಲ್ಲಿ ಹಾಕಿಕೊಂಡು ಲಾಲ್ ಬಹದ್ದೂರ್ ಶಾಸ್ತ್ರಿ ಆಸ್ಪತ್ರೆಗೆ ದಾಖಲಿಸಿದ್ದರು. ಆದರೆ ಪರೀಕ್ಷೆ ನಡೆಸಿದ ವೈದ್ಯರು ವ್ಯಕ್ತಿ ಸಾವನ್ನಪ್ಪಿರುವುದಾಗಿ ತಿಳಿಸಿದ್ದರು.

ಯೂಸೂಫ್ ಅವರು ಏಮ್ಸ್ ಆಸ್ಪತ್ರೆಯ ಮಾಜಿ (ಅಟೆಂಡರ್) ಉದ್ಯೋಗಿ ಎಂದು ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ. ವಿಪರೀತ ಬಿಸಿಲ ತಾಪದಿಂದಾಗಿ ದಕ್ಷಿಣ ದೆಹಲಿ ಮಾರ್ಕೆಟ್ ಪ್ರದೇಶದಲ್ಲಿ ಯೂಸೂಫ್ ಪ್ರಜ್ಞಾಹೀನರಾಗಿ ಬಿದ್ದಿದ್ದರು ಎಂದು ತಿಳಿಸಿದ್ದಾರೆ.