ಪಂಜಾಬ್ ನ ಫಿರೋಜ್ ಪುರ್ ಗಡಿಯಲ್ಲಿ 21 ವರ್ಷದ ಪಾಕ್ ಗೂಢಚಾರನ ಬಂಧನ

ನವದೆಹಲಿ: ಪಾಕಿಸ್ಥಾನದ ವಶದಲ್ಲಿದ್ದ ವಿಂಗ್ ಕಮಾಂಡರ್ ಅಭಿನಂದನ್ ವರ್ಧಮಾನ್ ತಾಯ್ನಾಡಿಗೆ ಮರಳಲು ಕ್ಷಣಗಣನೆ ಆರಂಭಗೊಂಡಿದ್ದು, ಮತ್ತೊದೆಡೆ ಶುಕ್ರವಾರ ಬೆಳಗ್ಗೆ ಪಂಜಾಬ್ ಗಡಿಯಲ್ಲಿ ಪಾಕಿಸ್ತಾನಿ ಗೂಢಚಾರನೊಬ್ಬನನ್ನು ಬಿಎಸ್ ಎಫ್ ಬಂಧಿಸಿದೆ.

ಪಂಜಾಬ್ ಗಡಿಭಾಗದ ಔಟ್ ಪೋಸ್ಟ್ ಪಿರೋಜ್ ಪುರ್ ನಲ್ಲಿ ಪಾಕಿಸ್ತಾನದ ಗೂಢಚಾರ 21 ವರ್ಷದ ಮೊಹಮ್ಮದ್ ಶಾರುಖ್ ಎಂಬಾತನನ್ನು ಬಿಎಸ್ ಎಫ್ ಸೆರೆ ಹಿಡಿದಿದೆ. ಈತ ಪಾಕಿಸ್ತಾನದ ಮೊರಾದಾಬಾದ್ ನವನು ಎಂದು ವರದಿ ತಿಳಿಸಿದೆ.

ಮೊಹಮ್ಮದ್ ಬಳಿ ಇದ್ದ ಮೊಬೈಲ್ ಫೋನ್ ಅನ್ನು ಬಿಎಸ್ ಎಫ್ ವಶಪಡಿಸಿಕೊಂಡಿದ್ದು, ಅದನ್ನು ಪರಿಶೀಲಿಸಿದಾಗ ಈತ ಪಾಕಿಸ್ತಾನ ಮೂಲದ ಆರು ಶಂಕಿತ ವಾಟ್ಸಪ್ ಗ್ರೂಪ್ ನ ಸದಸ್ಯನಾಗಿರುವುದು ಪತ್ತೆಯಾಗಿತ್ತು. ಸಂಶಯಾಸ್ಪದವಾಗಿ ಗಡಿಭಾಗದ ಫೋಟೋ ತೆಗೆಯಲು ಯತ್ನಿಸುತ್ತಿದ್ದ ಮೊಹಮ್ಮದ್ ನನ್ನು ಸೆರೆಹಿಡಿಯಲಾಗಿದೆ ಎಂದು ವರದಿ ವಿವರಿಸಿದೆ.