Airport Security ಕರ್ತವ್ಯದಲ್ಲಿದ್ದ 3 ಶ್ವಾನಗಳಿಗೆ ಸೇವೆಯಿಂದ ನಿವೃತ್ತಿ

ಪಣಜಿ: ಸೆಂಟ್ರಲ್ ಇಂಡಸ್ಟ್ರಿಯಲ್ ಸೆಕ್ಯುರಿಟಿ ಫೋರ್ಸ್‍ನ (CISF) ಏರ್ ಪೋರ್ಟ್ ಸೆಕ್ಯುರಿಟಿ ಗ್ರೂಪ್‍ನ ಬಾಂಬ್ ಪತ್ತೆ ದಳದಲ್ಲಿ ಕರ್ತವ್ಯದಲ್ಲಿದ್ದ 3 ಶ್ವಾನಗಳನ್ನು  ಸೇವೆಯಿಂದ ನಿವೃತ್ತಿಗೊಳಿಸಲಾಗಿದೆ. ಸುಮಾರು 10 ವರ್ಷಗಳ ಸೇವೆಯ ನಂತರ, ತಕ್ಷಕ್, ಶೆರೋ, ಟೈಗರ್ ಎಂಬ ಮೂರು ನಾಯಿಗಳು ನಿವೃತ್ತವಾಗಿವೆ.

ದಾಬೋಲಿ ವಿಮಾನ ನಿಲ್ದಾಣದಲ್ಲಿ ಮೂರೂ ಶ್ವಾನಗಳಿಗೆ ಸಿಎಸ್‍ಐಎಫ್ ದಳದ ವತಿಯಿಂದ ಬೀಳ್ಕೊಡಲಾಯಿತು. ಈ ಹಿನ್ನೆಲೆಯಲ್ಲಿ ಅಧಿಕಾರಿಗಳು ಮೂರು ನಾಯಿಗಳಿಗೆ ಹಾರ ಹಾಕಿ ಗೌರವಿಸಿದರು. ಇದಲ್ಲದೇ ಎಲ್ಲಾ ಮೂರು ನಾಯಿಗಳಿಗೂ ಪದಕಗಳನ್ನು ನೀಡಲಾಗಿದೆ. ಈ ಸಂದರ್ಭದಲ್ಲಿ ಸಿಐಎಸ್‍ಎಫ್ ಯೋಧರೊಂದಿಗೆ ಹಿರಿಯ ಅಧಿಕಾರಿಗಳು ಉಪಸ್ಥಿತರಿದ್ದರು. ಈ ಮೂರು ನಾಯಿಗಳು ಪ್ರಯಾಣಿಕರ ಸುರಕ್ಷಿತ ವಿಮಾನ ಪ್ರಯಾಣಕ್ಕೆ ಸಾಕಷ್ಟು ಕೊಡುಗೆ ನೀಡಿವೆ. ಈ  ಸನ್ಮಾನ ಸಮಾರಂಭದಲ್ಲಿ ಮೂರು ನಾಯಿಗಳನ್ನು ದತ್ತು ಪಡೆಯಲು ಆಸಕ್ತಿ ತೋರಿದ ಸಾಕುಪ್ರಾಣಿ ಪ್ರಿಯರಿಗೆ ಹಸ್ತಾಂತರಿಸಲಾಯಿತು.