ಭಾರೀ ಮಳೆ; ಮುಂಬೈ ವಿಮಾನ ನಿಲ್ದಾಣದಲ್ಲಿ 30 ವಿಮಾನ ರದ್ದು, ಹಲವು ವಿಮಾನ ಸಂಚಾರ ವಿಳಂಬ

ಮುಂಬೈ: ಭಾರೀ ಮಳೆ ಹಾಗೂ ಹವಾಮಾನ ವೈಪರೀತ್ಯದಿಂದಾಗಿ ಮುಂಬೈನ ಛತ್ರಪತಿ ಶಿವಾಜಿ ಮಹಾರಾಜ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ ಹಾರಾಟ ನಡೆಸಬೇಕಾಗಿದ್ದ 30 ವಿಮಾನಗಳ ಸಂಚಾರ ಗುರುವಾರ ರದ್ದುಪಡಿಸಿದ್ದು, ಉಳಿದ 118 ವಿಮಾನಗಳು ವಿಳಂಬವಾಗಲಿದೆ ಎಂದು ವರದಿ ತಿಳಿಸಿದೆ.

ಲೈವ್ ಫ್ಲೈಟ್ ಟ್ರ್ಯಾಕಿಂಗ್ ವೆಬ್ ಸೈಟ್ ಮಾಹಿತಿ ಆಧಾರದ ಮೇಲೆ, ಮುಂಬೈಗೆ ಆಗಮಿಸುವ 14 ಹಾಗೂ ಮುಂಬೈನಿಂದ ಹೊರಡುವ 16 ವಿಮಾನಗಳ ಸಂಚಾರವನ್ನು ಇಂದು ರದ್ದುಪಡಿಸಿದೆ. ಅಲ್ಲದೇ 118 ವಿಮಾನಗಳ ಸಂಚಾರದಲ್ಲಿ ವಿಳಂಬವಾಗಲಿದೆ ಎಂದು ವಿವರಿಸಿದೆ.

ಈಗಾಗಲೇ ಸಂಚಾರ ರದ್ದುಗೊಳಿಸಿರುವ ಮಾಹಿತಿಯನ್ನು ಇಂಡಿಗೋ ವರದಿ ಮಾಡಿದ್ದು, ಪ್ರಯಾಣಿಕರು ಮುಂದಿನ ಮಾಹಿತಿಗಾಗಿ ಏರ್ ಲೈನ್ಸ್ ಅನ್ನು ಸಂಪರ್ಕಿಸುವಂತೆ ಮನವಿ ಮಾಡಿಕೊಂಡಿದೆ.