ದಾವಣಗೆರೆ: ಜಿಲ್ಲೆಯಲ್ಲಿ ಶುಕ್ರವಾರ 438 ಕೋವಿಡ್ ಸಕ್ರಿಯ ಪ್ರಕರಣಗಳು ವರದಿಯಾಗಿವೆ. ಮಹಾಮಾರಿಗೆ 6 ಜನರು ಮೃತಪಟ್ಟಿದ್ದಾರೆ.
ಕೋವಿಡ್ ಎರಡನೇ ಅಲೆ ಕಾಣಿಸಿಕೊಂಡ ನಂತರ ದಾವಣಗೆರೆ ಜಿಲ್ಲೆಯಲ್ಲಿ ಇದೇ ಮೊದಲ ಬಾರಿಗೆ ದಾಖಲೆ ಪ್ರಮಾಣದಲ್ಲಿ ಪ್ರಕರಣಗಳು ವರದಿಯಾಗಿವೆ. ಸಾವಿನ ಪ್ರಕರಣಗಳು ಸಹ ದಾಖಲೆ ಪ್ರಮಾಣದಲ್ಲಾಗಿವೆ.
ದಾವಣಗೆರೆ ತಾಲೂಕಿನ ಲೋಕಿಕೆರೆ ಗ್ರಾಮದ 46 ವರ್ಷದ ಮಹಿಳೆ, ದಾವಣಗೆರೆಯ ಯಲ್ಲಮ್ಮ ನಗರದ 55 ವರ್ಷದ ವ್ಯಕ್ತಿ, ಎಂಸಿಸಿ ಬಿ ಬ್ಲಾಕ್‌ನ 80 ವರ್ಷದ ವಯೋವೃದ್ಧೆ, ಶಕ್ತಿನಗರದ 61 ವರ್ಷದ ವ್ಯಕ್ತಿ, ಹೊನ್ನಾಳಿ ತಾಲೂಕಿನ ಮಾರಿಗೊಂಡನಹಳ್ಳಿಯ 70 ವರ್ಷದ ವಯೋವೃದ್ಧ, ಜಗಳೂರು ತಾಲೂಕಿನ 58 ವರ್ಷದ ಮಹಿಳೆ ಮೃತಪಟ್ಟವರು. ಜಿಲ್ಲೆಯಲ್ಲಿ ಕೊರೊನಾದಿಂದ ಮೃತಪಟ್ಟವರ ಸಂಖ್ಯೆ 277ಕ್ಕೆ ಏರಿದೆ.
ಜಿಲ್ಲಾ ಕೇಂದ್ರ ದಾವಣಗೆರೆಯಲ್ಲಿ ಕೊರೊನಾದ ಆರ್ಭಟ ಹೆಚ್ಚಾಗಿದೆ. ಒಂದೇ ದಿನ ಬರೋಬರಿ 294 ಜನರಲ್ಲಿ ಸೋಂಕು ಕಾಣಿಸಿಕೊಂಡಿದೆ. ಹರಿಹರದ 44, ಜಗಳೂರಿನ 16, ಚನ್ನಗಿರಿಯ 25, ಹೊನ್ನಾಳಿಯ 36, ಹೊರ ಜಿಲ್ಲೆಯ 23 ಜನರು ಒಳಗೊಂಡಂತೆ 438 ಜನರಲ್ಲಿ ಸೋಂಕು ದೃಢಪಟ್ಟಿದೆ.
ದಾವಣಗೆರೆ ನಗರ ಮತ್ತು ಇತರೆ ಭಾಗದ 114, ಹರಿಹರದ 14, ಜಗಳೂರುನ 4, ಚನ್ನಗಿರಿಯ 5, ಹೊನ್ನಾಳಿಯ 6 ಹಾಗೂ ಹೊರ ಜಿಲ್ಲೆಯ ನಾಲ್ವರು ಒಳಗೊಂಡಂತೆ 150 ಜನ ಸೋಂಕಿತರು ಗುಣಮುಖರಾಗಿದ್ದಾರೆ.
ಕಳೆದ ವರ್ಷ ಕೊರೊನಾ ಪ್ರಾರಂಭದಿಂದ ದಾವಣಗೆರೆ ತಾಲೂಕಿನಲ್ಲಿ 14806 , ಹರಿಹರದಲ್ಲಿ 3781, ಜಗಳೂರಿನಲ್ಲಿ 1310, ಚನ್ನಗಿರಿಯಲ್ಲಿ 2522, ಹೊನ್ನಾಳಿಯಲ್ಲಿ 2980, ಹೊರ ಜಿಲ್ಲೆಯ 691 ಜನರು ಸೇರಿದಂತೆ 26090 ಜನರು ಸೋಂಕಿಗೆ ಒಳಗಾಗಿದ್ದಾರೆ.
ಕೊರೊನಾದಿಂದ ದಾವಣಗೆರೆ ತಾಲೂಕಿನಲ್ಲಿ 13338, ಹರಿಹರದಲ್ಲಿ 3554, ಜಗಳೂರಿನಲ್ಲಿ 1202, ಚನ್ನಗಿರಿಯಲ್ಲಿ 2383, ಹೊನ್ನಾಳಿಯಲ್ಲಿ 2828, ಹೊರ ಜಿಲ್ಲೆಯ 599 ಜನರು ಸೇರಿದಂತೆ 23 893 ಸೋಂಕಿತರು ಗುಣಮುಖರಾಗಿದ್ದಾರೆ. ಜಿಲ್ಲೆಯಲ್ಲಿ 1920 ಸಕ್ರಿಯ ಪ್ರಕರಣಗಳಿವೆ.
