ಲಂಕಾ ಕ್ರಿಕೆಟ್‌ ಒಡಂಬಡಿಕೆ: 18 ಆಟಗಾರರ ಪಟ್ಟಿ ಪ್ರಕಟ

ಕೊಲಂಬೊ: ರಾಷ್ಟ್ರೀಯ ಕ್ರಿಕೆಟ್‌ ಒಡಂಬಡಿಕೆಯ ವ್ಯಾಪ್ತಿಗೆ ಒಳಪಡುವ 18 ಆಟಗಾರರ ಪಟ್ಟಿಯನ್ನು ಶ್ರೀಲಂಕಾ ಕ್ರಿಕೆಟ್‌ ಮಂಡಳಿ ಪ್ರಕಟಿಸಿದ್ದು ಈ ನೂತನ ಒಪ್ಪಂದ ಆ. ಒಂದರಿಂದಲೇ ಜಾರಿಗೆ ಬಂದಿದ್ದು, ಡಿ. 31ರ ತನಕ ಜಾರಿಯಲ್ಲಿರುತ್ತದೆ ಎಂದಿದೆ.

ತಾಂತ್ರಿಕ ಸಲಹಾ ಸಮಿತಿ ಮತ್ತು ಶ್ರೀಲಂಕಾ ಕ್ರಿಕೆಟ್‌ ರೂಪಿಸಿರುವ ಈ ನೂತನ ಒಪ್ಪಂದ, ಸಹಿ ಹಾಕಿದ ಆಟಗಾರರಿಗಷ್ಟೇ ಅನ್ವಯವಾಗಲಿದೆ. ಒಟ್ಟು 24 ಕ್ರಿಕೆಟಿಗರನ್ನು ಲಂಕಾ ಮಂಡಳಿ ಅಂತಿಮಗೊಳಿಸಿತ್ತು. ಇವರಲ್ಲಿ ಏಂಜೆಲೊ ಮ್ಯಾಥ್ಯೂಸ್‌ ಸಹಿ ಹಾಕಲು ನಿರಾಕರಿಸಿದ್ದಾರೆ. ಉಳಿದಂತೆ ದನುಷ್ಕ ಗುಣತಿಲಕ, ನಿರೋಷನ್‌ ಡಿಕ್ವೆಲ್ಲ, ಕುಸಲ್‌ ಮೆಂಡಿಸ್‌ ಸದ್ಯ ನಿಷೇಧದಲ್ಲಿದ್ದಾರೆ.

ದೈಹಿಕ ಕ್ಷಮತೆ, ನಾಯಕತ್ವ-ಅನುಭವ, ವೃತ್ತಿಪರತೆ-ನಡತೆ, ಭವಿಷ್ಯ-ಹೊಂದಾಣಿಕೆ, ಈ ನಾಲ್ಕು ಮಾನದಂಡಗಳ ಆಧಾರದಲ್ಲಿ ಆಟಗಾರರನ್ನು ವಿಂಗಡಿಸಲಾಗುತ್ತದೆ; ಈ ಮಾನದಂಡದಂತೆಯೇ ಆಯ್ಕೆ ಪ್ರಕ್ರಿಯೆ ನಡೆಯುತ್ತದೆ ಎಂದು ಶ್ರೀಲಂಕಾ ಕ್ರಿಕೆಟ್‌ ಮಂಡಳಿ ತಿಳಿಸಿದೆ.